ឯកឧត្តមរដ្ឋមន្រ្តី វេង សាខុន បានទទួលជួបពិភាក្សាការងារជាមួយគណៈប្រតិភូដែលអញ្ជើញមកពីក្រសួងកសិកម្ម និងនៃសាធារណរដ្ឋប្រជាមានិតចិន ក្នុងគោលបំណងអនុវត្តន៍ឲ្យបានទាន់ពេលវេលា លើការអនុវត្តអនុស្សរណៈនៃការយោគយល់គ្នា (MOU) ស្តីពីការរៀបចំផែនការអភិវឌ្ឍន៍កសិកម្មទំនើបនៅកម្ពុជា រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រសួងកសិកម្មនៃសាធារណរដ្ឋប្រជាមានិតចិន ដែលបានចូលជាធរមានកាលពីខែមករា ឆ្នាំ២០១៨

ចេញ​ផ្សាយ​ ១៥ សីហា ២០១៨ 2455

នៅទីស្តីការក្រសួងនាព្រឹកថ្ងៃអង្គារ ៣កើត ខែស្រាពណ៍ សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែសីហា ឆ្នាំ ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយគណៈប្រតិភូដែលអញ្ជើញមកពីក្រសួងកសិកម្ម និងនៃសាធារណរដ្ឋប្រជាមានិតចិន ក្នុងគោលបំណងអនុវត្តន៍ឲ្យបានទាន់ពេលវេលា លើការអនុវត្តអនុស្សរណៈនៃការយោគយល់គ្នា (MOU) ស្តីពីការរៀបចំផែនការអភិវឌ្ឍន៍កសិកម្មទំនើបនៅកម្ពុជា រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រសួងកសិកម្មនៃសាធារណរដ្ឋប្រជាមានិតចិន ដែលបានចូលជាធរមានកាលពីខែមករា ឆ្នាំ២០១៨។

មានមតិស្វាគមន៍គណៈប្រតិភូ ឯកឧត្តមរដ្ឋមន្រ្តីបានថ្លែងអំណរគុណ និងសូមធ្វើការវាយតម្លៃខ្ពស់ចំពោះលទ្ធផលទទួលបានដ៏ល្អប្រសើរ ដែលកើតចេញពីការខិតខំប្រឹងប្រែងរបស់ថ្នាក់ដឹកនាំប្រទេសទាំងពីរ និងក្រសួងពាក់ព័ន្ធដែលបានជួយគាំទ្រដល់ការអភិវឌ្ឍលើវិស័យកសិម្មកម្ពុជា។ ដោយឡែកបេសកកម្មរបស់គណៈប្រតិភូចិននាពេលនេះ មានសារៈសំខាន់ណាស់ស្របពេលដែលក្រសួងកសិកម្ម រុក្ខាប្រមាញ់ និងនេសាទ បាននិងកំពុងរៀបចំផែនការមេអភិវឌ្ឍន៍ និងការធ្វើទំនើបកម្ម វិស័យកសិកម្ម នៅកម្ពុជាសម្រាប់រយៈពេលវែង ២០១៩~២០៣០ ។
តាមផែនការដែលបានគ្រោងទុក ក្រុមបេសកកម្ម នឹងធ្វើការបែងចែកជាពីរក្រុម ដែលក្នុងមួយក្រុមៗមានសមាជិកចំនួន ៦ នាក់ ត្រូវចុះសិក្សាតាមបណ្តាខេត្តចំនួន១២ ដែលមានសក្តានុពលលើវិស័យកសិកម្ម ប្រាំមួយខេត្តនៅភាគខាងត្បូង និងប្រាំមួយខេត្តនៅភាគខាងជើងរាជធានីភ្នំពេញ ។ សូមបញ្ជាក់ថាបេសកកម្មនឹងបញ្ចប់របាយការណ៍បឋម របស់ខ្លួននៅបំណាច់ខែសីហាខាងមុខនេះ ហើយនឹងមានរៀបចំពិធីចុះហត្ថលេខាលើរបាយការណ៍បឋមនេះ រវាងភាគីកម្ពុជា និងភាគីចិន។