Other News
កិច្ចសន្ទនាតុកាហ្វេយេនឌ័រ៖ ចែករំលែកបទពិសោធន៍ ដើម្បីបញ្ជ្រាបយេនឌ័រ ពង្រឹងសមត្ថភាព និងលើកកម្ពស់ស្ត្រីក្នុងអនុវិស័យដំណាំ
ចេញផ្សាយ ៣១ កក្កដា ២០២៦ 3458
នៅថ្ងៃទី៣១ ខែកក្កដា ឆ្នាំ២០២៦ លោកជំទាវ ចាន់ ផលលឿន និងលោកជំទាវ យ៉ើ អាស៊ីគីន អនុរដ្ឋលេខាធិការ និងជាអនុប្រធានក្រុមការងារយេនឌ័រ នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុង «កិច្ចសន្ទនាតុកាហ្វេស្តីពីការចែករំលែកបទពិសោធន៍ ការអនុវត្តសមភាព និងសមធម៌យេនឌ័រក្នុងអនុវិស័យដំណាំ» នៅសណ្ឋាគារ Sun & Moon រាជធានីភ្នំពេញ។
កម្មវិធីនេះរៀបចំឡើងដោយអគ្គនាយកដ្ឋានក្សេត្រសាស្ត្រ (GDA) ដោយមានការគាំទ្រពីអង្គការស្បៀង និងកសិកម្មនៃអង្គការសហប្រជាជាតិ (FAO) ព្រមទាំងមានការចូលរួមពីថ្នាក់ដឹកនាំ មន្ត្រីរាជការ ក្រុមការងារយេនឌ័រនិងកុមារ តំណាងនាយកដ្ឋានពាក់ព័ន្ធ នៃក្រសួងកសិកម្ម តំណាងអង្គការ FAO និងដៃគូអភិវឌ្ឍន៍នានា សរុបអ្នកចូលរួមប្រមាណ៦០នាក់។
ថ្លែងក្នុងពិធីបើក លោកជំទាវ ចាន់ ផលលឿន បានគូសបញ្ជាក់ថា កិច្ចជួបជុំនេះគឺជាវេទិកាដ៏សំខាន់ក្នុងការពិភាក្សា ផ្តល់ធាតុចូល និងផ្លាស់ប្តូរយោបល់ ដើម្បីរៀបចំផែនការយុទ្ធសាស្ត្រ កម្មវិធី និងសកម្មភាពនានាក្នុងអនុវិស័យដំណាំ។ គោលបំណងចម្បង ដមើម្បីធានាសមភាព ផ្តល់ឱកាសស្មើគ្នារវាងស្ត្រី និងបុរស ក្នុងការទទួលបានធនធាន ចំណេះដឹង បច្ចេកវិទ្យា និងការចូលរួមធ្វើសេចក្តីសម្រេចចិត្ត។ រួមចំណែកដល់ការអភិវឌ្ឍវិស័យកសិកម្មប្រកបដោយចីរភាព ស្របតាមគោលនយោបាយរបស់រាជរដ្ឋាភិបាលកម្ពុជា។
ទន្ទឹមនឹងនេះ កិច្ចពិភាក្សាក៏បានផ្តោតលើការវិភាគបញ្ហាប្រឈម ការស្វែងរកឱកាស និងដំណោះស្រាយកែលម្អ ដើម្បីឱ្យការអនុវត្តសមភាព និងសមធម៌យេនឌ័រកាន់តែមានប្រសិទ្ធភាពខ្ពស់។ មេរៀន និងបទពិសោធន៍ល្អៗដែលទទួលបាន នឹងត្រូវយកទៅអនុវត្តតាមស្ថាប័នពាក់ព័ន្ធ ដើម្បីរួមចំណែក៖ ពង្រឹងសន្តិសុខស្បៀង បង្កើនផលិតភាពកសិកម្ម បន្ស៊ាំទៅនឹងការប្រែប្រួលអាកាសធាតុ និងលើកកម្ពស់ជីវភាពរស់នៅរបស់ប្រជាកសិករឱ្យកាន់តែប្រសើរឡើង៕
