Other News
ជំរុញឲ្យមានកសិករទទួលបច្ចេកទេសថ្មី
ចេញផ្សាយ ២២ មករា ២០១៨ 2803
ឯកឧត្តមបណ្ដិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអះអាងថា ត្រូវតែជំរុញឲ្យកសិករទទួលយកនូវបច្ចេកវិជ្ជាថ្មី ក្នុងការបង្កបង្កើន ពោលការអនុវត្តន៍ប.វ.ស ។ ឯកឧត្តមរដ្ឋមន្ត្រី បានប្រាប់មន្ត្រីកសិកម្ម នៅខេត្តបន្ទាយមានជ័យ ដែលជាខេត្តជង្រុកស្រូវមួយដែរថា ឆ្នាំ២០១០ នៅទូទាំងប្រទេសទទួលបានទិន្នផលស្រូវ បានយ៉ាងល្អប្រសើរ បើធៀបទៅនឹងទិន្នផលជាមួយប្រទេសជិតខាង។
ហេតុផលនេះ គឺបណ្តាលមកពីប្រទេសគេ មានលក្ខណៈអំណោយផលខាងធារាសាស្ត្រា ដែលអាចធ្វើឲ្យគេបង្កើនរដូវដាំដុះ បាន២ ទៅ៣ដង ហើយការអនុវត្តន៍បច្ចេកទេស ក៏បានទូលំទូលាយ។
ឯកឧត្តមបន្តទៀតថា ទោះបីជាយ៉ាងនេះក្តី ក្រសួងកសិកម្ម បានខិតខំយកអស់កម្លាំងកាយ ចិត្តអនុវត្តគោលនយោបាយ របស់រដ្ឋាភិបាល សម្រាប់ឆ្នាំ២០១៥ នាំចេញអង្ករឲ្យបាន១លានតោន ក្នុងមួយឆ្នាំ ហើយក៏ដូចជាអនុវត្តតាមអនុសាសន៍ របស់សម្តេចតេជោ ហ៊ុន សែន ថាឈប់ផលិតស្រូវ សម្រាប់ផ្គត់ផ្គង់ក្នុងគ្រួសារ តែត្រូវផលិតឲ្យលើសពីការហូបចុក ដើម្បីធ្វើពាណិជ្ជកម្មវិញ តែត្រូវរួមគ្នាប្រមូលផ្តុំគ្នាផលិតពូជណាមួយ ដែលទីផ្សារត្រូវការ ទាំងបរិមាណ និងគុណភាព។
ឯកឧត្តមបានបន្តថា ដើម្បីសម្រេចតាមគោលបំណងខាងលើ យើងត្រូវទទួលយកនូវបច្ចេកវិជ្ជា ប.វ.ស ការប្រើប្រាស់ពូជ ជី ទឹក ការធ្វើដី និងការថែទាំ។ អនុវត្តតាមបច្ចេកទេស ឲ្យបានទូលំទូលាយ និងស៊ីជម្រៅដល់ស្រទាប់ប្រជាកសិករ។
ពូជជាកត្តាសំខាន់ ក្នុងការបង្កើនទិន្នផលស្រូវ បើដូច្នេះមន្ទីរកសិកម្មខេត្ត ត្រូវចុះមកពន្យល់ណែនាំ ឲ្យប្រជាកសិករប្តូរពូជ និងផ្សព្វផ្សាយពូជទាំង១០ ដែលក្រសួងបានបញ្ចេញរួចហើយ។ នាយកដ្ឋានដំណាំស្រូវ ក៏ដូចជាមន្ទីរកសិកម្ម ត្រូវសហការជាមួយមន្ទីរកសិកម្ម ត្រូវរៀបចំផែនការធ្វើប.វ.ស ឲ្យបានច្បាស់លាស់។ អគ្គនាយកដ្ឋានកសិកម្ម ត្រូវសហការជាមួយមន្ទីរកសិកម្មរាជធានី-ខេត្ត ត្រូវរៀបចំកម្មវិធីទស្សនកិច្ច សិក្សាផ្លាស់ប្តូរបទពិសោធន៍ និងចែករំលែកបទពិសោធន៍រវាងកសិករ និងកសិករ មន្ត្រី និងមន្ត្រី ដើម្បីរកការរីកចម្រើន និងដោះស្រាយបញ្ហា។
ឯកឧត្តមបញ្ជាក់ថា អគ្គនាយកដ្ឋានកសិកម្ម នាយកដ្ឋានដំណាំស្រូវ និងមន្ទីរត្រូវស្រាវជ្រាវ និងផ្សព្វផ្សាយពីការជួយទំនុកបម្រុង និងថែរក្សាគុណភាពដីដល់ប្រជាកសិករ (គុណភាពដីល្អ ធ្វើឲ្យទិន្នផលខ្ពស់ ទើបជីវភាពសម្បូរធូរធារ) ។
