Other News
ឯកឧត្ដមរដ្ឋលេខាធិការ ហាស់ សារ៉េត អញ្ជើញដឹកនាំក្រុមការងារ ប្រជុំពិភាក្សាអំពីការពង្រីក ពង្រឹងកិច្ចសហការអភិវឌ្ឍន៍ វារីវប្បកម្មនៅខេត្ដព្រៃវែង ឱ្យកាន់តែប្រសើរឡើង
ចេញផ្សាយ ០៩ មេសា ២០២៥ 1417
ឯកឧត្ដម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការចំពោះកិច្ចអភិវឌ្ឍន៍វិស័យវារីវប្បកម្មកម្ពុជា បានដឹកនាំក្រុមការងារ ប្រជុំពិភាក្សាអំពីការពង្រីក ពង្រឹងកិច្ចសហការអភិវឌ្ឍន៍ ឱ្យកាន់តែប្រសើរឡើងថែមទៀត លើកិច្ចអភិវឌ្ឍន៍វារីវប្បកម្ម នៅខេត្ដព្រៃវែង។
ដំណើរបេសកកម្មមានការចូលរួមពី ឯកឧត្តម ទឹម បូរក្ស អនុរដ្ឋលេខាធិការ រដ្ឋបាលជលផល ប្រធានមន្ទីរកសិកម្ម រុក្ខាប្រមាញ់ និងនេសាទខេត្ដព្រៃវែង តំណាងលោកអភិបាលស្រុកពាមរក៍ នាយ នាយរងខណ្ឌ ផ្នែករដ្ឋបាលជលផល វិស័យឯកជន មានលោកជំទាវប្រធានសមាគមអ្នកផ្គត់ផ្គង់ត្រីកម្ពុជា និងតំណាងវារីវប្បករនៅស្រុកពាមរក៍ ខេត្ដព្រៃវែង។
លទ្ធផលនៃកិច្ចប្រជុំរួមមាន៖ ទី១.សមាគមអ្នកផ្គត់ផ្គង់ត្រីកម្ពុជា បង្កើនការទិញត្រី ដែលវារីវប្បករមានស្រាប់បន្ថែមទៀត ឱ្យបានទាន់ពេលវេលា ទី២. សមាគមអ្នកផ្គត់ផ្គង់ត្រីកម្ពុជា បន្តសហការជាមួយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្ដព្រៃវែង បន្តទិញត្រីនៅតាមបណ្ដុំអាជីវកម្មអ្នកចិញ្ចឹមត្រីទាំង១៩ បណ្ដុំផ្សេងៗទៀតដោយខណ្ឌរដ្ឋបាលជលផលធ្វើផែនការ និងសម្របសម្រួលជូនសមាគម ។
ទី៣. ពង្រឹងក្រុមបណ្ដុំអាជីវកម្មអ្នកចិញ្ចឹមត្រី ដោយសម្របសម្រួលរៀបចំជាសហគមន៍កសិកម្ម (វារីវប្បកម្ម) ឱ្យបាន១សហគមន៍ក្នុង១ស្រុកៗ ដើម្បីងាយស្រួលសម្របសម្រួលការទិញ លក់ផលវារីវប្បកម្មនៅខេត្ដព្រៃវែង និងបង្កើតក្រុមទំនាក់ទំនងរវាងវារីវប្បករ ជាមួយសមាគមអ្នកផ្គត់ផ្គង់ត្រីកម្ពុជា និងខណ្ឌរដ្ឋបាលជលផល តាមរយៈការបង្កើតក្រុមតេលេក្រាមរួមគ្នា៕
