ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យឯកឧត្ដមបណ្ឌិត អ៊ីងហ្គោ ខាស្ដិន ឯកអគ្គរដ្ឋទូត នៃសាធារណរដ្ឋសហព័ន្ធអាល្លឺម៉ង់ ចូលជួបសម្ដែងការគួរសម និងពិភាក្សាការងារ

ចេញ​ផ្សាយ​ ១៩ កុម្ភៈ ២០១៨ 2442

នៅព្រឹកថ្ងៃទី២៩ ខែវិច្ឆិកា ឆ្នាំ២០១៦ នៅទីស្តីការក្រសួង ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យឯកឧត្ដមបណ្ឌិត អ៊ីងហ្គោ ខាស្ដិន ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ។ ក្នុងជំនួបនេះ ឯកឧត្តមរដ្ឋមន្ត្រី តាមរយៈឯកឧត្តម ឯកអគ្គរដ្ឋទូត បានថ្លែងអំណរគុណដល់រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដែលបាននិងកំពុងជួយឧបត្ថម្ភសម្រាប់ កិច្ចអភិវឌ្ឍន៍ដល់ប្រទេសកម្ពុជា ជាពិសេសការ អភិវឌ្ឍវិស័យកសិកម្ម ហើយសង្ឃឹមថាកិច្ចសហប្រតិបត្តិការនឹងបន្តទៅមុខទៀត។ ពាក់ព័ន្ធនឹងកិច្ចសហប្រតិបត្តិការលើវិស័យកសិកម្ម ឯកឧត្តមរដ្ឋមន្ត្រី បានជម្រាបជូនឯកឧត្ដម ឯកអគ្គរដ្ឋទូត និងបានណែនាំឯកឧត្តមប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្មធ្វើកិច្ចសហការ ជិតស្និទ្ធ ជាមួយស្ថានទូតសាធារណរដ្ឋ សហព័ន្ធអាល្លឺម៉ង់ លើការងារលំអិត ជាក់លាក់ ដោយផ្តោតជាអាទិ៍លើការងារទំនើបកម្មផលិតកម្មកសិកម្ម ការលើកស្ទួយគុណភាពនិងសុវត្ថិភាព ផលិតផលកសិកម្ម ការជំរុញផលិតផលកសិកម្មកម្ពុជាទៅកាន់ទីផ្សារអាឡឺម៉ង់ និងសហភាពអឺរុប ។ ឯកឧត្តមឯកអគ្គរដ្ឋទូតបានថ្លែងអំណរគុណឯកឧត្ដមរដ្ឋមន្ត្រីចំពោះជំនួបនេះ និងបានកត់សម្គាល់ពីការរីកចម្រើនយ៉ាងឆាប់រហ័សនៃប្រទេសកម្ពុជា និងដោយឡែកការ អភិវឌ្ឍនៃវិស័យកសិកម្ម ដែលក្នុងនោះមានការរីកចម្រើនខ្លាំងលើផលិតកម្មស្រូវ ហើយអង្ករកម្ពុជាមានរសជាតិឆ្ងាញ់ពិសារ។ ឯកឧត្តមក៏សម្ដែងការពេញចិត្តចំពោះត្រីទន្លេ និងផ្លែឈើកម្ពុជាផងដែរ។ ឯកឧត្តមឯកអគ្គរដ្ឋទូតបានបញ្ជាក់ថាក្នងអាណត្តិការទូតរបស់ឯកឧត្តមនៅកម្ពុជា ឯកឧត្ដមនឹងខិតខំជំរុញកិច្ចសហប្រតិបត្តិការ លើវិស័យ កសិកម្មឲ្យបានខ្លាំងក្លា និងត្រៀមសហការជាមួយក្រសួងកសិកម្ម រុក្ខាប្រមាញ់និងនេសាទលើការងារដែលឯកឧត្តមរដ្ឋមន្ត្រីបានលើកឡើងខាងលើ។ ភាគីទាំងពីរក៏បានផ្លាស់ប្ដូរយោបល់គ្នាពី៖ -ការអភិរក្សនិងអភិវឌ្ឍន៍វិស័យជលផល ជាពិសេសលើផលប៉ះពាល់ធនធានមច្ឆាជាតិបឹងទន្លេសាប ដោយកត្តាបម្រែបម្រួលអាកាសធាតុ និងការសាងសង់ទំនប់វារីអគ្គិសនីនៅខ្សែទឹកខាងលើ ព្រមទាំងទស្សនៈទានជាយុទ្ធសាស្ត្ររយៈពេលវែងសម្រាប់ការអភិរក្សនិងអភិវឌ្ឍន៏បឹងទន្លេសាប។ -ការពិចារណាលើវិធានការអន្តរាគមន៍ជួយកសិករកម្ពុជាធ្វើយ៉ាងណាអភិវឌ្ឍតាមទាន់ល្បឿនអភិវឌ្ឍន៏នៃសេដ្ឋកិច្ចជាតិ។ ក្នុងឱកាសនោះផងដែរ ឯកឧត្តមរដ្ឋមន្ត្រីបានជម្រាបជូនឯកឧត្ដមឯកអគ្គរដ្ឋទូត ពីការរៀបចំប្រតិភូក្រសួងកសិកម្ម រុក្ខាប្រមាញ់និងនេសាទ ទៅចូលរួមកិច្ចប្រជុំកំពូល រដ្ឋមន្ត្រីកសិកម្មលើកទី៩ នៅទីក្រុងប៊ែរឡាំង នៅថ្ងៃទី២១ ខែមករា ឆ្នាំ២០១៧ ខាងមុខ តបតាមការអញ្ជើញរបស់រដ្ឋមន្ត្រីស្បៀងនិងកសិកម្ម នៃសាធារណរដ្ឋសហព័ន្ធអាល្លឺម៉ង់៕