ឯកឧត្តមសាស្ត្រចារ្យបណ្ឌិត ច័ន្ទ សារុន អញ្ជើញចូលរួមកិច្ចប្រជុំថ្នាក់រដ្ឋមន្ត្រីចិន អាស៊ានលើកទី៣

ចេញ​ផ្សាយ​ ២២ មករា ២០១៨ 3020

យោងតាម​ការអញ្ជើញរ​បស់ ឯកឧត្តម Zhi Shuping រដ្ឋមន្ត្រី​នៃ​អាជ្ញាធរ AQSIQ នៃ​សាធារណរដ្ឋ​ប្រជាមានិត​ចិន ឯកឧត្តម​សាស្ត្រ​ចា​រ្យ​បណ្ឌិត ច័ន្ទ សារុន អមដំណើរ​ដោយ​ឯកឧត្តម សាន វណ្ណ​ទី អនុរដ្ឋលេខាធិការ​ក្រសួងកសិកម្ម រុក្ខាប្រមាញ់ និង​នេសាទ និង​ថ្នាក់ដឹកនាំ​អង្គភាព​ជំនាញ បាន​អញ្ជើញ​ទៅ​ចូលរួម​កិច្ចប្រជុំ​ថ្នាក់​រដ្ឋមន្ត្រី​ចិន អាស៊ាន​លើក​ទី៣ ស្តីពី​កិច្ចសហប្រតិបត្តិការ​អនាម័យ និង​ភូតគាម​អនាម័យ នៅ​ទីក្រុង​ណាន​នី​ង ប្រទេស​ចិន (Third China-ASEAN Ministerial Meeting on Quality Supervision, Inspection and Quarantine –SPS Cooperation) ពីថ្ងៃ​ទី១៩ ដល់​ថ្ងៃទី២១ ខែកញ្ញា ឆ្នាំ២០១២។

តាម​កម្មវិធី​ដែល​បានគ្រោង​ទុក កិច្ច​ប្រជុំបាន​ពិនិត្យ​របាយការណ៍ និង​អនុសាសន៍​របស់​កិច្ចប្រជុំ China-ASEAN SPS Contact Points ពិភាក្សា​និង​អនុម័ត​លើ China-ASEAN SPS MOU Plan of Action 2013-2014 និង​ពិភាក្សា និង​អនុម័ត​លើ Joint Press Statement on SPS Cooperation។

កន្លងមក តាមរយៈ​កិច្ច​ប​សហប្រតិបត្តិការ​នេះ ក្រសួងកសិកម្ម រុក្ខាប្រមាញ់ និង​នេសាទ​បាន​ចុះ​ពិធីសារ​ជាមួយ AQSIQ លើ​ការនាំ​អង្ករ​កម្ពុជា​ទៅកាន់​ប្រទេស​ចិន នៅ​ភ្នំពេញ នា​ថ្ងៃទី២២ ខែតុលា ឆ្នាំ២០១០ ដោយមាន​សុពលភាព​ចំនួន ៣ឆ្នាំ។ គិត​ត្រឹម​ថ្ងៃទី១៣ ខែកញ្ញា ឆ្នាំ២០១២ ការនាំ​អង្ករ​ទៅ​ចិន គឺ​បាន​ចំនួន  ២ ៤៤៦តោន។ ជាមួយនេះ នៅ​ថ្ងៃទី១៣ ខែធ្នូ ឆ្នាំ២០១០ ក្រសួងកសិកម្ម រុក្ខាប្រមាញ់ និង​នេសាទ ក៏បាន​ចុះ​ពិធីសារ​មួយទៀត​ជាមួយ  AQSIQ លើ​ការនាំ​ផលិត ផល​ដំឡូង​ម៉ី​កម្ពុជា​ទៅកាន់​ប្រទេស​ចិន។ ពិធីសារ​នេះ​បាន​ចុះហត្ថលេខា​នៅ​ប៉េកាំង ដោយមាន​សុពលភាព​ចំនួន ២ឆ្នាំ ហើយនឹង​ត្រូវ​បន្ត​សុពលភាព​ដោយ​ស្វ័យប្រវត្តិ​ចំនួន ២ឆ្នាំ​បន្ត។ គិត​ត្រឹម​ខែកញ្ញា ឆ្នាំ ២០១២ ការនាំចេញ​ផលិតផល​ដំឡូង​ម៉ី​កម្ពុជា​ទៅកាន់​ប្រទេស​ចិន​បាន​ចំនួន​សរុប​ជាង ១៥ ម៉ឺន​តោន។

ក្នុងឱកាស​នា​ការ​ស្នាក់នៅ​ទីក្រុង​ណាន​នី​ង​នេះដែរ ឯកឧត្តម​សាស្ត្រ​ចា​រ្យ​បណ្ឌិត ច័ន្ទ សារុន គ្រោង​នឹង​ជួបប្រជុំ​ទ្វេភាគី​ជាមួយ AQSIQ ដើម្បី​ពិភាក្សា​ពី​ការវាយតម្លៃ​ពាក់កណ្តាល​អាណត្តិ​លើ​ការអនុវត្ត​ពិធីសារ​លើ​ការនាំ​អង្ករ និង​ផលិត ផល​ដំឡូង​ម៉ី​កម្ពុជា​ទៅកាន់​ប្រទេស​ចិន និង​ចរចា​បន្ត​លើ​ពិធីសារ​សម្រាប់​ផលិតផល​កសិកម្ម​ដទៃ​ទៀតផង​ដែរ។