ព័ត៌មានផ្សេងៗទៀត
ក្រសួងកសិកម្ម រៀបចំសិក្ខាសាលាស្តីពី «ទស្សនទាន និងចែករំលែកលទ្ធផល បទពិសោធន៍នៃការផ្សព្វផ្សាយការប្រើប្រាស់ ទឹកខ្មេះ ធ្យូងជីវៈ ជីសរីរាង្គ និងជី NPK » នៅខេត្តព្រៃវែង និងខេត្តកំពង់ធំ
ចេញផ្សាយ ២៦ សីហា ២០២៦ 4166
នៅថ្ងៃទី២៤ និងថ្ងៃទី២៦ ខែសីហា ឆ្នាំ២០២៦ នាយកដ្ឋានផ្សព្វផ្សាយកសិកម្ម សហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង និងខេត្តកំពង់ធំ និងអង្គការ GIZ បានរៀបចំសិក្ខាសាលាស្តីពី «ទស្សនទាន និងចែករំលែកលទ្ធផល បទពិសោធន៍ នៃការផ្សព្វផ្សាយការប្រើប្រាស់ទឹកខ្មេះ ធ្យូងជីវៈ ជីសរីរាង្គ និងជី NPK» ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
សិក្ខាសាលានេះរៀបចំឡើងក្នុងគោលបំណងពង្រឹងសមត្ថភាពមន្ត្រីបច្ចេកទេស ជាពិសេសមន្ត្រីកសិកម្មឃុំ ឱ្យមានចំណេះដឹង និងជំនាញច្បាស់លាស់ក្នុងការផ្សព្វផ្សាយ និងចែករំលែកបទពិសោធន៍អំពីការប្រើប្រាស់ធាតុចូលកសិកម្មប្រកបដោយប្រសិទ្ធភាព និងនិរន្តរភាព។
តាមលទ្ធផលជាក់ស្តែង ការប្រើប្រាស់ធាតុចូលទាំងនេះលើដំណាំ ស្រូវ បន្លែ ឈើហូបផ្លែ ដំឡូងមី ស្វាយចន្ទី ឈូក និងទុរេន បានរួមចំណែកបង្កើនទិន្នផល និងគុណភាពកសិផល កាត់បន្ថយថ្លៃដើមផលិតកម្ម និងបង្កើនប្រសិទ្ធភាពការប្រើប្រាស់ធាតុចូល។ ជាមួយគ្នានេះ មន្ត្រីកសិកម្មក៏បានរៀបចំផែនការជាក់លាក់ ដើម្បីពង្រីកការផ្សព្វផ្សាយទៅកាន់ឃុំគោលដៅ និងឱ្យកសិករកាន់តែច្រើនទទួលបានអត្ថប្រយោជន៍ពីសេវាកសិកម្ម៕
