ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សំណេះសំណាលជាមួយថ្នាក់ដឹកនាំ និងមន្ត្រីរាជការនៃអគ្គនាយកដ្ឋានកសិកម្ម

ចេញ​ផ្សាយ​ ០៧ កុម្ភៈ ២០១៨ 2669

នៅថ្ងៃទី ២៦ ខែមេសា ឆ្នាំ២០១៦ វេលាម៉ោន ៨:៣០ ព្រឹក នៅអគ្គនាយកដ្ឋានកសិកម្មមានពិធីសំណេះសំណាលជាមួយថ្នាក់ដឹកនាំ និងមន្ត្រីនៃអគ្គនាយកដ្ឋានកសិកម្មក្រោមអធិបតីភាព ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ ចូលរួមក្នុងកម្មវិធីនេះផងដែរ រួមមានៈ ថ្នាក់ដឹកនាំក្រសួង និងថ្នាក់ដឹកនាំអង្គភាពជំនាញក្រោមឱវាទក្រសួងជាច្រើនរូបផងដែរ។ ក្រោយពីឯកឧត្តម សូខន ឫទី្ធគុណ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្មមានមតិស្វាគមន៍ និងរាយការណ៍ជូនអង្គពិធីរួចមក ឯកឧត្តមរដ្ឋមន្ត្រី បានធ្វើការសំណេះសំណាល ដោយកោតសរសើរ អគ្គនាយកដ្ឋានដែលជាអង្គភាពជួសមុខក្រសួងក្នុងផលិតកម្មស្បៀង និងការនាំចេញអង្ករ ដែលទទួលបានលទ្ធផលល្អប្រសើរ។ ឯកឧត្តមរដ្ឋមន្ត្រី បានណែនាំដល់អគ្គនាយកដ្ឋានកសិកម្មឲ្យ៖ រិះគិតតើត្រូវធ្វើអ្វីខ្លះ ដើម្បីដោះស្រាយដោយត្រៀមខ្លូនជាស្រេចជួយអន្តរាគមន៍ដល់កសិករក្នុងស្ថានភាពរាំងស្ងួត និងរលកកំដៅពីឥទ្ធិពលអែលនីណូដូចជា គ្រាប់ពូជដំណាំ ជី ថ្នាំកសិកម្មជាដើម។ អគ្គនាយកដ្ឋានកសិកម្មត្រូវគ្រោងថវិកាកម្មវិធី ជាពិសេសប្រាក់បំពេញភារកិច្ចឲ្យបានគ្រប់គ្រាន់ព្រោះត្រូវធ្វើការងារជាមួយកសិករច្រើន។ ការដោះស្រាយចំបញ្ហានឹងនាំដល់ការផ្តល់សេវាមានប្រសិទ្ធិភាពជូនប្រជាជន។ នៅចំពោះមុខថ្នាក់ដឹននាំក្រសួង ថ្នាក់ដឹកនាំអង្គភាពជំនាញក្រោមឱវាទ និងមន្ត្រីរាជការនៃអគ្គនាយកដ្ឋានកសិកម្ម ឯកឧត្តមរដ្ឋមន្ត្រីក៏បានធ្វើការណែនាំជាទូទៅថា៖ (១) បើកចំហរទទួលមតិ-យោបល់ពីមន្ត្រីដែលអាចផ្ញើរត្រង់មកឯកឧត្តមផ្ទាល់ក៏បាន ឬផ្ញើរតាមសារអេឡិចត្រូនិច (Email) របស់អគ្គលេខាធិការនៃក្រសួង (២) ខិតខំផ្តល់ភាពកក់ក្តៅដល់មន្ត្រីទាំងអស់នៃក្រសួង រវាងថ្នាក់លើ និងថ្នាក់ក្រោម (៣) មន្ត្រីថ្នាក់ដឹកនាំប្រកាន់អត្តចរិកស្លួតបូតតែម៉ឺងម៉ាត់ជាមួយមន្ត្រីថ្នាក់ក្រោម (៤)​ ថ្នាក់ដឹកនាំមិនត្រូវច្បាមយកការងារធ្វើតែឯងផ្ទុយទៅវិញត្រូវរិះរកការងារជូនមន្ត្រីថ្នាក់ក្រោមធ្វើ (៥) មន្ត្រីមិនត្រូវធ្វើជាខ្នងបងែ្អកដល់ក្រុមហ៊ុនឯកជន ដែលជាការឆ្គាំឆ្គងខ្លាំងណាស់ និងត្រូវលុបបំបាត់ចេញ (៦) មន្ត្រីគ្រប់ជាន់ថ្នាក់ប្រកាន់ខ្ជាប់សាមគ្គីភាពរឹងមាំ មិនត្រូវលាបពណ៌ដាក់គ្នា តែត្រូវដាស់តឿនក្រើនរំលឹកកែលំអនិងជួយគ្នាដើម្បីកុំឲ្យបែកបាក់គ្នា (៧) ថ្នាក់ដឹកនាំប្រកាន់យកភាពយុត្តិធម៌និងយកមន្ត្រីមានគុណសម្បត្តិនិងសមត្ថភាពឲ្យបំពេញការងារកុំខ្លាចមន្ត្រីថ្នាក់ក្រោមដណ្តើមគុណសម្បត្តិនិងតំណែង (៨) ថ្នាក់ដឹកនាំទាំងអស់កុំឃើញតែមន្ត្រីក្បែរខ្លួនតែសូមយកចិត្តទុកដាក់ដល់មន្ត្រីនៅបំពេញការងារ​​នៅមូលដ្ឋានឆ្ងាយៗតាមរយៈការលើកទឹកចិត្តដូចជាគិតគូរពីការស្នើគ្រឿងឥស្សរយស ការស្នើតម្លើងកាំប្រាក់បៀវត្ស ក៏ដូចជារៀបចំតម្លើងឋានៈស្របតាមគុណសម្បត្តិរបស់មន្ត្រីយើង (៩) ត្រូវប្រកាន់យកគោលនយោបាយ “សមូហភាពដឹកនាំ បុគ្គលទទួលខុសត្រូវ”​ ។ សរុបមកវិញ យើងចង់បានមន្ត្រីចេះយកចិត្តទុកដាក់ដល់មន្ត្រីផងគ្នា និងយកចិត្តទុកដាក់ជាមួយប្រជាជន។ រាល់បញ្ហា ឫដំណោះស្រាយឆ្លើយតប និងការផ្តល់សេវាជូនប្រជាជន អង្គភាពទាំងអស់ត្រូវមានក្នុង Facebook ឫ Website រាយការណ៍ដល់ថ្នាក់ដឹកនាំទទួលបន្ទុក និងបញ្ជូនជូន មជ្ឈមណ្ឌលព័ត៌មាន និងឯកសារកសិកម្ម ដើម្បីផ្សព្វផ្សាយបន្ត។ ជាទីបញ្ចប់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា គោលបំណងចំបងរបស់ក្រសួងយើងគឺ៖ ប្រជាជនទទួលបានសុខមាលភាពល្អ កសិករទទួលបានជិវភាពថ្កុំថ្កើន ធានាបាននិរន្តរភាពធនធានធម្មជាតិ និង ជំរុញកំណើនសេដ្ឋកិច្ចកម្ពុជា ។