ឯកឧត្តមរដ្ឋលេខាធិការ ចាន់ សុវុឌ្ឍ អញ្ជើញដឹកនាំក្រុមការងារ ចុះពិនិត្យស្ថានភាពទឹកជំនន់នៅស្រុកចំនួន២ក្នុងខេត្តបាត់ដំបង

ចេញ​ផ្សាយ​ ២៥ កក្កដា ២០២៤ 2917

នៅថ្ងៃទី២៤ ខែកក្កដា ឆ្នាំ ២០២៤ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ រួមមាន លោកជំទាវ ចាន់ ផលលឿន ឯកឧត្តម សួន សេរី អនុរដ្ឋលេខាធិការក្រសួង ព្រមទាំងមន្ទីរកសិកម្មខេត្ត អាជ្ញាធរមូលដ្ឋាន បានអញ្ជើញចុះ​ពិនិត្យ​ស្ថានភាពទឹកជំនន់ នៅស្រុកចំនួន២ក្នុងខេត្តបាត់ដំបង។

ការចុះពិនិត្យនេះជាក់ស្តែងបង្ហាញថា​ មានផ្ទៃដីទំហំ ៣២៣ហិកតា ទទួលរងការជន់លិច នៅក្នុងភូមិសាស្ត្រស្រុកចំនួន ២ គឺស្រុកឯកភ្នំ ​នៅឃុំព្រែកនរិន្ទ និងស្រុកបាណន់ នៅក្នុងឃុំភ្នំសំពៅ។ យ៉ាងណាក៏ដោយ ស្ថានភាពស្ថានភាព​ទឹកជំនន់កំពុងស្រកទៅវិញជាបណ្តើរៗហើយ។

នៅក្នុងដំណើរបេសកកម្មនេះ ឯកឧត្តមរដ្ឋលេខាធិការ ចាន់ សុវុឌ្ឍ បាន​ចាត់តាំងឱ្យមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង ​សហការជាមួយអាជ្ញាធរមូលដ្ឋាន រិះរកវិធី និង​មធ្យោបាយផ្សេងៗ ​ដើម្បី​បង្ហូរទឹកនេះឱ្យស្រកបានលឿន ជៀសវាងការខូចខាតដំណាំស្រូវធ្ងន់ធ្ងរ៕