ព័ត៌មានផ្សេងៗទៀត
សម្ពោធបណ្ណាល័យនិងផ្លូវក្នុងពេលតែមួយ
ចេញផ្សាយ ១៦ មករា ២០១៨ 3568
ផ្លូវលំប្រវែងជិតមួយគីឡូម៉ែត្រនិងបណ្ណាល័យធំបង្គួរនៅវត្ដអម្ពរវនារាម ឃុំអង្គតាសោម ស្រុកត្រាំកក់ ត្រូវបានប្រារព្ធពិធីសម្ពោធ ក្រោមការចូលរួមរបស់ឯកឧត្ដមបណ្ឌិត ច័ន្ទ សារុនរដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងមន្ដ្រីក្នុងក្រុមការងារ កាលពីពេលថ្មីៗនេះ ។ ជាមួយនឹងការសម្ពោធនេះក៏មានការផ្ដល់ជូននូវកូនរុក្ខជាតិហូបផ្លែ ដែលមានស្វាយទៀបបារាំងដល់កសិករជាច្រើនរយនាក់ដែលចូលមកផងដែរ ។
នៅចំពោះព្រះភ័ក្ដ្រ ព្រះសង្ឃ ប្រជាជន ដែលមកចូលរួមយ៉ាងច្រើនកុះករនៅទីនោះ ឯកឧត្ដមរដ្ឋមន្ដ្រី បានសម្ដែង នូវការចូលរួមអបអរសាទរ ចំពោះសមិទ្ធិថ្មី ដែលបានទទួលនាពេលនេះ បើទោះបីជាសមិទ្ធិនេះជាការរួមចំណែករបស់ឯកឧត្ដម និងមន្ដ្រីក្រុមការងារផ្ទាល់ក្ដី តែបើពុំមានការចូលរួមរបស់ព្រះសង្ឃ គណៈកម្មការវត្ដ ដូនជី តាជី លោកតា លោកយាយ ប្រជាជនអាជ្ញាធរដែនដីទេក៏មិនអាចសម្រេចបានជាផ្លែផ្កាឆាប់រហ័សដែរ ។
ឯកឧត្ដមបានអំពាវនាវឱ្យបន្ដនូវស្មារតីនេះ និងបង្កើតសមិទ្ធិថ្មីទៀត ប្រយោជន៏ដើម្បីធ្វើឱ្យជីវភាពប្រជាជនកាន់តែប្រសើរ និងមូលដ្ឋានមានការប្រែប្រួលថ្មី ។
ឯកឧត្ដមរដ្ឋមន្ដ្រីបានរំលឹកបន្ថែមអំពីសារសំខាន់របស់ផ្លូវលំ និងបណ្ណាល័យជនបទដែលសុទ្ធតែបានរួមចំណែកកាត់បន្ថយភាពក្រីក្រ និងការបណ្ដុះបណ្ដាលធនធានមនុស្សនៅភូមិដ្ឋានផ្ទាល់ ។ ឯកឧត្ដមរដ្ឋមន្ដ្រីក៏បានអំពាវនាវដល់វត្ដអារាម និងប្រជាជនទាំងអស់ឱ្យធ្វើការផ្លាស់ប្ដូររបៀធ្វើកសិកម្ម ប្ដូរពូជពីស្រូវធ្ងន់មកស្រូវស្រាល ស្រូវកណ្ដាលប្រើពូជសុទ្ធល្អ ប្រើបច្ចេកទេសថ្មីក្នុងការសាបនិងស្ទូង មិនត្រូវរំពឹងលើស្រូវតែមួយមុខ ។
ចំណែកវត្ដអារាមក៏មានការចូលរួមដាំដំណាំបន្ថែម ដើម្បីម្ចាស់ការដោះស្រាយបម្រើការហូបចុក ដែលជាមធ្យោបាយមួយ កាត់បន្ថយភាពក្រីក្រ និងរីកចម្រើនសម្រាប់វត្ដអារាមផងដែរ ។ ក្នុងឱកាសនោះដែរ ឯកឧណ្ឌមរដ្ឋមន្ដ្រី បានអំពាវនាវឱ្យកសិករប្រយ័ត្ន ចំពោះជំងឺកញ្ជ្រឹលជ្រូក និងវត្ដមានសត្វមមាចត្នោត ដែលអាចកើតឡើងប្រសិនជាយើងប្រហែល ៕
