ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាពក្នុងពិធី ប្រកាស​​ដាក់ឱ្យប្រើប្រាស់នូវប្រព័ន្ធស្ថិតិជលផលឌីជីថល (Online FishStat System)

ចេញ​ផ្សាយ​ ១ តុលា ២០២៥ 355

នៅថ្ងៃទី១ ខែតុលា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ ជាតំណាងដ៏ខ្ពង់ខ្ពស់ឯកឧត្តមរដ្ឋ​មន្រ្តី ឌិត ទីណា បានអញ្ជើញជាអធិបតីភាព ក្នុងពិធីប្រកាសដាក់ឱ្យប្រើ​ប្រាស់​​នូវ​ប្រព័ន្ធស្ថិតិជលផលឌីជីថល (Online FishStat System) និង​មាន​ការចូលរួមពីថ្នាក់ដឹកនាំនាយកដ្ឋាន វិទ្យាស្ថាន អធិការរដ្ឋបាលជលផល​២៥ ខណ្ឌរដ្ឋបាលជលផល តំណាងនាយកដ្ឋានផែនការ ស្ថិតិនៃក្រសួង​កសិកម្ម លោក Koen Everaert  អនុប្រធានផ្នែកសហប្រតិបត្តិការអន្តរជាតិ​នៃសហភាពអឺរ៉ុប និងលោកស្រី Rebekah Bell ប្រធានអង្គការFAO ប្រចាំ​នៅកម្ពុជា សរុបអ្នកចូល​រួម៩៥នាក់ (ស្រ្តី២៦នាក់) ដែលពិធីប្រព្រឹត្តទៅ​នៅសណ្ឋាគារសាន់&មូន រាជធានីភ្នំពេញ។
ថ្លែងនៅក្នុងអង្គពិធី ឯកឧត្តមរដ្ឋលេខាធិការ ហាស់ សារ៉េត បានគូសបញ្ជាក់​ថា ការបើកដំណើរការប្រព័ន្ធស្ថិតិជលផល FishStat នេះ មិនត្រឹមតែជាការ​ណែនាំ​កម្មវិធី ឬបច្ចេកវិទ្យាថ្មីមួយនោះទេ  ជាការបង្ហាញពីផ្លាស់ប្តូរដ៏សំខាន់​ដែល​យើងអនុវត្តបច្ចេកវិទ្យាឌីជីថលទំនើប សម្រាប់ការគ្រប់គ្រង និងការ​អភិវឌ្ឍ​​​​ធនធានជលផល ត្រូវបាន​រំពឹងថា នឹងមានជាការដោះស្រាយ​បញ្ហាលំបាក​ផ្សេងៗ។ ប្រព័ន្ធនេះ​បង្ហាញឱ្យឃើញ​បានច្បាស់ជាងមុន មិនត្រឹមតែ​ទិន្នន័យ​បច្ចុប្បន្នទេ ប៉ុន្តែថែមទាំង​កំណត់​និន្នាការ ស្ថានភាពជលផល រួមមានទាំង​ឧបករណ៍​សម្រាប់គ្រប់គ្រង និង​ការធ្វើរបាយការណ៍ផ្អែកលើ​ទិន្នន័យឌីជីថល​ជលផលនេះ។ 
ឯកឧត្តមរដ្ឋលេខាធិការ បានបញ្ជាក់ទៀតថា ការប្រកាសដាក់ឱ្យដំណើរ​ការ​ប្រព័ន្ធស្ថិតិជលផល គឺចំពេលវេលា និងឆ្លើយតបតាមតម្រូវការទិន្នន័យ​កាន់តែប្រសើរ និងជាក់លាក់។ ជាផ្នែក​សំខាន់​ក្នុងបណ្តុំទិន្នន័យធំ ដែលភ្ជាប់​និងបំពេញជាមួយវិស័យពាក់ព័ន្ធផ្សេងៗ។ ទិន្នន័យទាំងនេះផ្តល់ព័ត៌មាន ចាំបាច់សម្រាប់តភ្ជាប់វិស័យជលផល ​ជាមួយ​ការអភិវឌ្ឍកសិកម្ម និងការ​គ្រប់គ្រងធនធានទឹក ប្រកបដោយនិរន្តភាព ។ វិធីសាស្ត្របញ្ចូលគ្នានេះ គឺសំខាន់ណាស់ សម្រាប់ការធានាសន្តិសុខស្បៀង រយៈពេលវែង​សម្រាប់​ប្រទេសកម្ពុជា។
ជាចុងបញ្ចប់ ឯកឧត្តមរដ្ឋលេខាធិការ ក៏បានសម្តែងនូវការថ្លែងអំណរគុណ​ចំពោះសហភាពអឺរ៉ុបសម្រាប់ការគាំទ្រ ផ្នែកហិរញ្ញវត្ថុ និងភាព​ជាដៃគូ​សហការ និងដល់អង្គការ FAO សម្រាប់ជំនួយបច្ចេកទេស ក្នុងការអនុវត្តន៍​កម្មវិធី CAPFISH ជាពិសេសការអភិវឌ្ឍ និងដាក់ឱ្យដំណើរការប្រព័ន្ធ FishStat រួមជាមួយរដ្ឋបាលជលផល និងខណ្ឌរដ្ឋបាលជលផល ដែលបាន​ប្តេជ្ញាចិត្តខ្ពស់ក្នុងការសម្រេចបាននូវសមិទ្ធផលដ៏មានតម្លៃនេះ៕