Other News
ក្រសួងកសិកម្ម រុក្ខាប្រមាញ់ និងនេសាទនឹងរៀបចំផែនការកៀរដីស្រែជូនប្រជាកសិករនៅទូទាំងប្រទេស
ចេញផ្សាយ ២២ មករា ២០១៨ 3923
ក្រសួងកសិកម្ម រុក្ខាប្រមាញ់ និងនេសាទនឹងរៀបចំផែនការកៀរពង្រាបដីស្រែជូនប្រជាកសិករនៅទូទាំងប្រទេស នេះគឺជាអនុសាសន៍របស់ឯកឧត្តមរដ្ឋមន្ត្រីក្នុងឱកាសចុះទៅពិនិត្យការកៀរដីស្រែដោយប្រើបច្ចេកទេស laser land levelling កាលពីថ្ងៃទី០៩ ខែកញ្ញា ដោយមានការចូលរួមពីឯកឧត្ដម ហេង វន្ថា អភិបាលរងខេត្ត លោក Nilkolas Vol លេខាទូតទី២ នៃស្ថានទូតអូស្ត្រាលី លោក Pitter RogerKam តំណាងឲ្យគម្រោង Cambodia Agriculture Value Chain ហៅថា CAVAC ឯកឧត្តមថ្នាកដឹកនាំ ប្រធានមន្ទីរអញ្ជើញមកពី ១២ ខេត្ត និងមន្ដ្រីថ្នាក់ដឹកនាំនាយកដ្ឋានជំនាញមួយចំនួនទៀត។
កម្មវិធីរៀបចំនៅភូមិពងទឹក ឃុំស្តេចគង់ខាងជើង ស្រុកបន្ទាយមាស ហើយបានជួបសំណេះសំណាលជាមួយប្រជាជនចំនួន ២០០ នាក់ផងដែរ។ លោកចាន់ ចេស្តា បានរាយការណ៍ជូនអង្គពិធីជ្រាបថាគម្រោងកៀរដីស្រែដោយប្រើបច្ចេកទេស laser land levelling បានផ្ទួចផ្តើមឡើងដោយអគ្គនាយកដ្ឋានកសិកម្ម សហការជាមួយមន្ទីរកសិកម្មខេត្តកំពត ក្រោមការជួយឧបត្ថម្ភថវិកាពីគម្រោង cavac នាឆ្នាំ ២០១១។
គម្រោងរួមមានការកៀរដី ការព្រោះស្រូវ ការថែរក្សា និងការប្រមូលផល ហើយថ្ងៃនេះដូចឯកឧត្តម លោក លោកស្រីបានឃើញលទ្ធផលដែលទទួលបានពីគ្រោងនេះគឺទិន្នផលស្រូវមានការកើនឡើង។ លោក ចាន់ សារុទ្ធ ប្រធាននាយកដ្ឋានគ្រឿងយន្តកសិកម្ម បានជម្រាបជូនអង្គពិធីនូវប្រវត្តិគម្រោងថា គម្រោងកៀរពង្រាបដីដោយប្រើប្រព័ន្ធ laser បានអនុវត្តសាកល្បងនៅកម្ពុជាតាំងពីឆ្នាំ ១៩៩៧ ប៉ុន្តែត្រូវបានបញ្ចប់ទៅវិញដោយពុំបានទទួលលទ្ធផលជាផ្លែផ្កាទេ ទើបឆ្នាំ ២០១១ គម្រោងបានចាប់ផ្តើមជាថ្មីក្នុងបំណងកៀរពង្រាបដីស្រែឲ្យស្មើល្អ កាត់បន្ថយរុក្ខជាតិគ្មានប្រយោជន៍ដែលដុះក្នុងស្រែ បង្កើនប្រសិទ្ធភាពនៃការគ្រប់គ្រងនិងប្រើប្រាស់ទឹក បង្កើនប្រសិទ្ធភាពនៃការប្រើប្រាស់ថ្នាំ និងជីកសិកម្មក្នុងកម្រិចបច្ចេកទេស ធ្វើឲ្យដើមស្រូវដុះលូតលាស់រឹងមាំបានល្អស្មើគ្នា មិនងាយដួល ស្រូវទុំស្រុះគ្នា។
