Other News
ឯកឧត្តមរដ្ឋមន្ត្រី ឌិត ទីណា ចូលរួមប្រជុំត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា
ចេញផ្សាយ ០៤ មេសា ២០២៣ 3024
នៅថ្ងៃទី០៤ ខែមេសា ឆ្នាំ២០២៣ ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមប្រជុំត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា នៅសាលប្រជុំសាលាស្រុកជើងព្រៃ ខេត្តកំពង់ចាម។
ក្នុងកិច្ចប្រជុំត្រួតពិនិត្យនេះ ឯកឧត្តមរដ្ឋមន្ត្រី បានណែនាំដល់អាជ្ញាធរមូលដ្ឋានត្រូវយល់ឱ្យបានច្បាស់រវាងការចុះមូលដ្ឋានបក្ស និងការងារចុះមូលដ្ឋានរដ្ឋាភិបាល។ សម្រាប់ការងាររដ្ឋាភិបាល មេឃុំត្រូវចុះជួប ក្នុងការងារមូលដ្ឋានវិស័យកសិកម្ម និងត្រួតពិនិត្យមើលនូវគោលនយោបាយណាដែលឃុំមិនទាន់បានធ្វើ និងត្រូវត្រៀមដំណោះស្រាយសមស្របជាក់ស្តែង ជាពិសេសសំណូមពរពលរដ្ឋ។ ការងារនេះ គឺត្រូវជំរុញ និងធ្វើយ៉ាងណាឱ្យសេដ្ឋកិច្ចប្រជាពលរដ្ឋមានភាពរីកចម្រើន ព្រមទាំងជួយដល់វិស័យកសិកម្ម។ លើសពីនេះទៀត មេភូមិ មេឃុំ ត្រូវចេះរាយការណ៍ពីការអនុវត្តគោលនយោបាយកសិកម្ម និងបញ្ហាប្រឈមដែលកើតមានឡើង ដើម្បីក្រសួងបានដឹង និងដោះស្រាយបានទាន់ពេលវេលានិងមានប្រសិទ្ធភាព។
បើតាម ឯកឧត្តមរដ្ឋមន្ត្រី អាជ្ញាធរមូលដ្ឋានត្រូវពិនិត្យគោលនយោបាយដែលមានស្រាប់ ហើយមិនទាន់ធ្វើ និងត្រូវធ្វើវាឱ្យមានប្រសិទ្ធភាព ដោយត្រូវរួមគ្នាធ្វើការជំរុញវិស័យកសិកម្មឱ្យមានការអភិវឌ្ឍ មានភាពប្រសើរឡើងគ្រប់រដូវ ដោយត្រូវពិនិត្យវាយតម្លៃឱ្យបានច្បាស់លាស់គ្រប់ជ្រុងជ្រោយ ដើម្បីជួយដោះស្រាយដល់ប្រជាពលរដ្ឋឱ្យមានជីវភាពប្រសើរ និងមាននិរន្តរភាពសេដ្ឋកិច្ច។
មួយវិញទៀត មន្ត្រីកិច្ចសន្យាភូមិ ឃុំ ត្រូវរាយការណ៍អ្វីដែលត្រូវដោះស្រាយបន្ទាន់ និងត្រូវដោះស្រាយជាក់ស្តែង ហើយសហគមន៍ណាដែលមិនមានប្រសិទ្ធភាព ត្រូវរំលាយចោល ជំនួសដោយការបង្កើតសហគមន៍ថ្មីប្រកបដោយភាពច្បាស់លាស់ និងប្រសិទ្ធភាពពិតប្រាកដ។ ការកសាងជីវភាពប្រជាជន គឺកេីតចេញពីការកសាងមនុស្សល្អៗក្នុងសង្គមឱ្យបានច្រេីន ហេីយមនុស្សខូចត្រូវកែខ្លួនទៅជាមនុស្សល្អ ទេីបមានការកែប្រែជីវភាពល្អប្រសេីរ ហេីយការងារនេះក៏ជាយុទ្ធសាស្រ្តក្នុងគោលនយោបាយថ្មីផងដែរ។
បន្ទាប់ពីកិច្ចប្រជុំពិនិត្យលើការអនុវត្តគោលនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ឯកឧត្តមរដ្ឋមន្ត្រី ក៏បានចុះស្វែងយល់ និងសិក្សាបន្ថែមអំពីប្រឡាយទឹកក្នុងមូលដ្ឋាននៃស្រុកជើងព្រៃផងដែរ៕
