លោកជំទាវ យ៉ើ អាស៊ីគីន អញ្ជើញដឹកនាំកិច្ចប្រជុំពិគ្រោះយោបល់​ប្រមូល​ធាតុចូល ស្តីពី« ការរៀបចំផែនទីបង្ហាញផ្លូវគម្រោងពង្រឹង​ពាណិជ្ជកម្ម​អេឡិចត្រូនិកនៅតំបន់ជនបទ (REEP) »

ចេញ​ផ្សាយ​ ២៧ មករា ២០២៦ 61

នារសៀលថ្ងៃទី២៧ ខែមករា ឆ្នាំ២០២៦ លោកជំទាវ យ៉ើ អាស៊ីគីន អនុរដ្ឋ​លេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុម​ការងារ​ចូលរួមកិច្ចប្រជុំពិគ្រោះយោបល់ ជាមួយតំណាងក្រសួង​ពាណិជ្ជកម្ម និងជាទីប្រឹក្សាគម្រោង ដើម្បីប្រមូលធាតុចូលស្តីពី «ការរៀបចំ​ផែនទីបង្ហាញផ្លូវគម្រោងពង្រឹងពាណិជ្ជកម្មអេឡិចត្រូនិក​នៅតំបន់ជនបទ (REEP) » នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
គោលបំណងនៃកិច្ចប្រជុំ ដើម្បីប្រមូលធាតុចូលពីភាគីពាក់ព័ន្ធ សម្រាប់​ការរៀបចំផែនទីបង្ហាញផ្លូវពង្រឹងពាណិជ្ជកម្មអេឡិចត្រូនិក នៅតំបន់​ជនបទ (REEP) ដែលជាជំនួយបច្ចេកទេសពីមូលនិធិថ្នាក់តំបន់សម្រាប់​ការ​អភិវឌ្ឍពាណិជ្ជកម្ម (RT4D) និងដើម្បីកំណត់អាទិភាព និងទិសដៅ​ការ​អនុវត្តគម្រោង REEP ឱ្យស្របតាមតម្រូវការជាក់ស្តែង នៃវិស័យកសិកម្ម និង​ពាណិជ្ជកម្មអេឡិចត្រូនិកនៅតំបន់ជនបទ។
នៅក្នុងកិច្ចប្រជុំ លោកជំទាវ យ៉ើ អាស៊ីគីន បានធ្វើការចែករំលែកអំពី​គោល​នយោបាយឌីជីថលរបស់ក្រសួងកសិកម្ម រុក្ខាប្រមាញ់ និងនេសាទ  និងការអនុវត្តកម្មវិធី CAM-Agri Tech ក៏ដូចជាការឆ្លើយតប និងផ្តល់​អនុសាសន៍ លើការការរៀបចំផែនទីបង្ហាញផ្លូវគម្រោង ពង្រឹងពាណិជ្ជកម្ម​អេឡិចត្រូនិកនៅតំបន់ជនបទនេះផងដែរ៕