ឯកឧត្តមរដ្ឋមន្រ្តី វេង សាខុន បានដឹកនាំគណប្រតិភូចុះសំណេះសំណាល និងពិនិត្យមើលស្ថានភាពប្រជាកសិករ ដែលទទួលផលពីគម្រោងអភិវឌ្ឍន៏ក្រុមកសិករដើម្បីលើកកម្ពស់គុណភាពការផលិតបន្លែ និងឈើហូបផ្លែ ស្ថិតនៅក្រុងសៀមរាប

ចេញ​ផ្សាយ​ ១៩ កុម្ភៈ ២០១៨ 2339

នៅព្រឹកថ្ងៃទី២៣ ខែវិច្ឆិកា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានដឹកនាំគណប្រតិភូចុះសំណេះសំណាល និងពិនិត្យមើលស្ថានភាព ប្រជាកសិករ ដែលទទួលផលពីគម្រោងអភិវឌ្ឍន៏ក្រុមកសិករដើម្បីលើកកម្ពស់គុណភាពការផលិតបន្លែ និងឈើហូបផ្លែ ស្ថិតនៅភូមិពពិស សង្កាត់ក្របីរៀល ក្រុងសៀមរាប។ គម្រោងនេះបានចាប់ផ្តើមអនុវត្តតាំងពីឆ្នាំ២០១៣ ក្រោមការជួយឧបត្ថម្ភគាំទ្រដោយ ភ្នាក់ងារសហប្រតិបត្តិការអភិវឌ្ឍអន្តរជាតិថៃឡង់ដ៏ ហើយសហគមនេះមានសមាជិកសរុប ៤០គ្រួសារ។ គម្រោងនេះបានផ្តល់នូវការបណ្តុះបណ្តាលដល់ប្រជាកសិករអំពីបច្ចេកទេសផលិតជីសិរីរាង្គ ថ្នាំសិរីរាង្គ បច្ចេកទេសដាំដុះ បច្ចេកទេសវេចខ្ចប់ និងស្វែងរក ទីផ្សារជូនពួកគាត់ផងដែរ។ ក្រោយពីបានចូលរួមអនុវត្តគម្រោងនេះ ប្រជាកសិករបានទទួលបានជោគជ័យក្នុងការដាំដុះ និងការដឹកជញ្ជូនទៅកាន់ទីផ្សារ។ ដោយឡែកទំហំនៃការដាំដុះនេះនៅមានកម្រិត ដូច្នេះឯកឧត្តមរដ្ឋមន្រ្តី បានណែនាំឲ្យកសិករពង្រីកការដាំដុះឲ្យបានទូលំទូលាយ ហើយឈានទៅជំរុញការផ្គង់ផ្គង់ដំណាំទាំងនោះនៅក្នុងផ្សារ ទំនើបនៅទីរួមខេត្តសៀមរាបឲ្យ បានកាន់តែច្រើនឡើង។ ទន្ទឹមនឹងនេះឯកឧត្តមរដ្ឋមន្រ្តី ក៏បានស្នើឲ្យមន្ទីរកសិកម្ម រុក្ខាប្រមាញ់ និងនេសាទខេត្ត ជួយសម្របសម្រួលរៀបចំទីផ្សារនៅក្នុងមូលដ្ឋានរបស់ ប្រជាកសិករដើម្បីកាត់បន្ថយចំណាយដឹកជញ្ជូន។ ឆ្លៀតក្នុងឱកាសនេះ ឯកឧត្តមរដ្ឋមន្រ្តី ក៏បានស្នើឲ្យធនាគារអភិវឌ្ឍន៏អាស៊ី រៀបចំប្រព័ន្ធព័ត៌មានវិទ្យា និងគេហទំព័រ សម្រាប់ជាមូលដ្ឋានក្នុងការពង្រីកការផ្សព្វផ្សាយផលិតផលកសិកម្ម របស់កសិករ និងផ្តល់ឱកាសឲ្យកសិករលក់ត្រង់នូវផលិតផលនៅលើគេហទំព័រនោះតែម្តង។