ព័ត៌មានផ្សេងៗទៀត
ឃុំគូសមានផ្លូវលំមួយខ្សែថ្មីប្រវែងជិត២គីឡូម៉ែត្រ
ចេញផ្សាយ ១៦ មករា ២០១៨ 4263
ផ្លូវលំមួយខ្សែប្រវែង ១.៨៨៥ម៉ែត្រ ស្ថិតនៅឃុំគូស ស្រុកត្រាំកក់ ត្រូវបានសម្ពោធកាលពីថ្ងៃអាទិត្យ ទី៨ ខែសីហា កន្លងមកនេះ ក្រោមការអញ្ជើញចូលរួម ពីសំណាក់ ឯកឧត្ដមបណ្ឌិត ច័ន្ទសារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ និងមន្ដ្រីក្រុមការងាររបស់ឯកឧត្ដម ។
តាមការបញ្ជាក់របស់អាជ្ញាធរឃុំ បានឱ្យដឹងថា ផ្លូវលំមួយខ្សែថ្មីនេះឆ្លងកាត់ភូមិចំនួន៤ដែលក្នុងនោះ មានភូមិតាលាក់ខាងជើង តាលាក់ខាងត្បូងត្រពាំងថ្ម និងភូមិក្រាំងតាចាន់។
ផ្លូវនេះត្រូវបានជួយដោយ ឯកឧត្ដមរដ្ឋមន្ដ្រីកសិកម្ម និងមន្ដ្រីក្រុមការងារគណបក្សប្រជាជន។ មានប្រសាសន៏នៅក្នុងឱកាសនោះ ឯកឧត្ដមបណ្ឌិត ច័ន្ទ សារុន បានធ្វើការកត់សម្គាល់ ពីភាពប្រែប្រួលកាន់តែច្រើនឡើងៗ ពីមួយថ្ងៃទៅមួយថ្ងៃនៅទីនោះ ក៏ដូចជានៅទីកន្លែងផ្សេងទៀតនៅស្រុកត្រាំកក់ បើនិយាយដោយឡែក។
ឯកឧត្ដម សំណូមពរឱ្យប្រជាជនអាជ្ញាធរមូលដ្ឋានរួមគ្នាជាមួយមន្ដ្រីក្រុមការងារ ដើម្បីធ្វើការអភិវឌ្ឍន៏លើគ្រប់វិស័យនៅមូលដ្ឋាន។
ឯកឧត្ដមរដ្ឋមន្ដ្រី បានពន្យល់ប្រាប់អ្នកភូមិដែលមកចូលរួមយ៉ាងច្រើនកុះករ អំពីសារប្រយោជន៏នៃផ្លូវគមនាគមន៏នៅជនបទ ដែលជាសរសៃឈាម និងជាការតភ្ជាប់ទំនាក់ទំនង ពីកន្លែមួយទៅកន្លែងមួយ ពីជនបទទៅទីក្រុង។ មានផ្លូវបានផ្ដល់ផលប្រយោជន៏ទាំងនយោបាយ ទាំងសេដ្ឋកិច្ចផង និងសាសនាផងព្រមទាំងវិស័យដទៃទៀត។
ឯកឧត្ដមបានបញ្ជាក់ថា ផ្លូវជាបុរេលក្ខខណ្ឌការកសាងប្រទេស ហើយដែលប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន បានយកចិត្ដទុកដាក់បំផុត ។ ឯកឧត្ដម ក៏បានស្នើឱ្យមានការដាំដើមឈើ អមសងខាងផ្លូវលំថ្មីនេះ ជាមួយនឹងការថែទាំឱ្យបានល្អ ប្រយោជន៏ដើម្បីប្រើប្រាស់បានយូរអង្វែង ។
នៅក្នុងពីធីនេះឯកឧត្ដមរដ្ឋមន្ដ្រី ក៏បានផ្ដល់នូវការរំលឹកមួយចំនួន ដល់កសិករទាក់ទងទៅនឹងដល់ការធ្វើស្រែ ដែលក្នុងនៅគឺការត្រូវប្រើពូជស្រូវស្រាលស្រូវកណ្ដាលការទៅពិនិត្យមើលស្រែឱ្យបានរាល់ថ្ងៃការគ្រប់គ្រងទឹកពង្រឹងភ្លឺឱ្យបានល្អ ៕
