ឯកឧត្តមអនុរដ្ឋលេខាធិការ ខាត់ សុធី អញ្ជើញដឹកនាំក្រុមការងារក្រសួង និងមន្រ្តីកសិកម្មឃុំ ចុះពិនិត្យស្រែកសិករដែលផលិតស្រូវផ្ការំដួល នៅស្រុកពួក ខេត្តសៀមរាប

ចេញ​ផ្សាយ​ ០២ សីហា ២០២៤ 605

នៅថ្ងៃទី០១ ខែសីហា ឆ្នាំ២០២៤ ឯកឧត្តម ខាត់ សុធី អនុរដ្ឋលេខា​ធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារ ដែលរួមមាន លោកយឹម សារុំ  ទីប្រឹក្សាក្រសួងកសិកម្ម  និងមន្ត្រី​កសិកម្ម​​ឃុំព្រៃជ្រូក ឃុំសំរោងយា ឃុំសំបួរ ឃុំស្រណាល ឃុំកណ្ដែក  និង​​ឃុំត្រពាំងធំ ចុះទៅពិនិត្យមើលស្រែកសិករដែលផលិតស្រូវផ្ការំដួល ដោយ​​ប្រើប្រាស់ជីសរីរាង្គទ្រាប់បាត និងបាញ់បំប៉នជីសរីរាង្គ ស្ថិតនៅក្នុង​ឃុំព្រៃជ្រូក ស្រុកពួក ខេត្តសៀមរាប។

ក្នុងដំណើរចុះពិនិត្យនោះ ប្រជាកសិករបានឱ្យដឹងថា ការប្រើប្រាស់ជីសរីរាង្គទ្រាប់បាត និងការបាញ់បំប៉នដោយប្រើជីសរីរាង្គ​បាន​ធ្វើ​ឱ្យទិន្នផលស្រូវកើនឡើង កាត់បន្ថយថ្លៃដើមផលិត  បង្កើនគុណភាព បង្កើន​​តម្លៃ នាំឱ្យកសិករទទួលបានប្រាក់ចំណេញច្រើនជាងមុន ព្រមទាំង​រក្សា​​បាន​នូវគុណភាពដី និងលើកកម្ពស់នូវក្សេត្របរិស្ថាននៃដំណាំស្រូវ ។

ឯកឧត្តម ខាត់ សុធី  បានផ្ដល់អនុសាសន៍ដល់កសិករ​ឱ្យគិតគូរពីឣត្ថប្រយោជន៍នៃការប្រើប្រាស់ពូជសុទ្ធ និងត្រឹមត្រូវតាមបរិមាណស្តង់ដារបច្ចេកទេស ដែលអាចកាត់​បន្ថយ​ហានិភ័យពីការបំផ្លាញនៃសមាសភាពចង្រៃផ្សេងៗ។

ឯកឧត្តមគូសបញ្ជាក់ថា ការប្រើប្រាស់បរិមាណពូជច្រើនហួស​ប្រមាណ​នឹងនាំ​ឱ្យស្រូវដុះញឹកណែនពេក និងលូតលាស់មិនបានល្អ។ បន្ថែមពីនោះ​ឯកឧត្តម​ក៏បានណែនាំមន្ត្រីកសិកម្មឃុំ សូមពន្យល់កសិករ​ដែលមាន​ស្រែ​នៅជិតៗនៅតំបន់នោះ អាចពិចារណាចងក្រងគ្នាជាក្រុមផលិត ដើម្បីឆ្ពោះទៅកសាង​សហគមន៍​កសិកម្មទំនើបផងដែរ៕