ឯកឧត្តមរដ្ឋលេខាធិការ ហ៊ាន វណ្ណហន អញ្ជើញអធិបតីបើកសិក្ខាសាលាផ្សព្វផ្សាយទស្សនទានសហគមន៍កសិកម្ម និងសហគមន៍កសិកម្មទំនើប នៅខេត្តមណ្ឌលគិរី

ចេញ​ផ្សាយ​ ១០ កញ្ញា ២០២៥ 857

នៅថ្ងៃទី១០ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF បានអញ្ជើញជាអធិបតីបើកសិក្ខាសាលាបណ្ដុះបណ្ដាលស្ដីពីទស្សនទានសហគមន៍កសិកម្ម និងសហគមន៍កសិកម្មទំនើប នៅខេត្តមណ្ឌលគិរី។

សិក្ខាសាលានេះ មានការចូលរួមពីក្រុមការងារអនុវត្ដន៍គម្រោងថ្នាក់ជាតិ CaWSIP-MAFF មន្ត្រីជំនាញពាក់ព័ន្ធក្រោមឱវាទក្រសួង និងថ្នាក់ខេត្ដនៃមន្ទីរកសិកម្ម រុក្ខាប្រមាញ់ និងនេសាទខេត្ដគោលដៅទាំងគម្រោង មន្ត្រីអនុវត្តន៍គម្រោងមន្ទីរធនធានទឹកខេត្តមណ្ឌលគិរី  មន្រ្តីកសិកម្មឃុំ និងតំណាងអាជ្ញាធរស្រុក-ឃុំ-ភូមិគោលដៅ  ក្រុមហ៊ុនវិស័យឯកជន ដៃគូរអភិវឌ្ឍន៍ និងសហគមន៍កសិកម្ម។

ឯកឧត្តមរដ្ឋលេខាធិការបានថ្លែងថា សិក្ខាសាលានេះ រៀបចំឡើងក្នុងគោលបំណង (១).ផ្សព្វផ្សាយទស្សនទានសហគមន៍កសិកម្ម និងសហគមន៍កសិកម្មទំនើបដល់អាជ្ញាធរស្រុក ឃុំ ភូមិ សគមន៍កសិកម្ម កសិករ និងសហករប្រើប្រាស់ទឹកឱ្យបានយល់ពីអត្ថប្រយោជន៍នៃការបង្កើតសហគមន៍កសិកម្មទំនើប (២).ប្រែក្លាយសហគមន៍កសិកម្មឱ្យទៅជាសហគ្រាសខ្នាតមធ្យម តាមរយៈទស្សនទាន និងគោលការណ៍តាមគំរូថ្មី (៣).ធានាបានទាំងបរិមាណ គុណភាព និងផ្គត់ផ្គង់ជាមួយវិស័យឯកជន ដល់ទីផ្សារក្នុងស្រុក និងក្រៅស្រុក តាមរយៈការកសាងភាពទំនុកចិត្ដជាមួយដៃគូរអាជីវកម្ម (៤).បង្កើនការអនុវត្តការងារ ចំណូលកសិករនៅតាមជនបទ និងចូលរួមចំណែកក្នុងការពង្រីកសេដ្ឋកិច្ចជាតិ(៥).ពង្រឹងសមត្ថភាពសហគមន៍កសិកម្មថ្មីឱ្យចេះដឹកនាំ គ្រប់គ្រង រៀបចំផែនការប្រតិបត្តិមុខជំនួញ គ្រប់គ្រងហិរញ្ញវត្ថុដោយកម្លាភាព ស្រមតាមច្បាប់ និងលិខិតបទដ្ឋានគតិយុត្តក្រោមច្បាប់ ស្តីពីសហគមន៍កសិកម្ម (៦).ពង្រឹងសមត្ថភាពក្នុងការរៀបចំផែនការមុខជំនួញសម្រាប់សហគមន៍កសិកម្មគំរូថ្មី (៧).ពង្រឹងភាពអង់អាចផ្នែកសេដ្ឋកិច្ច និងការចូលរួមរបស់បុរស-ស្រ្តី ក្នុងជីវភាពប្រចាំថ្ងៃ នៅក្នុងសហមគន៍ និង (៨).ពង្រឹងការចូលរួម និងទំនាក់ទំនងមិនអាចខ្វះបានរវាងរដ្ឋ វិស័យឯកជន ដៃគូរអភិវឌ្ឍន៍ និងសហគមន៍។

ទន្ទឹមនឹងនេះ ឯកឧត្ដមរដ្ឋលេខាធិការ បានគូរបញ្ជាក់ថា សិក្ខាសាលានេះនឹងធ្វើឱ្យសិក្ខាកាមទាំងអស់បានយល់ច្បាស់ពីសហគមន៍កសិកម្ម សហគមន៍កសិកម្មទំនើប និងនិតិវិធីបង្កើតជាសហគមន៍ទំនើប ដោយមានបទបង្ហាញពីមន្រ្ដីជំនាញពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ។ ក្នុងនោះដែរ ឯកឧត្ដម  ក៏បានបង្ហាញពីសារៈសំខាន់នៃគម្រោងក្នុងការលើកកម្ពស់ការ ទទួលយកកសិកម្មវៃឆ្លាត បន្សាំទៅនឹងអាកាសធាតុ និងការកំណត់នូវប្រភេទដំណាំមានសក្តានុពល និងតម្រូវការទីផ្សារ។ ជាមួយគ្នានេះ សិក្ខាកាមបានធ្វើកិច្ចពិភាក្សា និងផ្ដល់ធាតុចូលសំខាន់ៗ ពីសក្ដានុពល ការគាំទ្រពីអាជ្ញាធរពាក់ព័ន្ធ និងភាពខ្លាំង ភាពខ្សោយ បណ្ដាសហគមន៍ក្នុងវិសាលភាពគម្រោងឃុំស្រែសង្គម ឃុំស្រែហ៊ុយ ឃុំរយ៉ និងឃុំអបួនលើ ក្នុងស្រុកកោះញែក ខេត្តមណ្ឌលគិរី៕