ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម អញ្ជើញចូលរួមទស្សនកិច្ចសិក្សា ជាមួយគណៈកម្មការសម្របសម្រួល ការគ្រប់គ្រងឋបនីយជីវមណ្ឌលបឹងទន្លេសាប

ចេញ​ផ្សាយ​ ២១ កុម្ភៈ ២០២៤ 2429

នៅថ្ងៃទី១៩ ខែកុម្ភៈ ឆ្នាំ២០២៤ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម អញ្ជើញចូលរួមដំណើរទស្សនកិច្ចសិក្សា ជាមួយគណៈកម្មការសម្របសម្រួល ការគ្រប់គ្រងឋបនីយជីវមណ្ឌលបឹងទន្លេសាប នៅតំបន់រ៉ាមសារព្រែកទាល់ ស្ថិតនៅក្នុងភូមិសាស្ត្រឃុំកោះជីវាំង ស្រុកឯកភ្នំ ខេត្តបាត់ដំបង។

ដំណើរទស្សនកិច្ចសិក្សានេះដឹកនាំដោយ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងមានការចូលរួមពីក្រសួង ស្ថាប័នពាក់ព័ន្ធ រដ្ឋបាលខេត្តទាំង៦ ជុំវិញបឹងទន្លេសាប និងអង្គការដៃគូពាក់ព័ន្ធ ប្រមាណជា៧០នាក់។

នាឱកាសដំណើរទស្សនកិច្ចសិក្សានោះ គណៈកម្មការសម្របសម្រួលការគ្រប់គ្រងឋបនីយជីវមណ្ឌលបឹងទន្លេសាប បានអញ្ជើញទៅទស្សនាបន្ទាយសត្វស្លាប នៅតំបន់រ៉ាមសារព្រែកទាល់ និងបានស្ដាប់បទបង្ហាញរួមមាន៖

១. តំណាងឃុំកោះជីវាំង បានលើកឡើងពីស្ថានភាពទូទៅនៃឃុំកោះជីវាំង

២. មន្ត្រីឧទ្យានុរក្ស លើកឡើងអំពី ការអភិរក្សសត្វស្លាប និងការល្បាតក្នុងតំបន់រ៉ាមសារព្រែកទាល់

៣.តំណាងសហគមន៍អេកូទេសចរណ៍ព្រែកទាល់ លើកឡើងពីការបម្រើសេវាកម្មអេកូទេសចរណ៍នៅតំបន់រ៉ាមសារព្រែកទាល់ ដែលមានដូចជាការជួលទូកជិះកំសាន្ត ការស្នាក់នៅ និងអាហារជាដើម

៤. តំណាងសហគមន៍នេសាទ បានបង្ហាញពីការអនុវត្តការងារ មានដូចជា៖ ការចុះល្បាត លើកផ្លាកសញ្ញា ការដាំកូនឈើ និងធ្វើទំនប់ស្ទាក់ទឹកចំនួន២កន្លែង

៥. តំណាងសហគ្រិនស្ត្រី លើកឡើងពីការអនុវត្តការងារមានដូចជា៖ ការផលិតរបស់កែច្នៃពីកំប្លោក និងធ្វើប្រហុកជាដើម៕