ឯកឧត្តមរដ្ឋមន្រ្តី វេង សាខុន បានអនុញ្ញាតឯកឧត្តម Panyarak Poolthup ឯកអគ្គរាជទូតវិសាមញ្ញនិងពេញសមត្ថភាព ដែលទើបតែទទួលសារតាំងជាឯកអគ្គរាជទូតថ្មី ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ៤ មិថុនា ២០១៨ 4092

រសៀលថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ នៅទីស្តីការក្រសួង ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឯកឧត្តម Panyarak Poolthup ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រថៃប្រចាំព្រះរាជាណាចក្រកម្ពុជា ដែលទើបតែទទួលសារតាំងជាឯកអគ្គរាជទូតថ្មីកាលពីថ្ងៃទី១៩ ខែមេសា ឆ្នាំ២០១៨ កន្លងមកចូលជួបសម្តែងការគួរសមនិងពិភាក្សាការងារក្នុងគោលបំណងពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរ ជាពិសេសលើវិស័យកសិកម្ម។ មានប្រសាសន៍នាឱកាសនេះ ឯកឧត្តមរដ្ឋមន្រ្តីបានសម្តែងនូវកិច្ចស្វាគមន៍ និងអបអរសាទរជូនចំពោះឯកឧត្តមឯកអគ្គរាជទូតដែលត្រូវបានតែងតាំងឲ្យមកបំពេញការងារការទូតក្នុងព្រះរាជាណាចក្រកម្ពុជា។ ឯកឧត្តមរដ្ឋមន្រ្តីបានសម្តែងនូវអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលថៃ ដែលកន្លងមកបានជួយគាំទ្រនិងផ្តល់កិច្ចសហប្រតិបត្តិការលើគ្រប់វិស័យ ជាពិសេសវិស័យកសិកម្មក្នុងនោះមានកិច្ចសហប្រតិបត្តិការលើការងារសុខភាពសត្វ និងផលិតកម្មសត្វ ការបណ្តុះបណ្តាលធនធាន មនុស្សទាក់ទងនិងវិស័យកសិកម្ម ការទទួលទិញកសិផលកម្ពុជា ពិសេសផលិតផលដំឡូងមី។ល។

ឯកឧត្តមរដ្ឋមន្រ្តី សង្ឃឹមនិងជឿជាក់ថាប្រទេសថៃនិងបន្តការគាំទ្រ ផ្តល់កិច្ចសហប្រតិបត្តិការឲ្យកាន់តែរឺងមាំ និងល្អប្រសើរថែមទៀត ពិសេសការធ្វើពាណិជ្ជកម្មលើផលិផលកសិកម្ម។ ឯកឧត្តមឯកអគ្គរាជទូត បានកោតសរសើរពីការរីកចម្រើនរបស់ប្រទេសកម្ពុជា ដែលក្នុងនោះវិស័យហេដ្ឋារចនាសម្ព័ន្ធគ្រប់បែបយ៉ាង ដែលជាចលករមួយដ៏សំខាន់ជួយជំរុញកំណើនសេដ្ឋកិច្ចរបស់កម្ពុជាតាមរយៈការនាំចេញផលិតផល និងកសិផលទៅកាន់ទីផ្សារអន្តរជាតិ។ ឯកឧត្តមឯកអគ្គរដ្ឋទូតបានវាយតម្លៃខ្ពស់លើកិច្ចសហប្រតិបត្តិការរវាងប្រទេសទាំងពីរនាពេលកន្លងមក ពិសេសលើវិស័យកសិកម្ម ហើយឯកឧត្តមឯកអគ្គរដ្ឋទូតបានសម្តែងនូវអំណរគុណយ៉ាងជ្រាលជ្រៅជូនចំពោះឯកឧត្តមរដ្ឋមន្រ្តី ឯកឧត្តមថ្នាក់ដឹងនាំក្រសួងគ្រប់លំដាប់ថ្នាក់ដែលបានផ្តល់កិច្ចសហប្រតិបត្តិការជាមួយរាជរដ្ឋាភិបាលថៃ ក្រុមការងារបច្ចេកទេសថៃ និងវិនិយោគិនថៃបានយ៉ាងល្អប្រសើរ។ ក្នុងឱកាសបំពេញបេសកកម្មការទួតនៅព្រះរាជាណាចក្រកម្ពុជា ឯកឧត្តមឯកអគ្គរដ្ឋទូតបានសន្យាថានឹងខិតខំអស់លទ្ធភាព ធ្វើយ៉ាងណាជួយជំរុញ ពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរឲ្យបាន់តែល្អប្រសើរមួយកម្រិតទៀត។ ក្នុងជំនួបនាថ្ងៃនេះ ភាគីទាំងពីរបានលើកយកប្រធានបទសំខាន់ៗមួយចំនួនមកពិភាក្សាមានជាអាទិ៍៖

ទី១.កិច្ចសហប្រតិបត្តិការលើការកំណត់តំបន់ដាំដុះឲ្យបានសមស្របតាមស្ថានភាព គុណភាពដី ប្រភេទពូជ ភាពអំណោយផលនៃទឹក និងការប្រែប្រួលអាកាសធាតុ ដែលប្រទេសថៃធ្លាប់មានបទពិសោធន៍កន្លងមក

ទី២. ការគ្រប់គ្រងសហគមន៍ព្រៃឈើឲ្យមាននិរន្តរភាព ការធ្វើឲ្យប្រសើរឡើងនូវកម្រិតជីវភាពរបស់ប្រជាសហគមន៍តាមរយៈការបង្កើតមុខរបស់ថ្មី ដើម្បីកាត់បន្ថយការពឹងផ្អែកលើផលនិងអនុផលព្រៃឈើតែមួយមុខ

ទី៣. ការសហការលើការអនុវត្តកសិកម្មតាមកិច្ចសន្យា (Contract Farming) រវាងប្រទេសទាំងពីរឲ្យកាន់តែមានប្រសិទ្ធភាព

ទី៤. ជំរុញកិច្ចសហប្រតិបត្តិការលើវិស័យជលផល តាមរយៈការចុះអនុស្សរណយោគយល់គ្នារវាងប្រទេសទាំងពីរ ដើម្បីធ្វើការគ្រប់គ្រង និងទប់ស្កាត់បទល្មើសនេសាទឲ្យមានប្រសិទ្ធភាព។ ជំនួបការទូតនេះត្រូវបានបញ្ចប់ទៅប្រកបដោយលទ្ធផលល្អ និងសហប្រតិបត្តិការខ្ពស់។