Other News
ឯកឧត្តមរដ្ឋមន្ត្រី និងសហការីបានបន្តមក ពិនិត្យស្ថានីយពិសោធន៍ស្រាវជ្រាវកសិកម្មកូនគ្រៀល
ចេញផ្សាយ ១៧ មិថុនា ២០១៩ 3400
នៅព្រឹកថ្ងៃដដែល ចេញពីទីតាំងរៀបចំទិវាមច្ឆជាតិ ឯកឧត្តមរដ្ឋមន្ត្រី និងសហការីបានបន្តមក ពិនិត្យស្ថានីយពិសោធន៍ស្រាវជ្រាវកសិកម្មកូនគ្រៀល។ លោកប្រធានមន្ទីរបានជម្រាបជូនឯកឧត្ដមជ្រាបថាបច្ចុប្បន្នស្ថានីយបានដាំដំណាំចម្រុះមានបន្លែ ឈើហូបផ្លៃ ឬស្សីយកទំពាំង និងចិញ្ចឹមសត្វផងដែរមានគោ មាន់ និងទា នៅលើផ្ទៃដី ១៦៧ហត។ មន្ទីរបានរៀបចំហេដ្ឋារចនា សម្ព័ន្ធផ្លូវថ្នល់ អគាររដ្ឋបាល ថ្នាលពិសោធន៍ រោងដាំបន្លែ និងជីកស្រះទឹកចិញ្ចឹមត្រី។ល។
ក្រោយពីបានចុះពិនិត្យស្ថានីយរួច ឯកឧត្តមរដ្ឋមន្ត្រីបានកោតសរសើរ និងវាយតម្លៃខ្ពស់ចំពោះថ្នាក់ដឹកនាំមន្ទីរ មន្រ្តីគ្រប់ជាន់ថ្នាក់ដែលបានលះបង់ តស៊ូ ខិតខំប្រឹងប្រែងក្នុងស្មារតីទទួលខុស ត្រូវថែរក្សាការពារដីស្ថានីយបាននៅគង់វស្សដែលជាសម្បត្តិរបស់រដ្ឋ ទុកជាប្រយោជន៍សម្រាប់ធ្វើការពិសោធន៍ស្រាវជ្រាវ និងផ្សព្វផ្សាយពីពូជដំណាំ បន្ថែ ត្រី និងសត្វ និងបច្ចេកទេសកសិកម្មទាន់សម័យដល់អ្នកផលិតដើម្បីអភិវឌ្ឍវិស័យមួយនេះឲ្យមានការរីកចម្រើនធានាបាននូវសន្តិសុខស្បៀង អាហារូបត្ថម្ភ និងឈានទៅធានាដល់ការផ្គត់ផ្គង់ទីផ្សារទាំងបរិមាណ និងគុណភាព សម្រាប់ធ្វើការកែច្នៃ និងនាំចេញ។
មានប្រសាសន៍ណែនាំបន្ថែម ឯកឧត្តមបានឲ្យរដ្ឋបាលជលផលស្វែងរកជំនួយដៃគូជួយឧបត្ថម្ភបង្កើតស្ថានីយបង្កាត់ពូជត្រីដើម្បីផ្សព្វផ្សាយ និងបំផុសឲ្យប្រជាកសិករចិញ្ចឹមត្រីឲ្យបានច្រើនដើម្បីបង្កើតមុខរបរ បង្កើនប្រាក់ចំណូល កាត់បន្ថយភាពក្រីក្រ។ រដ្ឋបាលព្រៃឈើ សហការជាមួយមន្ទីរផ្សព្វផ្សាយ និងដាំឫស្សីយកទំពាំងនៅតាមព្រៃសហគមន៍ ដើម្បីឲ្យពួកគាត់មានការងារធ្វើ មានចំណូល កែប្រែជីវភាព និងកាត់បន្ថយការពឹងអាស្រ័យលើផល និងអនុផលព្រៃឈើ។ ដោយតំបន់នេះមានសក្តានុពលសម្រាប់ដាំឈើប្រេងខ្យល់ពូជ G9 និងG29 ឯកឧត្តមបានណែនាំឲ្យរដ្ឋបាលព្រៃឈើ សហការជាមួយមន្ទីរដាំសាកល្បងឈើប្រភេទនេះ ព្រោះវាអាចផ្តល់ផលបានយ៉ាងល្អសម្រាប់ផ្គត់ផ្គង់ឲ្យសិប្បកម្មកែច្នៃក្តាបន្ទះ និងគ្រឿងសង្ហារឹមផ្សេងៗទៀត។ មន្ទីរត្រូវសហការជា មួយអាជ្ញាធរដែនដីគ្រប់ជាន់ថ្នាក់ដើម្បីការពារដីស្ថានីយ និងព្រៃធម្មជាតិនៅជុំវិញឲ្យបានស្ថិតស្ថេរគង់វង្សទុកជាសម្បត្តិរដ្ឋ។
