ឯកឧត្ដម ប្រាក់ ដាវីដ រដ្ឋលេខាធិការក្រសួងកសិកម្ម បានដឹកនាំតំណាងអង្គភាពជំនាញពាក់ព័ន្ធក្រោមឱវាទក្រសួង ចូលរួមជួបក្រុមការងារនៃក្រសួងពាណិជ្ជកម្ម

ចេញ​ផ្សាយ​ ២៧ មិថុនា ២០២៤ 903

នៅថ្ងៃអង្គារ ទី២៥ ខែមិថុនា ឆ្នាំ២០២៤ ឯកឧត្ដម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំតំណាងអង្គភាពជំនាញពាក់ព័ន្ធនៅក្រោមឱវាទក្រសួងកសិកម្ម ចូលរួមជួបក្រុមការងារតំណាងក្រសួងពាណិជ្ជកម្ម នៅទីស្តីការក្រសួងពាណិជ្ជកម្ម។

ជំនួបនោះ ធ្វើឡើងក្នុងគោលបំណង ពិភាក្សាអំពីកិច្ចការងារដែលពាក់ព័ន្ធនឹងកិច្ចសហការលើស្តង់ដារភូតគាមអនាម័យក្នុងការនាំចេញ និងប្រភេទផលិតផលកសិកម្មដែលត្រូវជំរុញក្នុងទីផ្សារសាធារណរដ្ឋប្រជាមានិតចិន។

នៅក្នុងជំនួបនេះ តំណាងឱ្យក្រុមការងារនៃក្រសួងពាណិជ្ជកម្មបានបង្ហាញអំពីមុខកសិផលមួយចំនួនដូចជា អង្ករ ស្វាយចន្ទី ម្រេច ដំឡូងមី ជាដើម ដែលមានសក្ដានុពល សម្រាប់ជំរុញក្នុងទីផ្សារសាធារណរដ្ឋប្រជាមានិតចិន ហើយការជំរុញទីផ្សារកសិផលទាំងនោះ គឺធ្វើឡើងតាមរយៈថ្នាលអេឡិចត្រូនិចរបស់ក្រុមហ៊ុន Alibaba (alibaba.com) និងថ្នាលពាណិជ្ជកម្មដែលបង្កើតឡើងដោយក្រសួងពាណិជ្ជកម្ម (cambodiatrade.com) និងពិព័រណ៍ពាណិជ្ជកម្ម ចំនួន៣លើក នៅក្នុងឆ្នាំ២០២៤នេះ ដែលចំនួន២លើក នឹងប្រព្រឹត្តទៅនៅប្រទេសចិន និង១លើកទៀតនៅកម្ពុជា។

ជាមួយនោះដែរ តំណាងក្រុមការងារនៃក្រសួងពាណិជ្ជកម្មបានស្នើក្រសួងកសិកម្ម រុក្ខាប្រមាញ់ និងនេសាទ ពិនិត្យចាត់មន្រ្តីបង្គោលសម្រាប់កិច្ចការងារជំរុញកសិផលក្នុងទីផ្សារចិននោះ និងពិនិត្យលទ្ធភាពចាត់ថ្នាក់ដឹកនាំក្រសួង ដើម្បីសហការរៀបចំ និងចូលរួមនៅក្នុងពិព័រណ៍ពាណិជ្ជកម្មជាដើម។

ជាការឆ្លើយតប ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម ក៏បានសម្ដែងនូវការគាំទ្រចំពោះផលិតផល កសិកម្មដែលបានស្នើឡើង និងបានបញ្ជាក់ជូនថា ភាគច្រើននៃផលិតផលកសិកម្មទាំងនោះ គឺមានពិធីសារភូតគាមអនាម័យដែលបានព្រមព្រៀងនិងចុះហត្ថលេខារវាងកម្ពុជា និងចិនរួចហើយ និងមួយភាគតូចបាននឹងកំពុងដំណើរការចរចារពិធីសារភូតគាមអនាម័យ ដូចជា ទុរេន និងទឹកត្រចៀកកាំ។

បន្ថែមពីនេះ ឯកឧត្ដមរដ្ឋលេខាធិការក៏បានបានស្នើឱ្យក្រសួងពាណិជ្ជកម្មពិនិត្យពិចារណាជំរុញផ្សព្វផ្សាយចូលទីផ្សារចិន នូវផលិតផលកសិកម្ម ដែលទើបទទួលបានការឯកភាពនិងចុះហត្ថលេខាលើពិធីសារ ភូតគាមអនាម័យ និងមានសក្ដានុពល ដូចជា ចំណីឆ្កែធ្វើពីស្បែកគោ ដូងក្រអូប។ ជាមួយនេះដែរ ឯកឧត្ដមរដ្ឋលេខាធិការ ក៏បានឯកភាពលើការស្នើ ចាត់ឱ្យមានមន្រ្តីបង្គោល សម្រាប់កិច្ចការងារជំរុញកសិផលក្នុងទីផ្សារចិននោះផងដែរ៕