Other News
ឯកឧត្តមរដ្ឋមន្ត្រីចុះពិនិត្យការធ្វើស្រែបង្ហាញពូជស្រូវ១០មុខ និងពិនិត្យការងារសហគមន៍កសិកម្មរស្មីកសិករ
ចេញផ្សាយ ២២ មករា ២០១៨ 2836
កាលពីថ្ងៃទី១៩ ខែសីហា ឆ្នាំ២០១២ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយថ្នាក់ដឹកនាំក្រសួង នាយកដ្ឋានជំនាញ និងមន្ទីរកសិកម្មខេត្តពោធិ៍សាត់ បានចុះពិនិត្យការងារសហគមន៍អភិវឌ្ឍន៍កសិកម្មរស្មីកសិករលើការធ្វើស្រែបង្ហាញពូជស្រូវ១០ និងជួបជាមួយកសិករ២៧រូប នៅភូមិសំបួរ ឃុំស្យា ស្រុកកណ្តៀង។
សហគមន៍អភិវឌ្ឍន៍កសិកម្មរស្មីកសិករ ត្រូវបានសម្របសម្រួលបង្កើតទ្បើង ដោយគម្រោងស្តីពីការចុះបញ្ជីនិងពង្រឹងសមត្ថភាពសហគមន៍កសិកម្មនៅកម្ពុជា ដែលគាំទ្រដោយថវិកាកម្មវិធីហិរញ្ញប្បទានទ្រទ្រង់សម្រាប់ប្រតិបត្តិការគាំទ្រកសិកម្មខ្នាតតូចនិងការគាំពារសង្គម។ គម្រោងនេះត្រូវបាន អនុវត្តដោយអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ សហការជាមួយក្រសួងសេដ្ឋកិច្ច និងហិរញ្ញវត្ថុ។
សហគមន៍អភិវឌ្ឍន៍រស្មីកសិករត្រូវបានបង្កើតទ្បើងដោយកសិករស្ម័គ្រចិត្តចំនួន៤១នាក់ដែលក្នុងនោះមាននារីចំនួន៣៣នាក់ និងត្រូវបានចុះបញ្ជីទទួលស្គាល់ដោយមន្ទីរកសិកម្មខេត្តពោធិ៍សាត់នៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២១ ខែមីនា ឆ្នាំ២០១។
កសិករបានឯកភាពគ្នាបង្កើតសហគមន៍កសិកម្មរស្មីកសិករនេះទ្បើង ក្នុងគោលបំណងប្រកបមុខរបរសំខាន់ៗមួយចំនួនដូចជា ធ្វើផលិតកម្មកសិកម្ម កែច្មៃកសិកផល ផ្គត់ផ្គង់ធាតុចូលកសិកម្ម ផ្តល់សេវាកម្មគាំទ្រកសិដ្ឋានមានដូចជា ផលិតពូជស្រូវសម្រាប់លក់ ស្វែងរកទីផ្សារកសិកម្ម ផ្តល់សេវាកម្មឥណទាន និងសន្សំដល់សមាជិកសហគមន៍។
បច្ចុប្បន្នសហគមន៍កសិកម្មរស្មីកសិករ កំពុងផលិតពូជស្រូវផ្កាចន្ទ័សែនសរ ផ្ការមៀត ផ្ការរំដេង និងផ្ការំដួល ដែលជាពូជស្រូវសម្រាប់នាំចេញដើម្បីផ្សព្វផ្សាយដល់កសិករជាសជិក និងកសិករមិនជាសមាជិកសហគមន៍ ។ ក្រៅពីការផលិតពូជស្រូវសម្រាប់ផ្សព្វផ្សាយដល់កសិករ សហគមន៍កសិកម្មរស្មីកសិករ ក៏កំពុងផ្តល់សេវាកម្មគាំទ្រកសិដ្ឋានមួយចំនួនទៀតដល់កសិករជាសមាជិក មានដូចជា ការផ្តល់សេវាកម្មឥណទាន និងការផ្គត់ផ្គង់ជី។
ក្នុងឆ្នាំ២០១២នេះ សហគមន៍អភិវឌ្ឍន៍កសិកម្មរស្មីកសិករ មានដើមទុនសរុបចំនួន៣,៧០២,០០០រៀល ដែលបានមកពីការជាវភាគហ៊ុនរបស់កសិករជាសមាជិកចំនួន៤១នាក់ ចំនួន១.៦២០.០០០រៀល ប្រាក់សមាជិកភាពចំនួន៨២.០០០រៀល និងការគាំទ្រទុនពីគម្រោងចំនួន ២.០០០.០០០ រៀល។
ឯកឧត្តមរដ្ឋមន្ត្រី បានសម្តែងនូវការកោតសរសើរចំពោះការខិតខំរបស់សមាជិកសហគមន៍អភិវឌ្ឍន៍កសិកម្មរស្មីកសិករក្នុងការងារផលិតកម្មកសិកម្ម និងបានណែនាំឱ្យយកចិត្តទុកដាក់រៀបចំដី បង្កើនការប្រើប្រាស់ជីធម្មជាតិ និងថែទាំស្រែឱ្យបានប្រសើរ។
ឆ្លៀតក្នុងឱកាសនេះដែរ ឯកឧត្តមរដ្ឋមន្ត្រីក៏បានចុះពិនិត្យសន្និធិស្រូវពូជ១៣៧តោនរបស់មន្ទីរកសិកម្មខេត្ត ដើម្បីត្រៀមលក្ខណៈគ្រោះទឹកជំនន់នាពេលខាងមុខនេះ៕
