នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា លោក ឡោ ប៊ុណ្ណា អញ្ជើញជា​គណៈអធិបតី​បើកវគ្គបណ្តុះបណ្តាលស្តីពី«បច្ចេកទេសផលិតកម្មគ្រាប់ពូជស្រូវ»

ចេញ​ផ្សាយ​ ២៦ មីនា ២០២៥ 2767

នៅថ្ងៃទី២៥ ខែមីនា ឆ្នាំ២០២៥ លោក ឡោ ប៊ុណ្ណា នាយកវិទ្យាស្ថានស្រាវជ្រាវ និង​អភិវឌ្ឍន៍​កសិកម្មកម្ពុជា (CARDI) បានអញ្ជើញជាគណៈអធិបតីបើកវគ្គបណ្តុះ​បណ្តាល​ស្តីពី«បច្ចេកទេសផលិតកម្មគ្រាប់ពូជស្រូវ» នៅវិទ្យាស្ថានស្រាវជ្រាវ និង​អភិវឌ្ឍន៍កសិកម្មកម្ពុជា (CARDI)។

វគ្គបណ្តុះបណ្តាលធ្វើឡើងក្នុងគោលបំណង ផ្តល់ទ្រឹស្តីផ្សាភ្ជាប់ការអនុវត្តន៍​ទៅលើ​លក្ខណៈដើមស្រូវ កំណត់វិធីសាស្រ្តក្នុងការដាំដុះស្រូវ ចាត់តាំងពីការជ្រើសរើសពូជ ការ​សាបព្រោះ ការរៀបចំដី ការគ្រប់គ្រងទឹក សត្វល្អិត សារធាតុចិញ្ចឹម និងការ​រក្សា​ទុកក្រោយការប្រមូលផល។

បន្ថែមពីនេះទៀត វគ្គបណ្តុះបណ្តាលបានផ្តល់នូវជំនាញចាំបាច់ ដល់សិក្ខាកាម​ចូលរួម​ក្នុងការផលិតពូជស្រូវ ជាពិសេសការរួមចំណែកអនុវត្តផែនការ​យុទ្ធសាស្រ្ត​របស់​ក្រសួង ស្តីពីការប្រើប្រាស់ពូជសុទ្ធ មានគុណភាពល្អ និងសុវត្ថិភាពសម្រាប់​បណ្តាញ​ប្រើប្រាស់​គ្រាប់ពូជសុទ្ធ។

ថ្លែងក្នុងអង្គសិក្ខាសាលា លោក ឡោ ប៊ុណ្ណា បានគូសបញ្ជាក់ថា សម្រាប់លទ្ធផល​រំពឹងទុកនៃវគ្គបណ្តុះបណ្តាលនេះ គឺសិក្ខាកាមចូលរួមអាចទទួលចំណេះដឹង ពីការ​ជ្រើស​​រើសពូជដែលសមស្របនឹងការប្រែប្រួលអាកាសធាតុ យល់ដឹងពី​វិធីសាស្រ្ត​ល្អៗ​ក្នុងការដាំដុះ និងគ្រប់គ្រងដំណាំស្រូវ និងដំណើរការផលិតគ្រាប់ពូជជាជំហានៗ។

គួរបញ្ជាក់ជូនថា វិទ្យាស្ថាន CARDI មានកិច្ចព្រមព្រៀងជាមួយវិទ្យាស្ថានអន្តរជាតិ​ស្រាវជ្រាវដំណាំស្រូវ (IRRI) ដែលតម្រូវឱ្យវិទ្យាស្ថានរៀបចំវគ្គបណ្តុះបណ្តាលស្តីពី «មូលដ្ឋានគ្រឹះនៃផលិតកម្មគ្រាប់ពូជស្រូវ» ដែលមានការសម្របសម្រួលពីអ្នកជំនាញ (IRRI) និងមានការគាំទ្រពីប្រទេសជប៉ុន ក្រោមគម្រោង «កម្មវិធីកសាងសមត្ថភាព នៃមូលនិធិសមាហរណកម្មជប៉ុន-អាស៊ាន សម្រាប់បណ្តាញដំណាំស្រូវអាស៊ាន»៕