Other News
ថ្នាក់ដឹកនាំក្រសួងកសិកម្មអញ្ជើញទស្សនកិច្ចសិក្សា ដើម្បីពង្រឹងសមត្ថភាពកសិករ និងជំរុញការអនុវត្តកសិកម្មឆ្លាតវៃធន់នឹងការប្រែប្រួលអាកាសធាតុ ក្រោមក្របខណ្ឌគម្រោង CaWSIP
ចេញផ្សាយ ១៣ វិច្ឆិកា ២០២៦ 341
នៅថ្ងៃទី១៣ ខែវិច្ឆិកា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ និងជានាយកគម្រោងកែលម្អសន្តិសុខទឹកនៅកម្ពុជា (CaWSIP) បានដឹកនាំក្រុមការងារថ្នាក់ជាតិ ថ្នាក់ខេត្ត តំណាងសហគមន៍កសិកម្ម និងកសិករគំរូមកពីខេត្តកំពង់ធំ និងខេត្តព្រះវិហារ ចុះទស្សនកិច្ចសិក្សានៅទីតាំងកសិកម្មគំរូ ក្នុងខេត្តព្រះវិហារ។
ទស្សនកិច្ចនេះមានគោលបំណងផ្លាស់ប្តូរបទពិសោធន៍ និងស្វែងយល់ពីការអនុវត្តបច្ចេកទេសកសិកម្មឆ្លាតវៃធន់នឹងការប្រែប្រួលអាកាសធាតុ (Climate-Smart Agriculture – CSA) និងស្វែងយល់ដោយផ្ទាល់ពីគំរូផលិតកម្មបន្លែដែលទទួលបានជោគជ័យ រួមមាន ការដាំដុះដំណាំចម្រុះ ការប្រើប្រាស់ប្រព័ន្ធស្រោចស្រពដំណក់ទឹក ការផលិតជីកំប៉ុស្តិ៍ និងថ្នាំកម្ចាត់សត្វល្អិតធម្មជាតិ ការប្រើប្រាស់កម្រាលប្លាស្ទិក ការគ្រប់គ្រងសត្វល្អិតនឹងជំងឺលើដំណាំចម្រុះ។
ជាមួយគ្នានេះ អ្នកចូលរួមក៏បានចែករំលែកបទពិសោធន៍ និងពិភាក្សាកំណត់ទិសដៅអាទិភាពសម្រាប់ពង្រឹង និងពង្រីកផលិតកម្មកសិកម្មនាពេលខាងមុខ ដូចជា ការបង្កើតបណ្តុំផលិតកម្ម និងក្រុមកសិករ ការពង្រីកការផលិតជីកំប៉ុស្តិ៍ ការរៀបចំកន្លែងបណ្តុះកូនបន្លែ ការប្រើប្រាស់ថាមពលពន្លឺព្រះអាទិត្យសម្រាប់ប្រព័ន្ធបូមទឹក ស្រោចស្រព និងការពង្រីកការដាំដុះបន្លែក្នុងផ្ទះសំណាញ់។
គម្រោង CaWSIP មានសារៈសំខាន់ក្នុងការជំរុញការរៀនសូត្រពីកសិករទៅកសិករ ការផ្សព្វផ្សាយចំណេះដឹង និងបច្ចេកទេសកសិកម្មល្អៗ ដើម្បីរួមចំណែកបង្កើនផលិតភាព និងប្រាក់ចំណូលរបស់កសិករ លើកកម្ពស់ការប្រើប្រាស់ធនធានទឹកប្រកបដោយប្រសិទ្ធភាព ពង្រឹងសន្តិសុខស្បៀង និងបង្កើនភាពធន់នៃប្រព័ន្ធផលិតកម្មកសិកម្មចំពោះការប្រែប្រួលអាកាសធាតុនៅកម្ពុជា៕
