ឯកឧត្តមរដ្ឋមន្ត្រី និងសហការីបានបន្តដំណើរមក ពិនិត្យបណ្តុំអាជីវកម្មមាន់ (ទូភា្ញស់កូនមាន់ និងចិញ្ចឹមមាន់យកសាច់) និងការបណ្តុះកូនស្វាយលក់

ចេញ​ផ្សាយ​ ១៥ មិថុនា ២០២០ 2727

កម្មវិធីទី៤៖
កម្មវិធីចុងក្រោយ សម្រាប់បេសកកម្មថ្ងៃទី១ ឯកឧត្តមរដ្ឋមន្ត្រី និងសហការីបានបន្តដំណើរមក ពិនិត្យបណ្តុំអាជីវកម្មមាន់ (ទូភា្ញស់កូនមាន់ និងចិញ្ចឹមមាន់យកសាច់) និងការបណ្តុះកូនស្វាយលក់ ស្ថិតនៅក្នុងភូមិចំការអូរ ឃុំកន្ទឺ២ ស្រុកបាណន់ ដែលទទួលបានការគាំទ្រដោយគម្រោងកម្មវិធីស្តីពី "ការផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ ហៅកាត់ថា ASPIRE" ។ លោក ប្រាក់ ហ៊ាប ម្ចាស់ផ្ទះ បានជម្រាបជូនឯកឧត្តមរដ្ឋមន្រ្តីថា លោកពូបានចាប់យករបរនេះជាអាជីពស្នូលតាំងពីឆ្នាំ២០១៧ រហូតមកទល់បច្ចុប្បន្ន ដោយទទួលបានការគាំទ្រពីកម្មវិធី ASPIRE ចាប់ផ្តើមពីមេ-បា ៣០ក្បាល ទូរភ្ញាស់ និងបច្ចេកទេស។ បច្ចុប្បន្នកើនដល់ ១៦០ក្បាល (មេ-បា)។ អាចផ្គត់ផ្គង់កូនមាន់ជូនអតិថិជនបាន ៤៥០ក្បាល/ខែ កូនតម្លៃ ១ក្បាល/៥ ០០០រៀល។ ក្រៅពីលក់កូន គាត់អាចលក់មាន់សាច់បាន ៧០kg/ខែ បានតម្លៃ ១ ៨០០០រ/kg។ ជាមធ្យម គាត់អាចរកប្រាក់ចំណូលពីការលក់មាន់សាច់ និងកូនមាន់បាន ៣០លានរៀល/ឆ្នាំ (កាត់ថ្លៃដើមរួច) បូកចំណូលបន្ថែមពីការលក់កូនស្វាយបាន ១០លានរៀល/ឆ្នាំ (១០ ០០០ដើម/ឆ្នាំ) បន្ថែមទៀត។

ឯកឧត្តមរដ្ឋមន្ត្រី បានសរសើរ និងគាំទ្រលោកពូ ប្រាក់ ហ៊ាប និងសមាជិកគ្រួសារ ដែលបានប្រកាន់យករបរចិញ្ចឹមមាន់ស្រែទទួលផលយ៉ាងល្អប្រសើរគួរជាទីមោទន និងជាគំរូល្អក្នុងភូមិ ព្រោះផលប្រយោជន៍ដែលលោកពូទទួលបានគឺជួបជុំគ្រួសារ កូនបានចូលរៀនមហាវិទ្យាល័យ មិនធ្វើចំណាកស្រុក ការងារស្រាល កូនមាន់ មាន់សាច់មានទីផ្សារល្អ និងទទួលបានប្រាក់ចំណូលខ្ពស់។ លោករដ្ឋមន្រ្តីបានណែនាំឱ្យមន្ទីរខិតខំជួយជំរុញបន្ថែមទៀតសម្រាប់គ្រួសារដែលគ្មានមុខរបរ ដើម្បីជួយពួកគាត់ឱ្យមានអាជីព មានចំណូលក្នុងគ្រួសារ ឈប់ធ្វើចំណាកស្រុក និងកាត់បន្ថយភាពក្រីក្រ។ លោករដ្ឋមន្រ្តីក៏បានលើកទឹកចិត្តឱ្យលោកពូ ប្រាក់ ហ៊ាប ពង្រីករបរនេះបន្ថែមទៀត ដើម្បីឆក់យកកាលានុវត្តភាពក្នុងឱកាសដែលប្រទេសកំពុងជួបវិបត្តិជំងឺឆ្លងកូវិដ-១៩ ស្របតាមប្រសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្រ្តី។