ព័ត៌មានផ្សេងៗទៀត
អំពាវនាវឱ្យកសិករចិញ្ចឹមសត្វកុំលែងដូចទម្លាប់ចាស់
ចេញផ្សាយ ១៥ មករា ២០១៨ 3757
លោករដ្ឋមន្ត្រីក្រសួងកសិកម្ម ច័ន្ទ សារុន បានអំពាវនាវដល់ប្រជាជនក៏ដូចជាមន្ត្រី របស់លោកឱ្យចូលរួមធ្វើការផ្លាស់ប្ដូរទម្លាប់របស់កសិករ ពីការចិញ្ចឹមសត្វដោយលែងឱ្យដើរពាសវាល ពាសកាល មកជាការចិញ្ចឹមដោយថែ ទាំមិនលែងតទៅទៀត។ ពេទ្យសត្វភូមិជាមុខសញ្ញាសកម្មដែល ត្រូវធ្វើកិច្ចការនេះ។
ខណៈនៃការជួបជាមួយភ្នាក់ងារសុខភាពសត្វភូមិ ចំនួន៦ស្រុក នៅក្នុង ខេត្តកំពង់ធំ លោករដ្ឋ មន្ត្រីក្រសួងកសិកម្ម បានលើកឡើងពីសារសំខាន់របស់ភ្នាក់ងារសុខភាពសត្វភូមិ ដែលជាអ្នកអាចធ្វើ ឱ្យមានការប្រែប្រួលនូវផលិត កម្មកសិកម្ម ដែលក្នុងនោះមាន វិស័យចិញ្ចឹមសត្វជាដើម។ លោកបានបន្តទៀតថា វាជាការងារមួយដ៏លំបាកក្នុង ការបណ្តុះបណ្តាលពេទ្យសត្វភូមិ ដូច្នេះមិនត្រូវឱ្យសមិទ្ធផលនេះរលាយទៅវិញទេ។ យើងមានសន្តិសុខហើយដូច្នេះត្រូវតែធានាសន្តិសុខស្បៀងឱ្យបាន។ ជាមួយ គ្នានេះពេទ្យសត្វភូមិដើរតួនាទីយ៉ាងសំខាន់ក្នុងបញ្ហានេះ។
លោករដ្ឋមន្ត្រីបានផ្តោតជាសំខាន់ទៅលើការកែទម្រង់ក្នុងការចិញ្ចឹមសត្វដោយឈប់ចិញ្ចឹម សត្វឱ្យដើរពាសវាពាសកាល។ លោកបានមានប្រសាសន៍ថា ដើម្បីកែទម្រង់ការចិញ្ចឹមសត្វនេះបាន គឺយើងត្រូវធ្វើការកែប្រែពូជដោយយើងអាចអនុវត្តការបង្កាត់ពូជសប្បនិម្មិត។ ត្រូវដាំចំណីសត្វដោយ ឈប់លែងសត្វឱ្យដើរពាសវាលពាសកាល ហើយត្រលប់មកចិញ្ចឹមសត្វក្នុងទ្រង់ឬក្នុងក្រោលវិញ។ ព្រោះការលែងសត្វឱ្យដើរពាសវាលពាសកាលវាមិនត្រឹមតែបង្កឱ្យឆ្លងជំងឺរាតត្បាតប៉ុណ្ណោះទេ តែវា ថែមទាំងបង្កឱ្យមានគ្រោះថ្នាក់ចរាចរណ៍ទៀតផង។ ដើម្បីចិញ្ចឹមសត្វនៅក្នុងទ្រុងយើងត្រូវមានចំណី គ្រប់គ្រាន់ដូច្នេះសូមឱ្យភ្នាក់ងារពេទ្យសត្វភូមិដាំចំណីសត្វឱ្យបានច្រើនដើរមុខគេក្នុងបញ្ហានេះ។
លោកបានណែនាំឱ្យភ្នាក់ងារសុខភាពសត្វភូមិត្រូវធ្វើការងារបន្ទាន់មួយចំនួនដែលក្នុងនោះ ត្រូវក្ដាប់ឱ្យបាននូវស្ថិតិសត្វគ្រប់ប្រភេទក្នុងភូមិ។ ប្រសិនបើមានត្រូវក្ដាប់ឱ្យបាននូវស្ថិតិកសិដ្ឋានក្នុង ភូមិដូចជា ប្រភេទសត្វក្នុងកសិដ្ឋាន ចំនួនសត្វក្នុងកសិដ្ឋានជាដើម។ ត្រូវចាប់យកមុខរបរណាមួយឱ្យ ច្បាស់ជាពេទ្យសត្វភូមិដូចជាការដាំស្មៅ ការលក់ថ្នាំសត្វ។ល។ ត្រូវមានបញ្ជីច្បាស់លាស់ពីការចាក់ថ្នាំសត្វ។ ត្រូវដឹងឱ្យច្បាស់ពីចរាចរណ៍សត្វនៅក្នុងភូមិ។ ត្រូវខិតខំរៀនសូត្របន្ថែមទៀត។
លោករដ្ឋមន្ត្រីក៏បានស្នើឱ្យមន្ត្រីកសិកម្មខេត្តខិតខំបណ្តុះបណ្តាលពេទ្យសត្វភូមិឱ្យបានចប់គ្រប់ ស្រុកទូទាំងខេត្តនៅក្នុងឆ្នាំនេះ ហើយជំរុញយ៉ាងណាឱ្យភ្នាក់ងារពេទ្យសត្វភូមិនេះក្លាយទៅជាភ្នាក់ងារ ផ្សព្វផ្សាយកសិកម្មភូមិ។ មន្ទីរកសិកម្មខេត្តត្រូវពិនិត្យមើលអ្នកដែលមានសមត្ថភាពដើម្បីឱ្យគេបន្តការ សិក្សាថ្នាក់មធ្យម ឬថ្នាក់បរិញ្ញា ជាពិសេសពិនិត្យនិងលើកទឹកចិត្តបេក្ខភាពនារី។ លោករដ្ឋមន្ត្រីបាន ណែនាំប្រធានមន្ទីរកសិកម្មខេត្តឧស្សាហ៍ឱ្យពេទ្យសត្វភូមិបានជួបជុំគ្នាដើម្បីផ្លាស់ប្ដូរបទពិសោធន៍ពី គ្នាទៅវិញទៅមក។ លោកបានបញ្ជាក់ថា ភ្នាក់ងារសុខភាពសត្វភូមិមានសារៈសំខាន់ណាស់ ព្រោះបើ យើងមើលរចនាសម្ព័នរបស់ក្រសួង គឺយើងមានត្រឹមតែថ្នាក់ស្រុកប៉ុណ្ណោះ គឺយើងអត់មានបណ្ដាញ ដល់ភូមិឃុំទេ។ ដូច្នេះភ្នាក់ងារសុខភាពសត្វភូមិមានសារសំខាន់ណាស់នៅជនបទ៕
