ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញបើកវគ្គបណ្តុះបណ្តាលមន្ត្រីកសិកម្មឃុំស្តីពី កសិកម្មគិតគូរអាហារូបត្ថម្ភ និងកសិកម្មវៃឆ្លាតនៃគម្រោងINAS

ចេញ​ផ្សាយ​ ១៦ កញ្ញា ២០២៥ 816

នៅថ្ងៃទី១៦ កញ្ញា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញបើកវគ្គបណ្តុះបណ្តាល អនុវត្តគម្រោងអន្តរវិស័យគំរូឈ្មោះថា «នវានុវត្តន៍ថ្មីសម្រាប់លទ្ធផលកាន់តែប្រសើរ ការធ្វើសមាហរណកម្មរវាងវិស័យកសិកម្ម សុខាភិបាល និងអប់រំ ដើម្បីផ្លាស់ប្តូរលទ្ធផលអាហារូបត្ថម្ភនៅកម្ពុជា» ហៅកាត់ថា «INAS»  ធ្វើឡើងនៅខេត្តកំពង់ធំ។ វគ្គបណ្តុះបណ្តាលមានរយ:ពេល៥ថ្ងៃ គិតពីថ្ងៃទី១៦ដល់ថ្ងៃ២០ កញ្ញា ២០២៥ ដល់មន្ត្រីកសិកម្មឃុំ មកពី២៥ឃុំ នៃខេត្តអនុវត្តគម្រោងចំនួន៥ រួមមាន÷ខេត្តតាកែវ កំពត កំពង់ធំ កំពង់ឆ្នាំង និងខេត្តបន្ទាយមានជ័យ។
វគ្គបណ្តុះបណ្តាលមានការចូលរួមពីឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ លោក ហ៊ូ ក្រើន នាយកអង្គការហេឡែន ខេលល័រ អន្តរជាតិកម្ពុជា លោក លោកស្រីតំណាងមន្ទីរកសិកម្ម រុក្ខាប្រមាញ់ និងនេសាទ នៃខេត្តទាំង៥ និងមន្រ្តីកសិកម្មឃុំ។
ឯកឧត្តមបណ្ឌិតយ៉ង សាំង កុមារ បានគូសបញ្ជាក់ថា INAS គឺជាគម្រោងគំរូថ្មីមួយដែលមានមហិច្ឆតាក្នុងការផ្លាស់ប្តូរលទ្ធផលអាហារូបត្ថម្ភនៅកម្ពុជា ឱ្យកាន់តែប្រសើរតាមរយៈការធ្វើការរួមគ្នា រវាងមន្ត្រីកសិកម្មឃុំ មណ្ឌលសុខភាព និងសាលារៀន ដើម្បីសម្រេចគោលដៅរួម តាមរយៈការសហការគ្នារួមគ្នា ក្រោមការសម្របសម្រួលដោយរដ្ឋបាលឃុំសង្កាត់។
ជាចុងបញ្ចប់ ឯកឧត្តមបណ្ឌិត បានឱ្យដឹងទៀតថា មន្រ្តីកសិកម្មឃុំចូលរួមចំណែកយ៉ាងសំខាន់ លើការងាររបស់គម្រោងតាមរយៈការជំរុញកសិកម្មដែលគិតពីអាហារូបត្ថម្ភ ជាពិសេសក្នុងចំណោមគ្រួសារដែលមានកូនអាយុក្រោម៥ឆ្នាំ ក្នុងគោលបំណងរួម គឺកាត់បន្ថយអត្រាកុមារដែលក្រិន និងស្គមស្គាំង ដែលស្របគ្នាជាមួយយុទ្ធសាស្រ្តជាតិស្តីពី សន្តិសុខស្បៀង និងអាហារូបត្ថម្ភ ២០២៥-២០២៨៕