Other News
ឯកឧត្តមរដ្ឋមន្ត្រីចុះពិនិត្យការបូមទឹកសង្គ្រោះនៅស្ថានីយ៍បូមទឹក ហ៊ុន សែន ទី៤៨ និងការផលិតពូជស្រូវនៅស្ថានីយ៍កសិកម្ម ទួលល្ពៅ
ចេញផ្សាយ ២២ មករា ២០១៨ 4188
កាលពីថ្ងៃទី១៩ ខែសីហា ឆ្នាំ២០១២ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយថ្នាក់ដឹកនាំក្រសួង នាយកដ្ឋានជំនាញ និងមន្ទីរកសិកម្មខេត្តពោធិ៍សាត់ បានចុះពិនិត្យការបូមទឹកសង្គ្រោះស្រូវវស្សា នៅស្ថានីយបូមទឹកហ៊ុន សែនទី៤៨ នៅភូមិស្រែពពាយ ឃុំសន្ត្រែ ស្រុកភ្នំក្រវាញ និងការផលិតពូជស្រូវ១០មុខរបស់គម្រោង APPP (JICA) នៅស្ថានីយ៍ពិសោធន៍កសិកម្មទួលល្ពៅ ក្នុងភូមិពធ្លាក់ ឃុំស្វាយអាត់ ក្រុងពោធិ៍សាត់។
តាមសេចក្តីរាយការណ៍របស់មន្ទីរកសិកម្មខេត្តពោធិ៍សាត់ ស្ថានីយបូមទឹកហ៊ុន សែនទី៤៨ មានលទ្ធភាពបូមទឹកស្រោចស្រពផ្ទៃដី១ ៥០០ហិកតា ដែលបច្ចុប្បន្ននេះស្ថានីយ៍បាន និងកំពុងបូមទឹកសង្គ្រោះស្រូវក្នុងឃុំសន្ត្រៃ ឃុំលាច និងឃុំរកាត បានចំនួន ៣៦០ហិកតាហើយ។
ដោយឡែកស្ថានីយ៍ពិសោធន៍កសិកម្មទួលល្ពៅ បច្ចុប្បន្នកំពុងតែពិសោធន៍ និងផលិតពូជ។ ស្ថានីយ៍នេះមានទំហំ៤,៥ហិកតា បានដំណើការធ្វើបង្ហាញពូជទាំង១០មុខ ដែលក្នុងមួយមុខលើផ្ទៃដី២០០ម។ ជាលទ្ធផលស្ថានីយ៍រំពឹងថា នឹងទទួលបានទិន្នផលសរុប ០,៩តោនលើផ្ទៃដីសរុបទាំង២ ០០០ម។ ជាមួយនេះដែរ ស្ថានីយ៍ក៏បានផលិតពូជផ្ការំដួលលើផ្ទៃដី១,៥ហិកតា ដោយរំពឹងថា នឹងទទួលបានទិន្នផលសរុប ៤តោន ដែលពូជទាំងនេះក្រៅពីទុកប្រើប្រាស់បន្តក្នុងស្ថានីយ៍ នឹងត្រូវបានលក់ចែកជូនប្រជាកសិករដើម្បីជាការផ្សព្វផ្សាយពូជបន្ត។
ក្នុងឱកាសនោះដែរ ឯកឧត្តមរដ្ឋមន្ត្រីបានណែនាំមន្ត្រីពិសោធន៍ឱ្យយកចិត្តទុកដាក់លើការងារពិសោធន៍ ជម្រុញការប្រើប្រាស់ជីធម្មជាតិ បង្កើនការយកចិត្តទុកដាក់លើការរៀបចំដី និងត្រូវថែរក្សាស្រែឱ្យបានល្អប្រសើរ៕