លោកបានឲ្យដឹងថាគម្រោងនេះចាប់ផ្តើមព្រមគ្នាជាមួយប្រទេសវៀតណាម និងឥណ្ឌា ប៉ុន្តែនៅកម្ពុជាសកម្មភាពនេះត្រូវបានអសកម្មជាច្រើនឆ្នាំ ហេតុនេះតាមការណែនាំរបស់ឯកឧត្តមរដ្ឋមន្ត្រី នាយកដ្ឋានគ្រឿងយន្តកសិកម្ម មន្ទីរកសិកម្មខេត្តកំពត បានចាប់ផ្តើមយកគម្រោងនេះមកអនុវត្តជាថ្មីដោយមានការឧបត្ថម្ភថវិកាពីគម្រោង cavac ក្នុងផ្ទៃដី ៣០ នៃផែនការ។ លោកបង្ហាញពីផលចំណេញថាក្នុង ១ ហត អាចសន្សំប្រេងបូមទឹកបាន ១៧ លីត្រ សន្សំគ្រាប់ពូជបាន ១០០ គក្រ ទិន្នផលកើនបាន ០,៤៥ តោន សរុបក្នុង ១ ហត កសិករអាចចំណេញបាន ១៧៣ USD។
លោកអភិបាលរងខេត្តមានមតិថា នេះជាសកម្មភាពមួយរបស់ឯកឧត្តមរដ្ឋមន្ត្រីសបញ្ជាក់ពីការយកចិត្តទុកដាក់ក្នុងការជំរុញវិស័យកសិកម្មឲ្យមានការរីចម្រើន ក៏ដូចជារួមចំណែកកាត់បន្ថាយភាពក្រីក្ររបស់ប្រជាកសិករនៅជនបទ និងធ្វើយ៉ាងណាឲ្យបានសម្រេចនូវគោលនយោបាយរបស់រដ្ឋាភិបាលក្នុងការនាំចេញស្រូវអង្ករឲ្យបាន ១ លានតោននាឆ្នាំ២០១។ ខេត្តកំពតមានសំណាងជាងខេត្តនានាព្រោះបានទទួលគម្រោងនេះ និងគម្រោងជីប្រឡាយរបស់គម្រោង cavac ផងដែរ ធ្វើឲ្យកសិករអាចផលិតស្រូវបាន ២ ដងក្នុង ១ រដូវ និងទិន្នផលស្រូវមានការកើនឡើង ជីវភាពធូធារ លោកបានស្នើសុំឲ្យក្រសួងជួយកៀរព្រាបដីជូនកសិករឲ្យបាន ៣០០ ហត បន្ថែមទៀត ដោយសារលទ្ធផលបង្ហាញឲ្យឃើញយ៉ាងច្បាស់ទិន្នផលស្រូវពិតជាកើន។
នាឱកាសនោះលោក Nilkolas Vol និងលោក Pitter RogerKam ទាក់ទងនឹងវិស័យកសិកម្មកម្ពុជាមាន ការរីកចម្រើនគួរឲ្យកត់សម្គាល់ ព្រមជាមួយនេះពិភពលោកក៏មានការរីកចម្រើនផងដែរ ប្រជាជនពិភពលោកមានការកើនឡើងជាលំដាប់ សេចក្តីត្រូវការស្បៀងក៏ចេះតែកើនឡើង នេះជាឱកាសរបស់ប្រជាកសិករកម្ពុជាដែលត្រូវតែ ប្រើប្រាស់ដីដែលមានសក្តានុពលរបស់ខ្លួនឲ្យអស់លទ្ធភាពធ្វើយ៉ាងណាផ្គត់ផ្គង់ស្បៀងក្នុងគ្រួសារឲ្យបានគ្រប់គ្រាន់ និងជួយចិញ្ចឹមប្រជាជននៅទូទាំងពិភាពលោកផងដែរ ហើយនេះរាជរដ្ឋាភិបាល ក៏ដូចជាក្រសួងកសិកម្មកំពុងតែ យកចិត្តទុកដាក់ ដូចមានគោលនយោបាយជំរុញការនាំចេញអង្ករឲ្យបាន ១ លានតោន នាឆ្នាំ ២០១៥ ជាភស្តុតាង ស្រាប់។ ក្នុងនាមលោកខ្លួនឯងផ្ទាល់ រដ្ឋាភិបាល និងប្រជាជនអូស្ត្រាលី លោកយល់ឃើញថារដ្ឋាភិបាលកម្ពុជាកំពុងតែដើរលើផ្លូវមួយដ៏ត្រឹមត្រូវក្នុងការទទួលយកបច្ចេកវិទ្យាមកអនុវត្តដើម្បីអភិវឌ្ឍន៍វិស័យកសិកម្មក្នុងប្រទេស ហេតុនេះ រដ្ឋាភិបាលអូស្ត្រាលីមានមោទនភាពក្នុងការបន្តជួយគាំទ្រគ្រប់បែបយ៉ាងតាមរយៈគម្រោងនានារបស់រដ្ឋាភិបាលទាំងពីរនាពេលអនាគត។
