ឯកឧត្តម ឡឹក សុធារ អនុរដ្ឋលេខាធិការក្រសួងកសិកម្ម អញ្ជើញដឹកនាំក្រុមការងារជំនាញចុះត្រួតពិនិត្យវាយតម្លៃលើស្ថានភាពបំផ្លិចបំផ្លាញរបស់ដង្កូវហ្វូងលើដំណាំកសិករ នៅខេត្តព្រះវិហារ

ចេញ​ផ្សាយ​ ០១ កក្កដា ២០២៤ 931

នៅថ្ងៃទី២៩ ខែមិថុនា ឆ្នាំ២០២៤ ឯកឧត្តម ឡឹក សុធារ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ លោកប្រធាននាយកដ្ឋានដំណាំឧស្សាហកម្ម និងមន្រ្តីជំនាញបច្ចេកទេសរបស់ក្រសួង មន្រ្តីកសិកម្មស្រុកត្បែងមានជ័យ និងស្រុកគូលេន អាជ្ញាធរមូលដ្ឋាន និងមន្ត្រីកសិកម្មឃុំ-សង្កាត់ បានចុះពិនិត្យវាយតម្លៃលើស្ថានភាពនៃការបំផ្លិចបំផ្លាញរបស់ដង្កូវហ្វូងលើដំណាំស្រូវ និងដំណាំដំឡូងមី របស់ប្រជាកសិករ។

ចាប់តាំងពីដើម ខែមិថុនាមក ដង្កូវហ្វូងបានបំផ្លិចបំផ្លាញដំណាំនៅក្នុងខេត្ត សរុបចំនួន ៤៥៩២ហិកតា ក្នុងនោះស្រូវ មានចំនួន ១ ២២១ ហិកតា ស្មើនឹង ២,១ % ធៀបនឹងផ្ទៃដីដាំដុះរួច និងដំឡូងមី ៣ ៣៧១  ហិកតា ស្មើនឹង ៧,៦% ធៀបនឹងផ្ទៃដីដាំដុះ។ មន្ទីរកសិកម្មខេត្តបានចាត់វិធានការចាំបាច់នានា ដូចជាវិធានការមេកានិច ជីវសាស្ត្រ  និងគីមី ដើម្បីទប់ស្កាត់ និងកម្ចាត់ដង្កូវហ្វូងនេះ។

ជាមួយគ្នានោះមន្ទីរកសិកម្មខេត្ត ក៏បានរៀបចំវគ្គបណ្តុះបណ្តាល និងផ្សព្វផ្សាយ ចំនួន១០វគ្គ ស្ដីពីវិធានការគ្រប់គ្រង និងកម្ចាត់សមាសភាពចង្រៃ ដោយមានការចូលរួមពីអាជ្ញាធរស្រុក ឃុំ ភូមិ  និងមន្ត្រីកសិកម្មឃុំ-សង្កាត់ផងដែរ។ ក្រៅពីនោះទៀត មន្ទីរកសិកម្មខេត្តបានចែកជូនដល់អាជ្ញាធរមូលដ្ឋាន កសិករ និងអ្នកពាក់ព័ន្ធ នូវឯកសារបច្ចេកទេស ខិតប័ណ្ណ សៀវភៅគោលការណែនាំ ស្តីអំពីវិធីសាស្ត្រប្រើប្រាស់ថ្នាំកសិកម្ម ផ្ទាំងរូបភាពបច្ចេកទេសគ្រប់គ្រងសមាសភាពចង្រៃលើដំណាំ និងឯកសារបច្ចេកទេសកសិកម្មមួយចំនួនទៀត។

តាមរយៈការចុះអន្តរាគមន៍ និងការខិតខំប្រឹងប្រែងរបស់ប្រជាកសិករជាម្ចាស់ស្រែចម្ការ ព្រមទាំងអ្នកពាក់ព័ន្ធផ្សេងៗទៀត និងដោយសារមានភ្លៀងធ្លាក់ជាប្រចាំប៉ុន្មានថ្ងៃជាប់ៗគ្នាផងនោះ បានធ្វើឲ្យវត្តមានដង្កូវហ្វូងនៅក្នុងស្រុកទាំង៧ក្នុងខេត្តព្រះវិហារ មានការថមថយ និងស្ទើរបាត់ទាំងស្រុង។ តាមការវាយតម្លៃ ស្រូវមានការដុះលូតលាស់ឡើងវិញបាន ១០០% រីឯដំឡូងមី បានដុះលូតលាស់ចេញត្រួយថ្មីប្រមាណ៩០%។ ប៉ុន្តែទោះជាយ៉ាងនេះក្ដី ក្រុមការងារបច្ចេកទេសបានរកឃើញដុកឌឿជាច្រើននៅតាមពំនូកដី និងភ្លឺខ្ពស់ៗ។ ក្នុងលក្ខខណ្ឌសមប្រកបណាមួយ (កូនរដូវប្រាំង) ដុកឌឿទាំងនេះ នឹងអាចញាស់ជាមេអំបៅ ហើយអាចបង្កជាការផ្ទុះឡើងដង្កូវហ្វូងជាលើកទី២ទៀត។

នាឱកាសចុះត្រួតពិនិត្យនោះ ឯកឧត្តម ឡឹក សុធារ បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត និងមន្រ្តីកសិកម្មឃុំ សូមបន្តតាមដានវត្តមានមេអំបៅ និងដង្កូវហ្វូងនេះ និងបន្តរាយការណ៍ ដើម្បីស្វែងរកអន្តរាគមន៍បន្ទាន់។ លើសពីនេះទៀត ឯកឧត្តមបានណែនាំឱ្យមន្ទីរកសិកម្មខេត្ត រៀបចំជាផែនទីស្ដីពីការបំផ្លាញដំណាំពីដង្កូវហ្វូង ក្នុងកម្រិតឃុំ និងបន្តតាមដានការលូតលាស់ និងទិន្នផលរបស់ដំណាំដែលរងការបំផ្លិចបំផ្លាញផងដែរ (ជាពិសេសដំឡូងមី)៕