ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីក្នុងពិធីផ្សព្វផ្សាយច្បាប់ស្តីពី សុខភាពសត្វ និងផលិតកម្មសត្វ

ចេញ​ផ្សាយ​ ១៣ កុម្ភៈ ២០១៨ 3351

នៅព្រឹកថ្ងៃទី ០១ ខែសីហា ឆ្នាំ២០១៦  នៅសាលប្រជុំសណ្ឋាគារ អាំងទែរកុងទីណង់តាល់ រាជធានីភ្នំពេញ ក្រសួងកសិកម្ម រុក្ខាប្រមាញ់ និងនេសាទ ក្រោមកិច្ចសហការ និងសម្របសម្រួលពីអង្គការស្បៀងនិងកសិកម្មនៃសហប្រជាជាតិ (FAO) បានរៀបចំពិធីផ្សព្វផ្សាយច្បាប់ស្តីពីសុខភាពសត្វ និងផលិតកម្មសត្វ ក្រោមអធិបតីភាព ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ហើយនិង ឯកឧត្តម លោកជំទាវ លោក លោកស្រី ជាថ្នាក់ដឹកនាំក្រសួងក្រសួងកសិកម្ម រុក្ខាប្រមាញ់ និងនេសាទ អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ និងមន្ទីរកសិកម្ម រាជធានី ខេត្ត ក្រសួងស្ថាប័នពាក់ព័ន្ធ អង្គការជាតិ និងអន្តរជាតិដៃគូអភិវឌ្ឍន៍ និងអង្គការក្រៅរដ្ឋាភិបាលជាច្រើនរូប។

បន្ទាប់ពីកិច្ចស្វាគមន៍របស់លោកប្រធាននាយកដ្ឋានផលិតកម្ម និងបសុព្យាបាលរួមមក លោក Alexandre Huynh តំណាងអង្គការ FAO ប្រចាំកម្ពុជាបានថ្លែងអបអរចំពោះរាជរដ្ឋាភិបាលកម្ពុជា ជាពិសេល ក្រសួងកសិកម្ម រុក្ខាប្រមាញ់ និងនេសាទ ដែលបានរៀបចំច្បាប់នេះឡើងដែលបានទទួលបានការអនុម័តដោយរដ្ឋសភាជាតិ ព្រឹទ្ធសភា និងត្រូវបានឡាយព្រះហស្ថលេខា ដោយព្រះមហាក្សត្រនៃព្រះរាជាណាចក្រកម្ពុជា ។ លោកបានគូសបញ្ជាក់ពីសារៈសំខាន់នៃច្បាប់នេះដែលជាឧបករណ៍គតិយុត្តផ្តល់អត្ថប្រយោជន៍ជាច្រើនដល់ប្រទេសកម្ពុជា ក្នុងក្របខណ័្ឌនៃការអនុវត្តច្បាប់ទាំងក្នុងប្រទេស ថ្នាក់តំបន់ និងពិភពលោក ។ លោក Alexandre Huynh ក្នុងនាមតំណាងអង្គការ FAO ក៏បានបញ្ជាក់ពីការត្រៀមខ្លួនជាស្រេចដើម្បីបន្តគំនិត និងធនធានដែលមានសម្រាប់គាំទ្រដល់នាយកដ្ឋានផលិតកម្ម និងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ ក្នុងការរៀបចំលិខិតគតិយុត្តមួយចំនួនទៀតសម្រប់ជួយសម្រួលដល់ការអនុវត្តច្បាប់នេះឲ្យកាន់តែមានប្រសិទ្ធភាព

ក្នុងឱកាសដ៏ថ្លៃថ្លានៃពិធីផ្សព្វផ្សាយច្បាប់ស្តីពីសុខភាពសត្វ និងផលិតកម្មសត្វ ឯកឧត្តមរដ្ឋមន្ត្រី ក្រសួងកសិកម្ម រុក្ខាប្រមាញ់និងនេសាទ បានគូសបញ្ជាក់ថាច្បាប់នេះគឺជាសមិទ្ធផលថ្មីមួយទៀតក្នុងការអភិវឌ្ឍន៍ក្របខ័ណ្ឌកតិយុត្ត ដូចមានចែងក្នុងយុទ្ធសាស្រ្តចតុកោណដំណាក់កាលទី៣ របស់រាជរដ្ឋាភិបាលនីតិកាលទី៥នៃរដ្ឋសភា។ ដំណើរការកសាងច្បាប់នេះបានប្រើរយៈពេលវែង ពោលគឺរាប់ពីឆ្នាំ២០០៩ មកម្ល៉េះ ហើយដែលត្រូវបានអនុម័តដោយរដ្ឋសភានៅចុងឆ្នាំ២០១៥ និងព្រឹទ្ធសភានៅខែមករា ឆ្នាំ២០១៦ ហើយត្រូវបានព្រះករុណាព្រះបាទសម្តេចព្រះមរបនាត នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាឡាយព្រះហស្ថលេខាដាក់ឱប្រើប្រាស់ជាផ្លូវការ កាលពីថ្ងៃទី២៨ ខែមករា ឆ្នាំ២០១៦។

 ឯកឧត្តមរដ្ឋមន្ត្រីបានជំរាបថា ច្បាប់ស្តីពីសត្វ និងផលិតកម្មសត្វមាន២២ជំពូក និង ១២៤មាត្រា បានកំណត់នូវគោលបំណង និងគោលដៅសំខាន់ៗដូចតទៅ៖

