រដ្ឋមន្ត្រី​បារម្ភ​ខ្លាច​បាត់​ពូជ​ក្របី

ចេញ​ផ្សាយ​ ១៥ មករា ២០១៨ 5064

លោក​រដ្ឋមន្ត្រី​​​​​ ​​​ក្រសួងកសិកម្ម ​បាន​សម្តែង ​នូវ​ការបារម្ភ​ណ៍​ខ្លាច​បាត់​ពូជក្របី។ ការបង្ហាញ​នូវ​អារម្មណ៍​បែបនេះ បាន​កើតឡើង​​​​ ក្នុង​ពិធី​ប្រគល់​ ក្របី​ចំនួន២៣ក្បាល ​ដល់​សង្គហកសិករ​នៅ​ភូមិ​ដំរី​កូន ឃុំ​អញ្ចាញ​រូង ស្រុក​បរិ​បរ​ណ៍ កាលពីដើម​សបា្តហ៍​នេះ។

នៅ​ចំពោះមុខ​កសិករ ​ចំនួន៥០នាក់ ​ដែល​មក​ចូលរួម​ទទួល​អំណោយ​ថ្មី​នោះ​ លោក​រដ្ឋមន្ត្រី​បាន មានប្រសាសន៍​ពន្យល់​ពី​សារៈសំខាន់ ​ក្នុងការ​ចិញ្ចឹមសត្វ ពិសេស​គោ ក្របី ដែលជា​កម្លាំង​អូសទាញ​ផង និង​ជា​ផល​ចំណូល​ខាង​សេដ្ឋកិច្ច​ផង។

លោក​បាន​ប្រាប់​ដល់​កសិករ​ដែល​ទ​ទួលបាន​នូវ​ក្របី​ត្រូវយក ចិត្ត​ទុកដាក់​ក្នុងការ​ថែទាំ ​ដូចជាចំណី ទឹក កន្លែង​រស់នៅ​របស់​វា។

លោក​បាន​ពន្យល់ ​ពី​វិធី​ថែទាំ​មួយចំនួន ដែល​ធ្វើឱ្យ​សត្វពាហនៈ​នេះ​មាន​សុខ​ភាពល្អ និង​កម្លាំង​ខ្លាំងក្លា។ លោក​បាន​ជំរុញ​ឱ្យ​កសិករ អនុវត្ត​នូវ​គោលការណ៍​ ម្ចាស់ជំនួយ​បន្តទៅទៀត ដោយ​ឱ្យ​អ្នកទទួល​ថ្ងៃនេះ ក្លាយជា​ម្ចាស់ជំនួយ​នៅ​ថ្ងៃ ក្រោយ។

លោក​រដ្ឋមន្ត្រី ក៏បាន​ស្នើឱ្យ​នាយកដ្ឋាន​ផ្សព្វផ្សាយ​កសិកម្ម​ចងក្រង​សហគមន៍​ចិញ្ចឹម​ក្របី។ រៀបចំ​ចងក្រង​ឯកសារ​បច្ចេកទេស​ដោយ​សហការ​ជាមួយ​នាយកដ្ឋាន​ផលិតកម្ម​បសុព្យាបាល​ពី​វិធី សាស្ត្រ​ចិញ្ចឹម​ក្របី។ ពង្រឹង​ការចិញ្ចឹម​ក្របី។

ជាពិសេស​ខេត្តពោធិ៍សាត់ ស្វាយរៀង ដើម្បី​ចៀសវាង ការបាត់​ពូជ​ក្របី។ នាយកដ្ឋាន​ផលិតកម្ម និង​បសុព្យាបាល​ត្រូវធ្វើ​បច្ចុប្បន្នភាព​លើ​ស្ថិតិ​ក្របី​ឡើងវិញ តាមរយៈ​ភ្នាក់ងារ​សុខភាព​សត្វ​ភូមិ។ ជាមួយ​នាយកដ្ឋាន​ផលិតកម្ម​បសុព្យាបាល​ ត្រូវ​ស្រាវជ្រាវ​រក​ឱ្យឃើញ​នូវ​មូលហេតុ​នៃ​ការធ្លាក់ចុះ​នៃ​ការចិញ្ចឹម​ក្របី។

រដ្ឋមន្ត្រី​ក៏បាន​កោតសរសើរ​ដល់​ប្រជាកសិករ ដែល​យកចិត្ត​ដាក់​ចិញ្ចឹម​ក្របី​និង​ចេះ​ចែក​រែ លែ​ក។ គួររំលឹកថា ចំនួន​ក្របី​មានការ​ថយចុះ​ពី៧៧ម៉ឺន​ក្បាល នៅ​ឆ្នាំ២០០៧មក​នៅត្រឹម​​​៧៣ម៉ឺនក្បាល​​​​នៅ​ឆ្នាំ២០០៨ និង ២០០៩។ លោក​រដ្ឋមន្ត្រី​បាន​លើកឡើងថា​ប្រសិនបើ​មិនមាន​ការយកចិត្តទុកដាក់ និងថែរក្សា​ក្របី​ទេនោះ អាច​នឹង​ឈានទៅរក​ការបាត់បង់​ពូជ​ក្របី​ជាមិនខាន៕