Other News
ឯកឧត្តមអនុរដ្ឋលេខាធិការ សុខ វិសាល អញ្ជើញដឹកនាំក្រុមការងារជំនាញ ចុះពិនិត្យការប្រមូលផលស្រូវ តម្លៃស្រូវ និងការនាំចេញស្រូវ តាមច្រកព្រំដែនខេត្តតាកែវ
ចេញផ្សាយ ១៩ ធ្នូ ២០២៤ 203
នៅថ្ងៃទី១៩ ខែធ្នូ ឆ្នាំ២០២៤ ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារជំនាញ ចុះពិនិត្យការប្រមូលផលស្រូវ តម្លៃស្រូវ និងការនាំចេញស្រូវ តាមច្រកព្រំដែនខេត្តតាកែវ។
នាដំណើរចុះត្រួតពិនិត្យនោះ មានការចូលរួមផងដែរពី លោក សុខ ចាន់សុផល អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោកអភិបាលរងស្រុកគិរីវង់ លោកមេឃុំ និងមន្ត្រីជំនាញពាក់ព័ន្ធ។ ក្នុងនោះមន្រ្តីជំនាញបានបង្ហាញថា៖ ក្នុងឆ្នាំ២០២៤ នេះកសិករនៅតំបន់នោះបានបង្កបង្កើនផលស្រូវរដូវវស្សា លើផ្ទៃដីសរុប ២២៤ ៤៦៤ ហិកតា ស្មើ១២៤.៧០% នៃផែនការ ដែលក្នុងនោះ ស្រូវស្រាល ៥១.៩៤% ទទួលទិន្នផលមធ្យម ៣.៥៣០តោន/ហិកតា ស្រូវកណ្ដាល ៤៦.៥៩% ទទួលទិន្នផលមធ្យម ៣.៣៥៩តោន/ហិកតា ស្រូវធ្ងន់ ១.៤៣% បានទិន្នផលមធ្យម ៣.៣៧៨តោន/ហិកតា។
ជាមួយគ្នានេះដែរ ឯកឧត្តម សុខ វិសាល រួមទាំងក្រុមការងារ បានចុះសាកសួរព័ត៌មានអំពីតម្លៃស្រូវ តាមទីតាំងមានដូចជា៖ ច្រកទ្វារភ្នំដិន ស្រុកគិរីវង់ ដោយបានជួបជាមួយកសិករ សៅ ខន ភូមិចំរេះ ឃុំព្រៃរំដេង ស្រុកគិរីវង់ ខេត្តតាកែវ បញ្ជាក់ថាតម្លៃស្រូវOM នៅថ្ងៃនេះឈ្មួញទិញ ក្នុងតម្លៃ ១ ០៣០ រៀល/គីឡូក្រាម។
ចំណែករោងម៉ាស៊ីនស្រូវ ហ្គោលឌិនដូនកែវ ទីតាំងនៅសង្កាត់រកាក្នុង ក្រុងដូនកែវ ខេត្តតាកែវ បានប្រមូលទិញស្រូវផ្ការំដួល ៥០០តោន ក្នុងតម្លៃ ១៣៨០រៀល/គីឡូក្រាម អំឡុងខែវិច្ឆិកា ដែលជាស្រូវ នៅក្នុងតំបន់ ហើយម៉ាស៊ីនកិនស្រូវនេះ ផ្គត់ផ្គង់តម្រូវការក្នុងស្រុក(ស្រូវស្តុក)។ រោងម៉ាស៊ីនស្រូវ សុខកែវ មានទីតាំងក្នុងឃុំលាយបូរ ស្រុកត្រាំកក់ ខេត្តតាកែវ ប្រមូលទិញស្រូវក្នុងតម្លៃ១៤២០រៀល/គីឡូក្រាម អំឡុងខែវិច្ឆិកា ដែលជាស្រូវនៅក្នុងតំបន់ ហើយម៉ាស៊ីនកិនស្រូវនេះ ផ្គត់ផ្គង់តម្រូវការក្នុងស្រុកផងដែរ៕