ទី១. ធ្វើទំនើបកម្មសេវាការពារសុខភាពសាធារណៈ សុខភាពមនុស្ស សុខុមាលភាពសត្វ និងសម្រួលពាណិជ្ជកម្មសត្វ ផលិតផលសត្វប្រកបដោយសុវត្ថិភាព និងមានប្រសិទ្ធភាព។

ទី២. បម្រើឲ្យការនាំចេញ នាំចូល នាំឆ្លងកាត់ និងចរាចរក្នុងស្រុកនូវសត្វ និងផលិតផលសត្វ ចំណីសត្វ  និងបសុឱសថប្រព្រឹត្តទៅដោយសុវត្ថិភាព ស្របតាមបទដ្ឋានអន្តរជាតិ និងកិច្ចព្រមព្រៀងអនាម័យ និងភូតគាមអនាម័យឆ្លើយតបទៅនឹងកាតព្វកិច្ចកម្ពុជា ជាសមាជិកអង្គការ WTO OIE និងសមាហរណកម្ម សង្គម សេដ្ឋកិច្ចអាស៊ាន។

ទី៣. លើកកម្ពស់ការចិញ្ចឹមសត្វ ឆ្លើយតបទៅនឹងតម្រូវការម្ហូបអាហារ ផលិតផលសត្វ ធានាគុណភាព សុវត្ថិភាព សម្រាប់ទីផ្សារក្នុងស្រុក និងជំរុញការនាំចេញសត្វ និងផលិតផលសត្វ។

ទី៤. ការពារធនធានសេនេទិច និងពូជសត្វរបស់ជាតិ ព្រមទាំងលើកទឹកចិត្តដល់ការបង្កាត់ពូជសត្វ តាមបែបវិទ្យាសាស្រ្តទំនើប ដើម្បីបង្កើនសក្តានុពលផលិតកម្ម និងការប្រគួតប្រជែង។

ទី៥. ពង្រឹងភាពជាដែគូរវាងផ្នែកសាធារណៈ ឯកជន អ្នកចិញ្ចឹមសត្វ និងបង្កើតបវិស្ថានវិនិយោគ ឧស្សាហកម្មចិញ្ចឹមសត្វ ការកែច្នែម្ហូបអាហារ និងផលិតផលសត្វ។

បន្ថែមពីលើនេះទៀត ឯកឧត្តមរដ្ឋមន្រ្តីក៏សូមស្នើដល់ក្រសួង ស្ថាប័នពាក់ព័ន្ធ អង្គភាពជំនាញ មន្ទីរកសិកម្មរាជធានី ខេត្តទាំងអស់មេត្តា យកចិត្តទុកដាក់ជួយជំរុញ និងលើកទឹកចិត្តដល់ ការវិនិយោគលើការចិញ្ចឹមសត្វជាលក្ខណៈគ្រួសារ និងកសិដ្ឋានឱ្យមានប្រសិទ្ធភាពខ្ពស់សំដៅផ្គត់ផ្គង់សត្វ និងសាច់សត្វឱ្យបានគ្រប់គ្រាន់ ដើម្បីធានាស្ថិរភាពតម្លៃសាច់សត្វគ្រប់ប្រភេទនៅក្នុងទីផ្សារក្នុងស្រុក បម្រើឱ្យការនាំចេញផង និងកាត់បន្ថយការនាំចូល។ ក្នុងគោលដៅនេះ យើងត្រូវធ្វើកិច្ចការ  សំខាន់ៗមួយចំនួនដូចជា (១). ជំរុញលើកទឹកចិត្តក្នុងការផលិតវ៉ាក់សាំង ការផលិតចំណីសត្វដោយប្រើប្រាស់វត្ថុធាតុដើមដែលមានស្រាប់នៅក្នុងស្រុក (២). បង្កើនសមត្ថភាពក្នុងការបង្ការនិងទប់ស្កាត់ជំងឺឆ្លងរាលដាលនៃសត្វ ជំងឺឆ្លងសត្វទៅមនុស្សនិងពីមនុស្សមកសត្វឱ្យមានប្រសិទ្ធភាពតាមគ្រប់ រូបភាព (៣). ពង្រឹងការត្រួតពិនិត្រអនាម័យសត្វ និងផលិតផលមានដើមកំណើតពីសត្វ ចំណីសត្វ និងបសុឱសថ (៤). ត្រូវចូលរួមរឹតបន្តឹងឱ្យបានកាន់តែសកម្មថែមទៀត ក្នុងការសហការទប់ស្កាត់ចលនាសត្វ និងផលិតផលមានដើមកំណើតពីសត្វខុសច្បាប់នៅក្នុងដែនសមត្ថកិច្ចរបស់ខ្លួន ជាពិសេសខេត្តនៅជាប់ព្រំដែន ។

នៅចុងបញ្ចប់នៃកម្មវិធី ឯកឧត្តមរដ្ឋមន្ត្រីក៏បានចែកសៀវភៅច្បាប់ស្តីពីសុខភាពសត្វនិងផលិតកម្មសត្វនិងសៀវភៅប្រវត្តិនៃការរៀបចំច្បាប់សុខភាពសត្វនិងផលិតកម្មសត្វជានិម្មិត្តរូបនៃការផ្សព្វផ្សាយជូនដល់ប្រធានមន្ទីរកសិកម្មខេត្តផងដែរ។