ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារជំនាញ​ចុះពិនិត្យស្ថានភាពដំណាំសាកវប្បកម្ម នៅស្រុកកៀនស្វាយ ខេត្ដកណ្ដាល

ចេញ​ផ្សាយ​ ២ កញ្ញា ២០២៥ 943

នៅថ្ងៃទី២ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការ​ទទួលបន្ទុកដំណាំសាកវប្បកម្ម រួមជាមួយឯកឧត្ដម ឃី វិបុលបុត្រា អនុរដ្ឋ​លេខា​ធិការ អមដោយមន្រ្ដីជំនាញក្រសួងកសិកម្ម ចុះពិនិត្យ​ស្ថានភាពដំណាំ​សាកវប្បកម្ម​នៅស្រុកកៀនស្វាយ ខេត្ដកណ្ដាល។

ក្នុងដំណើរចុះត្រួតពិនិត្យនេះ ឯកឧត្ដម និងក្រុមការងារ បានចុះទៅ​កសិដ្ឋាន​វៃឆ្លាត (Smart Farm) របស់ស្ថានីយពិសោធន៍ដំណាំហូបផ្លែ និងរុក្ខជាតិ​លម្អដីឥដ្ឋ ស្ថិតនៅភូមិពពាល ឃុំដីឥដ្ឋ ស្រុកកៀនស្វាយ ខេត្ដកណ្ដាល។ Smart Farm បានដំណើរការសមស្របតាមលក្ខខណ្ឌសេដ្ឋកិច្ច​សង្គម​កម្ពុជា(កសិករ) ពិសេសជំរុញបង្កើនផលិតកម្មបន្លែនៅកម្ពុជា ក្នុង​ស្ថាន​ភាព​នៃការប្រែប្រួលអាកាសធាតុ មិន​អំណោយ​ផល នៅរដូវកាលមួយចំនួន។

បន្ទាប់មកក្រុមការងារបានបន្ត ចុះពិនិត្យស្ថានីយពិសោធកសិកម្ម​បន្ទា​យ​ដែក ដែលធ្វើការស្រាវជ្រាវ និងផលិតពូជពោតអ៊ីប្រីដកម្ពុជា  នៅភូមិព្រែក​ប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល។ ជួបពិភាក្សាជា​មួយ​ក្រុម​ការងារ​បច្ចេកទេសក្រុមហ៊ុន ត្រូភីខេម ច្រូត អេន វេជីថេប៊ល ឯ.ក លើដំណើរការរៀបចំមជ្ឈមណ្ឌលបន្លែសុវត្ថិភាព លើផ្ទៃដី ៦ហិកតា នៅ​ស្ថានីយ​បន្ទាយដែក ក្រោមកិច្ចសហការជាមួយអគ្គនាយកដ្ឋានកសិកម្ម ដែលមជ្ឈមណ្ឌលបន្លែសុវត្ថិភាពគំរូ ធ្វើឡើងតាមបច្ចេកទេសទំនើប ក្នុងបំណងផ្គត់ផ្គង់បន្លែសុវត្ថិភាព ឆ្លើយតបនឹងទីផ្សារ និងជាកន្លែងសិក្សា ផ្លាស់ប្តូរបទពិសោធ និងអភិវឌ្ឍបច្ចេកទេសថ្មីៗ។

នៅចុងបញ្ចប់ ឯកឧត្ដម និងក្រុមការងារ បានបន្ដចុះពិនិត្យស្ថានភាព​ផលិកម្ម​បន្លែ ក្នុងផ្ទះសំណាញ់ ទីតាំងវិចខ្ចប់ និងឃ្លាំងស្ដុកទុក របស់ក្រុមហ៊ុនក្នុង​កសិដ្ឋានផ្ទាល់ ដើម្បីឱ្យក្រុមការងារជំនាញក្រសួងពិនិត្យវាយតម្លៃ សហការ​គាំទ្រ ក្នុងការចូលរួមជួយជំរុញផលិតភាពរបស់ក្រុមហ៊ុន ក៏ដូចជាជំរុញផលិត​ភាព​ផលិត​កម្ម​សាកវប្បកម្មកម្ពុជា ស្របតាមបរិបទថ្មីនេះ ផងដែរ៕