ឯកឧត្តមរដ្ឋលេខាធិការ ហ៊ាន វណ្ណហន អញ្ជើញជាគណៈអធិបតីបើកសិក្ខាសាលាបណ្ដុះបណ្ដាលគ្រូបង្គោលនៅទីរួមខេត្តក្រចេះ

ចេញ​ផ្សាយ​ ៩ កញ្ញា ២០២៥ 897

នៅថ្ងៃទី៩ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF បានអញ្ជើញជាអធិបតីបើកសិក្ខាសាលាបណ្ដុះបណ្ដាលគ្រូបង្គោលស្តីពីបច្ចេកទេសផលិតកម្មដំណាំស្រូវចំណីនិងគ្រាប់ពូជស្រូវដោយប្រើប្រាស់បច្ចេកទេសកសិកម្មវៃឆ្លាតជាមួយនឹងអាកាសធាតុ នៅទីរួមខេត្តក្រចេះ។

សិក្ខាសាលានេះ មានការអញ្ជើញចូលរួមពីក្រុមការងារអនុវត្ដន៍គម្រោងថ្នាក់ជាតិ CaWSIP-MAFF មន្ត្រីជំនាញពាក់ព័ន្ធក្រោមឱវាទក្រសួង និងថ្នាក់ខេត្ដនៃមន្ទីរកសិកម្ម រុក្ខាប្រមាញ់ និងនេសាទ មន្ត្រីកសិកម្មឃុំ ក្នុងវិសាលភាព នៃប្រព័ន្ធស្រោចស្រពក្នុងខេត្ដគោលដៅទាំង ៤ រួមមាន ខេត្ដក្រចេះ មណ្ឌលគិរី ព្រះវិហារ និងខេត្ដកំពង់ធំ។

ថ្លែងក្នុងពិធីបើកសិក្ខាសាលា ឯកឧត្ដមបានគូរបញ្ជាក់ថា សិក្ខាសាលាមានគោលបំណងផ្ដល់ជូនសិក្ខាកាម ដែលនឹងក្លាយទៅជាគ្រូបង្គោល ឬហៅថាអ្នកផ្តល់សេវាប្រឹក្សាបច្ចេកទេស នូវ (1).បច្ចេកទេសផលិតកម្មដំណាំស្រូវចំណី និងគ្រាប់ពូជស្រូវ ដោយប្រើប្រាស់បច្ចេកទេសកសិកម្មវៃឆ្លាតជាមួយនឹងអាកាសធាតុ (2).វិធីសាស្រ្តកាត់បន្ថយថ្លៃដើមក្នុងផលិតកម្មដំណាំស្រូវ ចំណី និងគ្រាប់ពូជស្រូវ តាមរយៈការអនុវត្តបច្ចេកទេសកសិកម្មវៃឆ្លាត និង (3).លទ្ធភាពរៀបចំនិងដំណើរការវគ្គបណ្តុះបណ្តាលសាលារៀនស្រែកសិករ ស្តីពីបច្ចេកទេសផលិតកម្មស្រូវចំណី និងគ្រាប់ពូជស្រូវ ដោយប្រើប្រាស់បច្ចេកទេសកសិកម្មវៃឆ្លាតជាមួយនឹងអាកាសធាតុ សម្រាប់ក្រុមកសិករ សមាជិកសហគមន៍កសិកម្ម ឬសមាជិកសហគមន៍កសិកម្មទំនើបនៅក្នុងតំបន់គោលដៅនៃអនុគម្រោងខេត្តគោលទាំង៤។

បន្ថែមពីនេះទៀតនោះ ឯកឧត្តមបានលើកឡើងពីសារសំខាន់នៃគម្រោងក្នុងការអនុវត្តបច្ចេកទេសកសិកម្មវៃឆ្លាត ដូចជា ការបន្សាំនឹងការប្រែប្រួលអាកាសធាតុបច្ចេកទេសកាត់បន្ថយផលប៉ះពាល់ដល់ការបំរែបំរួលអាកាសធាតុនិង ការបង្កើនផលិតភាព ជាពិសេសការភ្ជាប់ជាមួយទីផ្សារ ដែលជាអនុសាសន៍របស់ឯកឧត្តមរដ្ឋមន្ត្រី វិធានការសន្សំសំចៃទឹករួមទាំងការការវិនិយោកប្រភពទឹកស្រោចស្រពផ្សេទៀត។ ជាមួយគ្នានេះ មន្ត្រីថ្នាក់ខេត្ត និងឃុំ នឹងក្លាយជាជនបង្គោល ដែលជាទ័ពស្រួចក្នុងការចូលរួមជំរុញការអនុវត្តគម្រោងសន្តិសុខទឹកនៅមូលដ្ឋាន មន្ត្រីថ្នាក់ខេត្តតាមតំបន់គោលដៅត្រូវជួយជ្រើសរើស (១) ទីតាំង សម្រាប់ការធ្វើបង្ហាញ ក្នុងនោះមានសាងសង់ផ្ទះសំណាញ់សម្រាប់ផលិតកម្មបន្លែ ការធ្វើស្រែបង្ហាញបច្ចេកទេស និង (២) កសិករ ចូលរួមការធ្វើបង្ហាញបច្ចេកទេសជាកសិករដែលសកម្ម និងមានឆន្ទៈចូលរួមក្នុងផលិតកម្មកសិកម្ម។  ការជ្រើសរើសបានត្រឹមត្រូវ ជាកត្តាធានាជោគជ័យនៃគម្រោង ពិសេសបង្កើនប្រសិទ្ធភាពនៃការទទួលយកបច្ចេកទេសកសិកម្មវៃឆ្លាតទល់នឹងអាកាសធាតុ នៅក្នុងតំបន់អនុគម្រោងនៃខេត្តទាំង៤៕