ថ្នាក់ដឹកនាំក្រសួងកសិកម្ម ដឹកនាំកិច្ចប្រជុំពិនិត្យ និងវាយតម្លៃវឌ្ឍនភាពគម្រោង ដើម្បីធានាប្រសិទ្ធភាព និងតម្លាភាពក្នុងការផ្តល់ផលប្រយោជន៍ជូនប្រជាពលរដ្ឋ នៅខេត្តបន្ទាយមានជ័យ

ចេញ​ផ្សាយ​ ២៤ សីហា ២០២៦ 4110

នៅថ្ងៃទី២៤ ខែសីហា ឆ្នាំ២០២៦ ឯកឧត្តម ស្រី វុឌ្ឍី អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ និងជាប្រធានអនុវត្តគម្រោង​លើក​កម្ពស់ជីវភាព ប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយ​រងគ្រោះ និងពង្រឹងភាពធន់ (EMPOWER) ប្រចាំក្រុងសិរីសោភ័ណ បានដឹកនាំកិច្ចប្រជុំពិភាក្សាអំពីវឌ្ឍនភាព និងការវាយតម្លៃលើការអនុវត្តគម្រោង (EMPOWER) នៅសាលប្រជុំមន្ទីរកសិកម្មខេត្តបន្ទាយមានជ័យ។
កិច្ចប្រជុំនេះមានការអញ្ជើញចូលរួមពី លោកស្រី អន ស៊ីថា ប្រធានស្តីទីមន្ទីរ​កសិកម្ម រុក្ខាប្រមាញ់ និងនេសាទ និងប្រធានអនុវត្តគម្រោងថ្នាក់ខេត្ត លោក អ៊ឹម សុភារៈ អភិបាលរងនៃគណៈអភិបាលក្រុងសិរីសោភ័ណ អ្នកសម្របសម្រួល​គម្រោ​ងថ្នាក់ស្រុក មន្ត្រីការិយាល័យក្សេត្រសាស្ត្រ និងផលិតភាពកសិកម្ម មន្ត្រី​ការិយាល័យផលិតកម្ម និងបសុព្យាបាល ព្រមទាំងក្រុមប្រឹក្សាសង្កាត់ និង​មន្ត្រី​កសិកម្មសង្កាត់ពាក់ព័ន្ធ រួមមាន៖ សង្កាត់កំពង់ស្វាយ ភ្នៀត និងម្កាក់។
គោលបំណងនៃកិច្ចប្រជុំនដោយផ្តោតសំខាន់លើការពិនិត្យ និងវាយតម្លៃវឌ្ឍនភាព​នៃការអនុវត្តគម្រោង ជាពិសេសលើលទ្ធផលនៃការវាយតម្លៃអ្នកទទួលផល​ដែលជាប្រជាពលរដ្ឋក្រីក្រ កម្រិត១ (ក្រ១) កម្រិត២ (ក្រ២) និងអ្នកមាន​ប័ណ្ណសមធម៌ ឬប័ណ្ណងាយរងហានិភ័យ។ តាមលទ្ធផលនៃការវាយតម្លៃ មាន​គ្រួសារចំនួន៥០០គ្រួសារ ដែលបានបំពេញតាមលក្ខខណ្ឌ និងមានសិទ្ធិទទួល​ផលពីគម្រោង ខណៈដែលគ្រួសារមានចំនួន ២២៩ គ្រួសារមិនបានបំពេញតាមលក្ខខណ្ឌ​ដែល​បានកំណត់សម្រាប់ការទទួលផលពីគម្រោង។
ជាមួយគ្នានោះដែរ អង្គប្រជុំបានជជែកពីការស្នើសុំការចូលរួម និងកិច្ចសហការ​ពីអាជ្ញាធរឃុំសង្កាត់ ក្នុងការជ្រើសរើសជនបង្គោលតាមភូមិ ស្របតាមមុខរបរ​នីមួយៗ និងលក្ខខណ្ឌដែលបានកំណត់។ ការងារ នេះនឹងអនុវត្តដោយមានការ​សម្របសម្រួល និងចូលរួមពី CAO និង DC នៅតាមសង្កាត់នីមួយៗ ដើម្បី​ធានាឱ្យការជ្រើសរើសជនបង្គោលមានភាពត្រឹមត្រូវ តម្លាភាព និងឆ្លើយតប​បា​នទៅនឹងតម្រូវការជាក់ស្តែងរបស់ប្រជាពលរដ្ឋ៕