ឯកឧត្តមរដ្ឋមន្ត្រី និងសហការីបានចុះមកពិនិត្យ មើលស្ថានភាពគ្រោះរាំងស្ងួតនៅភូមិវាល ឃុំដារុន ស្រុកសូត្រនិគម ខេត្តសៀមរាប

ចេញ​ផ្សាយ​ ២២ កក្កដា ២០១៩ 3748

ព្រឹកថ្ងៃអាទិត្យ ៤រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១ ខែកក្កដា ឆ្នាំ២០១៩ ឯកឧត្តមរដ្ឋមន្ត្រី និងសហការីបានចុះមកពិនិត្យ មើលស្ថានភាពគ្រោះរាំងស្ងួតនៅភូមិវាល ឃុំដារុន ស្រុកសូត្រនិគម ខេត្តសៀមរាប។ តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ បានឲ្យដឹងថាគិតមកត្រឹមថ្ងៃទី១៩ ខែកក្កដា ការងារដកស្ទូងទូទាំងខេត្តសម្រេចបានជាង ១៤១ពាន់ហត ស្នើនឹង៧៥,៧៧% នៃផែនការជាង ១៨៦ពាន់ហត។ ដោយសារអាកាសធាតុក្តៅហួតហែងបានអូសបន្លាយពេលយូ ធ្វើឲ្យប៉ះពាល់ដំណាំស្រូវក្នុងស្រុកក្រឡាញ់ ស្រុកស្រីស្នំ ស្រុកពួក និងស្រុកសូត្រនិគម សរុបជិត ៥ពាន់ហត។ ដោយឡែក ស្រុកសូត្រនិគមមានផ្ទៃដីជាង១៧០ហត កំពុងប្រឈមបញ្ហាខ្វះទឹក ប៉ុន្តែប៉ុន្មានថ្ងៃ មុនតំបន់នេះមានភ្លៀងធ្លាក់តិចតូច បណ្តាលឲ្យសន្ទូងអាចរស់ឡើងវិញបានខ្លះ ហើយសង្ឃឹមថានៅប៉ុន្មានថ្ងៃខាងមុខនឹងមានភ្លៀងធ្លាក់ជាបន្តបន្ទាប់។

នៅព្រឹកនេះ ឯកឧត្តមរដ្ឋមន្ត្រីបានណែនាំឲ្យអគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់ និងនេសាទ ត្រៀមពូជទុកបម្រុងសម្រាប់ចែកជូនកសិករ ជាពិសេសនៅតំបន់ដែលទទួលរងផលប៉ះពាល់ធ្ងន់ធ្ងរ។ មន្ទីរត្រូវចុះមកតាមដាននៅគ្រប់តំបន់រងផលប៉ះពាល់ដើម្បីរិះរកមធ្យោបាយដោះស្រាយបញ្ហាជូនកសិករឲ្យបានទាន់ពេលវេលា និងមានប្រសិទ្ធភាពដូចជាជួយឧបត្ថម្ភជាប្រេងសម្រាប់បូមទឹក ក្នុងករណីមានប្រភពទឹក និងគ្រាប់ពូជក្នុងករណីត្រូវការស្តារឡើងវិញ។