សិក្ខាសាលាពិគ្រោះយោបល់លើកទី១ ស្តីពី “សេចក្តីព្រាងស្តង់ដារគ្រាប់ស្វាយចន្ទីស្រស់”

ចេញ​ផ្សាយ​ ១៦ ធ្នូ ២០២១ 12062

នាថ្ងៃពុធ ១១កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៥ ខែធ្នូ ឆ្នាំ២០២១ នាយកដ្ឋានកសិ-ឧស្សាហកម្ម នៃក្រសួងកសិកម្ម​ រុក្ខាប្រមាញ់ និងនេសាទ ដោយមានកិច្ចសហការជាមួយអង្គការ HEKS/EPER និងក្រុមហ៊ុន Top Planning Japan បានរៀបចំសិក្ខាសាលាពិគ្រោះយោបល់លើកទី១ ស្តីពី “សេចក្តីព្រាងស្តង់ដារគ្រាប់ស្វាយចន្ទីស្រស់” ក្រោមអធិបតីយភាព លោក គង់ ភាជ ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពីថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ,ក្រុមការងារបច្ចេកទេសរបស់នាយកដ្ឋានកសិ-ឧស្សាហកម្ម, អង្គការ HEKS/EPER, លោក KODAMA hiroshi ជំនាញការ JICA ប្រចាំនាយកដ្ឋានកសិ-ឧស្សាហកម្ម, សហគមន៍ស្វាយចន្ទីកម្ពុជា, លោក លោកស្រី សហគមន៍កសិកម្ម កសិករ អ្នកប្រមូលទិញគ្រាប់ស្វាយចន្ទី សិប្បកម្មកែច្នៃគ្រាប់ស្វាយចន្ទី និងអ្នកផលិតឧបករណ៍ជ្រើសរើសគុណភាពគ្រាប់ស្វាយចន្ទី។

គោលបំណងក្នុងការរៀបចំសិក្ខាសាលាពិគ្រោះយោបល់លើកទី១ ស្តីពី “សេចក្តីព្រាងស្តង់ដារគ្រាប់ស្វាយចន្ទីស្រស់” គឺដើម្បីបំពេញបន្ថែមនូវធាតុចូលដ៏មានសារសំខាន់របស់អ្នកពាក់ព័ន្ធ ឱ្យស្របតាមការអនុវត្តជាក់ស្តែង។

ឆ្លៀតក្នុងឱកាសនេះដែរ លោក គង់ ភាជ ប្រធាននាយកដ្ឋានកសិ-ឧស្សាហកម្ម សូមកោតសរសើរដោយស្មោះចំពោះក្រុមការងារបច្ចេកទេសរបស់នាយកដ្ឋានកសិ-ឧស្សាហកម្ម និងជំនាញការ JICA លោក KODAMA Hiroshi ដែលបានយកចិត្តទុកដាក់សហការយ៉ាងជិតស្និទ្ធក្នុងការចុះសិក្សា ផ្ទៀងផ្ទាត់ ប្រមូលទិន្នន័យ ដើម្បីរៀបចំជាសេចក្តីព្រាងស្តង់ដារគ្រាប់ស្វាយចន្ទីស្រស់ និងគោលការណែនាំនេះឡើង។

គួររំលឹកផងដែរថានាពេលកន្លងមក នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បាននិងកំពុងខិតខំរៀបចំលិខិត​បទដ្ឋានគតិយុត្ត សំដៅលើកកម្ពស់ផលិតភាពកសិកម្ម ដើម្បីឆ្លើយតបទៅនឹងតម្រូវការទីផ្សារទាំងបរិមាណ គុណភាព សុវត្ថិភាព និងស្តង់ដារអន្តរជាតិ ដោយផ្សារភ្ជាប់ទីផ្សារតាមរយៈយន្តការផលិតកម្មកសិកម្មតាមកិច្ចសន្យា។

ជាកិច្ចបញ្ចប់លោក គង់ ភាជ បានថ្លែងអំណរគុណចំពោះ អង្គការ HEKS/EPER និងក្រុមហ៊ុន Top Planning Japan ដែលបានសហការគាំទ្រដល់សិក្ខាសាលានាថ្ងៃនេះ និងជឿជាក់យ៉ាងមុតមាំថានឹងបន្តសហការគាំទ្រជាមួយនាយកដ្ឋានកសិ-ឧស្សាហកម្ម ដើម្បីសិក្សាស៊ីជម្រៅបន្ថែមដើម្បីបំពេញបន្ថែមនូវចំនុចខ្វះខាត ក្នុងន័យទទួលបាននូវស្តង់ដារគុណភាពគ្រាប់ស្វាយចន្ទីស្រស់កម្ពុជា ដើម្បីជាប្រយោជន៍ដល់កសិករ សហគមន៍ អ្នកប្រមូលទិញ នៃស្តង់ដារគុណភាពគ្រាប់ស្វាយចន្ទីកម្ពុជា ឈានដល់ការលើកកម្ពស់ និងជំរុញការនាំចេញផលិតផលទីផ្សារអន្តរជាតិ។