ឯកឧត្តម ឌិត ទីណា ជួបសំណេះសំណាល ជាមួយបងប្អូនខ្មែររស់នៅប្រទេសបារាំង ក្នុងឱកាសអញ្ជើញបំពេញទស្សនកិច្ច ចូលរួមពិព័រណ៌កសិកម្មនៅទីក្រុងប៉ារីស ប្រទេសបារាំង

ចេញ​ផ្សាយ​ ២ មីនា ២០២៣ 3655

ក្នុងជំនួបនោះ ឯកឧត្តមរដ្ឋមន្ត្រីបានជម្រាបជូនបងប្អូនខ្មែរ អំពីគោលបំណងនៃទស្សនកិច្ចរបស់ឯកឧត្តមមកកាន់ប្រទេសបារាំង គឺដើម្បីសិក្សាស្វែងរកទីផ្សារ សម្រាប់កសិផលកម្ពុជា នៅក្នុងប្រទេសបារាំង និងជាពិសេសនៅក្នុងសហគមន៍អឺរ៉ុប។

ឯកឧត្តមរដ្ឋមន្ត្រីបានលើកឡើង ពីសក្តានុពលនៃផលិតផលកសិកម្មកម្ពុជា ដែលរួមមាន អង្ករផ្ការំដួលកម្ពុជា បានជាប់ជាអង្ករល្អដាច់គេ នៅលើពិភពលោកចំនួន៥លើក ស្ករត្នោត រួមទាំងកសិកផលផ្សេងៗទៀតដូចជា ផ្លែចេក និងផ្លែស្វាយជាដើម។

ក្នុងជំនួបដ៏ស្និតស្នាល និងរីករាយនោះដែរ ឯកឧត្តមរដ្ឋមន្ត្រី ឌិត ទីណា  ក៏បានអំពាវនាវឲ្យប្រជាពលរដ្ឋខ្មែរ ដែលកំពុងរស់នៅក្នុងប្រទេសបារាំង រួបរួម និងទុកចិត្តគ្នា ដើម្បីជួយឲ្យកសិផលខ្មែរ អាចឈានចូលទីផ្សារប្រទេសបារាំង និងអឺរ៉ុប ឲ្យបានកាន់តែច្រើន តាមរយៈការវិនិយោគដាក់ទុនរួមគ្នាក្តី។

ក្នុងឱកាសចូលរួមក្នុងពិព័រណ៍កសិកម្មនៅទីក្រុងប៉ារីស ឯកឧត្តមរដ្ឋមន្ត្រីបានសម្លឹងឃើញពីលទ្ធភាព ក្នុងធ្វើពាណិជ្ជកម្មកសិផលជាមួយបារាំង ដោយកម្ពុជាអាចនឹងនាំចូលផ្លែប៉ោមពីបារាំង ហើយបារាំងអាចនាំចេញផ្លែស្វាយ និងផ្លែចេកពីកម្ពុជា នៅពេលខាងមុខ។

សូមជម្រាបថា ឯកឧត្តមរដ្ឋមន្ដ្រី ឌិត ទីណា បានដឹកនាំគណៈប្រតិភូកម្ពុជា ចូលរួមពិព័រណ៌កសិកម្មនៅទីក្រុងប៉ារីស ប្រទេសបារាំង ចាប់ពីថ្ងៃទី២៨ ខែកុម្ភៈ រហូតដល់ថ្ងៃទី២ ខែមីនា ឆ្នាំ២០២៣៕