ថ្នាក់ដឹកនាំក្រសួងកសិកម្ម​ អញ្ជើញដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទ បំពេញទស្សនកិច្ចសិក្សា ផ្សព្វផ្សាយ និងលើកទឹកចិត្តដល់វិនិយោគិនចិនលើវិស័យកសិកម្ម នៅសាធារណរដ្ឋប្រជាមានិតចិន

ចេញ​ផ្សាយ​ ១១ វិច្ឆិកា ២០២៦ 85

នាថ្ងៃទី៨ ដល់ថ្ងៃទី១០ ខែវិច្ឆិកា ឆ្នាំ២០២៦ ឯកឧត្តម គី ច័ន្ទរំដួល អញ្ជើញដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទ បំពេញទស្សនកិច្ចសិក្សា ផ្សព្វផ្សាយ និងលើកទឹកចិត្តដល់វិនិយោគិនចិនលើវិស័យកសិកម្មនៅទីក្រុងជីណាន ខេត្តសានទុង សាធារណរដ្ឋប្រជាមានិតចិន។ 
ក្នុងឱកាសនេះ ឯកឧត្តម គី ច័ន្ទរំដួល បានពិភាក្សាការងារជាមួយក្រុមហ៊ុន Grand Bridge Investment Co., Ltd និងក្រុមហ៊ុន Shandong Mingsheng Group ដែលជាក្រុមហ៊ុនរដ្ឋចិន មានឯកទេសខាងចិញ្ចឹមត្រីក្នុងអាងស្វ័យប្រវត្តិ ផលិតចំណីត្រី និងមាន់យកស៊ុត ការកែច្នៃ ឡូជីស្ទីកត្រជាក់ និងទីផ្សារលក់កសិផលនៅប្រទេសចិន។
ឯកឧត្តម គី ច័ន្ទរំដួល បានផ្តល់អនុសាសន៍ជូនដល់ក្រុមហ៊ុនទាំងពីរ ស្តីពីការធ្វើកសិ-ពាណិជ្ជកម្មនៅកម្ពុជា ដោយផ្អែកលើសសរស្តម្ភ ៣ ៖ (១).ការនាំចេញ ៖ ការនាំចេញកសិផលសក្កានុពល​ និងការចុះហត្ថលេខាលើឯកសារពិធីសារផ្លូវការសម្រាប់នាំចេញកសិផលចំនួន ២០មុខ ទៅប្រទេសចិន ដោយកម្ពុជាមានការផលិតកសិផលដែលមានគុណភាពខ្ពស់ដូចជា អង្ករក្រអូបផ្ការំដួល ស្វាយចន្ទី ធុរេន ស្វាយ ចេក និងកសិផលជាច្រើនមុខទៀត។ (២).តម្រូវការនាំចូលពូជ ធាតុចូលកសិកម្ម បច្ចេកវិទ្យា ឧបករណ៍ឆ្លាតវៃ គ្រឿងយន្ត ឃ្លាំងសំងួត និងឡូជីស្ទីកត្រជាក់ និង(៣).ការលើកទឹកចិត្តផ្នែកវិនិយោគ ដោយរាជរដ្ឋាភិបាលកម្ពុជាបានចេញច្បាប់វិនិយោគថ្មីដែលមានការលើកទឹកចិត្តដល់គម្រោងវិនិយោគមានលក្ខណៈសម្បត្តិគ្រាប់គ្រាន់(QIP) មានការលើកទឹកចិត្តរួចពន្ធលើប្រាក់ចំណូល និងការនាំចូលវត្ថុធាតុដើម និងគ្រឿងចក្រផ្សេងៗ។
ឯកឧត្តម គី ច័ន្ទរំដួល ក៏បានណែនាំឱ្យក្រុមហ៊ុនទាំង២ ពិនិត្យលទ្ធភាពវិនិយោគនៅកម្ពុជាលើវិស័យវារីវប្បកម្ម ភស្តុភារកម្ម ជំរុំការកែច្នៃ និងពង្រីកទីផ្សារកសិផលផ្សេងៗទៀតរបស់កម្ពុជា នៅលើទីផ្សារប្រទេសចិន។ ជាការឆ្លើយតប លោកអគ្គនាយកក្រុមហ៊ុនទាំងពីរ បានទទួលយកអនុសាសន៍សម្រាប់ជំរុញ និងលើកទឹកចិត្តដល់ការវិនិយោគនៅកម្ពុជា ហើយក្រុមហ៊ុននឹងពិនិត្យលទ្ធភាពធ្វើការងារបន្តជាមួយក្រសួងកសិកម្ម រុក្ខាប្រមាញ់ និងនេសាទ ផ្នែកវារីវប្បកម្ម​ ការផ្ទេរបច្ចេកវិទ្យា ឡូជីស្ទីក ទូក្លាសេកក និងការនាំចេញកសិផលទៅលក់នៅទីផ្សារប្រទេសចិន៕