មានមតិសំណេះសំណាលនាឱកាសនោះ ឯកឧត្តមរដ្ឋមន្ត្រី បានជម្រាបជូនអង្គពិធីជ្រាបថា រដ្ឋាភិបាលអូស្ត្រាលីបានផ្តល់ជំនួយដល់ក្រសួងកសិកម្មតាំងពីឆ្នាំ ១៩៨៧ កាលនោះទិន្នផលស្រូវទើបតែទទួលបាន ១,៦ តោន/ហត គម្រោងនានាត្រូវបានបន្តរហូតដល់ឆ្នាំ ១៩៩៥ ទិន្នផលស្រូវបន្តកើនបាន ១,៨ តោន/ហត ហើយបច្ចុប្បន្នទិន្នផលបានកើនដល់ ៣,១៧ តោន/ហត លទ្ធផលនេះមួយផ្នែកធំគឺបានមកពីអ្នកបច្ចេកទេស និងជំនាញការអូស្ត្រាលីតាមរយៈវិទ្យាស្ថានស្រាវជ្រាវដំណាំស្រូវអន្តរជាតិហៅថា IRRI មិនត្រឹមតែប៉ុណ្ពោះរដ្ឋាភិបាលអូស្ត្រាលីក៏បានជួយបង្កើតវិទ្យាស្ថានស្រាវជ្រាវនិងអភិវឌ្ឍន៍កសិកម្មកម្ពុជា ហៅថា CARDI ដែលកំពុងបំពេញតួនាទីយ៉ាងសកម្មក្នុងការស្រាវជ្រាវនិងផ្សព្វផ្សាយពូជស្រូវនៅកម្ពុជា។
ជំនួយទាំងអស់នេះគឺជាចលករមួយដ៏សំខាន់ក្នុងការជួយជំរុញឲ្យប្រទេសកម្ពុជាចូលរួមចំណែកជួយផ្គត់ផ្គង់ស្បៀងចិញ្ចឹមពិភពលោកនាពេលអនាគត។ ជំនួយ សកម្មភាពមនុស្សធន៌ និងកិច្ចសហប្រតិបត្តិការដ៏ល្អប្រសើរនេះ រាជរដ្ឋាភិបាលកម្ពុជាក៏ដូចជាក្រសួងកសិកម្មសូមថ្លែងនូវអំណរអរគុណយ៉ាងជ្រាលជ្រៅជូនដល់រដ្ឋាភិបាលនិងប្រជាជនអូស្ត្រាលី ហើយសង្ឃឹមថាកិច្ចសហប្រតិបត្តិការរវាងប្រទេសយើងទាំងពីរនឹងបន្តរីកចម្រើនថែមទៀត។ លោករដ្ឋមន្ត្រីបន្តថា តាំងពីបុរាណកាលមក ការធ្វើស្រែរបស់កសិករមិនបានពង្រាបដីឲ្យស្នើល្អទេ ចំណុចនេះគឺជាការអនុវត្តខុសបច្ចកទេស ព្រោះការកៀរដីឲ្យស្នើគឺបានធ្វើឲ្យទិន្នផលស្រូវកើនឡើងពី ១៥ ទៅ ២០% រួចទៅហើយរួមទាំងសន្សំសំចៃទឹក ពូជ ជី និងមានប្រយោជន៍ច្រើនទៀតដូចដែលលោកចាន សារុទ្ធបានជម្រាបជូនខាងលើ។
ដោយឃើញនូវសារៈប្រយោជន៍ដ៏ច្រើនយ៉ាងនេះ លោកបានឲ្យអគ្គនាយកដ្ឋានកសិកម្ម នាយកដ្ឋានគ្រឿងយន្តកសិកម្ម នាយកដ្ឋានផែនការស្ថិតិ ត្រូវរៀបចំដាក់បញ្ជូលសកម្មភាពនេះក្នុងផែនការប្រចាំឆ្នាំរបស់ក្រសួង ចាប់ពីឆ្នាំ ២០១៣ មន្ទីរកសិកម្មរាជធានី ខេត្ត ត្រូវរៀបចំផែនការពង្រាបដីជូនកសិករ។ នាយកដ្ឋានគ្រឿងយន្តក៏ត្រូវរៀបចំធ្វើបង្ហាញនៅតាមស្ថានីយ មជ្ឈមណ្ឌលនានាទូទាំងប្រទេសឲ្យទូលំទូលាយ។ ក្នុងឱកាសនេះ លោកបានជម្រាបជូនអង្គពិធីផងដែរពីសកម្មភាពបង្កបង្កើនផលគិតមកត្រឹមថ្ងៃទី ៥ ខែកញ្ញា មាន ១៣ ខេត្តសម្រេចបាន ១០០% ៤ ខេត្តលើសពី ៩០% ៤ ខេត្តលើសពី ៨០% ១ ខេត្តលើសពី ៧០% និងពីរខេត្តទើបតែសម្រេចបាន ៦០% គឺខេត្តកំពត និងកំពង់ស្ពឺ។
