ឯកឧត្តមបណ្ឌិតរដ្ឋលេខាធិការ យ៉ង សាំងកុមារ អញ្ជើញដឹកនាំក្រុមការងារ ចុះតម្រង់ទិសដល់មន្ត្រីកសិកម្មឃុំ នៅតំបន់មេគង្គក្រោម ក្នុងខេត្តចំនួន៣

ចេញ​ផ្សាយ​ ១៥ មីនា ២០២៥ 299

ចាប់ពីថ្ងៃទី១២ ដល់ថ្ងៃទី១៤ ខែមីនា ឆ្នាំ២០២៥ ឯកឧត្តមបណ្ឌិតរដ្ឋលេខាធិការ យ៉ង សាំងកុមារ អមដំណើរដោយ ឯកឧត្តម ខាត់ សុធី អនុរដ្ឋលេខាធិការ រួមជាមួយមន្ត្រី​នៃនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ បានចុះគាំទ្រ តម្រង់ទិស​ការអនុវត្តន៍ការងាររបស់មន្ត្រីកសិកម្មឃុំ-សង្កាត់ទាំងចាស់ ទាំងថ្មី នៅតំបន់​មេគង្គ​ក្រោម ក្នុងខេត្តចំនួន៣ មានខេត្តកណ្តាល ខេត្តស្វាយ​រៀង និងខេត្តព្រៃវែង។ក្នុងនោះខេត្តកណ្តាល ដែលមានមន្ត្រីកសិកម្មឃុំសរុបទាំងចាស់ ថ្មីចំនួន៧០នាក់ ខេត្តស្វាយរៀង ចំនួន៦៨នាក់ និងខេត្តព្រៃវែងចំនួន៩០នាក់។

នាឱកាសនៃវគ្គបណ្តុះបណ្តាលតម្រង់ទិសនោះ ឯកឧត្តមបណ្ឌិត យ៉ង សាំង កុមារ បានលើកឡើងអំពី៖១. យុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាល​នីតិកាលទី៧ ២.គោលនយោបាយអាទិភាពទាំង៦ ជាពិសេសគោល​នយោបាយ​អាទិភាពទី៥ទី៦ ៣. តួនាទីភារកិច្ចមន្ត្រីកសិកម្មឃុំសង្កាត់។

ជាមួយគ្នានោះដែរ ឯកឧត្តមបណ្ឌិតរដ្ឋលេខាធិការ បានលើកទឹកចិត្តដល់មន្ត្រីកសិកម្ម​ឃុំទាំងចាស់ថ្មី បំពេញការងារនៅមូលដ្ឋានឱ្យបានល្អ សហការជាមួយភាគីពាក់ព័ន្ធ សំដៅ​ធ្វើយ៉ាងណាបម្រើកសិករ ដោយស្មោះត្រង់ សម្រេចបាននូវការបង្កើនប្រាក់​ចំណេញ​ខ្ពស់​ពីវិស័យកសិកម្ម ដើម្បីចក្ខុវិស័យ កម្ពុជាក្លាយជាប្រទេសមាន​ចំណូលមធ្យមកម្រិត​ខ្ពស់​​​​​​ឆ្នាំ២០៣០ និងក្លាយជាប្រទេសមានចំណូលខ្ពស់​ឆ្នាំ២០៥០។ សូមបញ្ជាក់ថា គិត​មក​ត្រឹមថ្ងៃទី១៤ ខែមីនា ឆ្នាំ២០២៥ នេះ ដំណើរការចុះតម្រង់ទិស ដល់មន្ត្រីកសិកម្មឃុំថ្មី អនុវត្តបាន១៥ខេត្តរួចហើយ៕