ឯកឧត្តមរដ្ឋលេខាធិការ ហ៊ាន វណ្ណហន អញ្ជើញចូលរួមប្រជុំក្រុមការងារដឹកនាំគ្រប់គ្រងអន្តរកម្មវិធីប្រចាំតំបន់មេគង្គលើ

ចេញ​ផ្សាយ​ ៦ សីហា ២០២៥ 230

នៅថ្ងៃទី៥ ខែសីហា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមដឹកនាំគ្រប់គ្រងអន្តរកម្មវិធីប្រចាំតំបន់មេគង្គលើ  ដោយមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ដែលជាអនុប្រធាន និងសមាជិកក្រុមការងារ តំណាងប្រធានអង្គភាពគ្រប់គ្រងថវិកា តំណាងមន្ទីរកសិកម្ម រុក្ខាប្រមាញ់ និងនេសាទ និងមន្រ្ដីទទួលបន្ទុកផែនការ និងថវិកានៃខេត្ដទាំង៦ ក្នុងតំបន់មេគង្គលើ។

ក្នុងកិច្ចប្រជុំនេះ បានបង្ហាញពីសមាសភាពក្រុមការងារមេគង្គលើ តួនាទីភារកិច្ច ការតម្រង់ទិសផែនការយុទ្ធសាស្ត្រអភិវឌ្ឍន៍តំបន់មេគង្គលើ និងការកំណត់របៀបរបបរៀបចំរបាយការណ៍និងកិច្ចប្រជុំក្រុមការងារផងដែរ។

ឯកឧត្តមរដ្ឋលេខាធិការ បានគូសបញ្ជាក់ថា អង្គប្រជុំបានផ្តោតសំខាន់លើការបន្ស៊ីគ្នារវាងផែនការសកម្មភាពរបស់អង្គភាពគ្រប់គ្រងថវិកាថ្នាក់កណ្តាលនិងថ្នាក់ខេត្ត សំដៅចូលរួមគាំទ្រផែនការយុទ្ធសាស្ត្ររបស់ក្រសួងកសិកម្ម រុក្ខាប្រមាញ់ និងនេសាទឱ្យកាន់តែមានប្រសិទ្ធភាព។ ជាពិសេស មន្ទីរកសិកម្ម រុក្ខាប្រមាញ់ និងនេសាទខេត្តក្នុងតំបន់មេគង្គលើ ត្រូវកំណត់មុខសញ្ញាអាទិភាពនិងបញ្ហាប្រឈមឱ្យបានច្បាស់លាស់ ដើម្បីជាមូលដ្ឋានសម្រាប់អង្គភាពជំនាញថ្នាក់កណ្តាលនឹងរៀបចំផែនការសកម្មភាព និងថវិកាឆ្លើយតបនឹងមុខសញ្ញាអាទិភាពនិងបញ្ហាប្រឈមទាំងនោះ។

បើតាមឯកឧត្តមរដ្ឋលេខាធិការ  អង្គប្រជុំបានឯកភាពអំពីយន្តការអនុវត្តន៍ ដោយស្នើអង្គភាពជំនាញពាក់ព័ន្ធផ្តល់ព័ត៌មានអំពីផែនការសកម្មនិងថវិកា និងវឌ្ឍនភាពនៃការអនុវត្តន៍ក្នុងឆ្នាំ២០២៥ គិតចាប់ពីត្រីមាសទី៣ ឆ្នាំ២០២៥ ហើយក្រុមការងារនឹងរៀបចំកិច្ចប្រជុំពិនិត្យរបាយការណ៍ រៀងរាល់៣ខែម្តង យោងតាមសេចក្ដីសម្រេច។

ជាចុងបញ្ចប់ ឯកឧត្តមរដ្ឋលេខាធិការ ស្នើសុំបញ្ចូលប្រធានអង្គភាពថវិកា និងមន្រ្ដីពាក់ព័ន្ធសំខាន់ៗ ចូលក្នុងសេចក្តីសម្រេចក្រុមលេខាធិការដ្ឋាន៕