ឯកឧត្តម គឹម សុន រដ្ឋលេខាធិការក្រសួងកសិកម្ម បានបន្តដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការអន្តរាគមន៍លើការកម្ចាត់ដង្កូវហ្វូងនៅស្រុកចំនួន៣ ក្នុងខេត្តស្វាយរៀង

ចេញ​ផ្សាយ​ ២៦ មិថុនា ២០២៤ 981

នៅថ្ងៃទី២៦ ខែមិថុនា ឆ្នាំ២០២៤ ឯកឧត្តម គឹម សុន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានបន្តដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការអន្តរាគមន៍បាញ់ថ្នាំកសិកម្មកម្ចាត់ដង្កូវហ្វូងនៅស្រុកចំនួន៣ ក្នុងខេត្តស្វាយរៀង ដោយមានការចូលរួមពីអគ្គនាយកដ្ឋានកសិកម្ម  មន្ទីរកសិកម្មខេត្តស្វាយរៀង អាជ្ញាធរពាក់ព័ន្ធ និងមន្រ្តីកសិកម្មឃុំ។

ការចុះអន្តរាគមន៍នោះ មន្ត្រីជំនាញកសិកម្មសង្កេតឃើញថា នៅក្នុងស្រុកស្វាយជ្រុំសន្ទូងនៅសហគមន៍កសិកម្មសាមគ្គីស្ថិតនៅភូមិសូ ឃុំដូនសរ និងស្រុកស្វាយទាបសន្ទូងនៅភូមិស្វាយធំ ឃុំស្វាយរំពារ មិនមានដង្កូវហ្វូងបំផ្លាញដំណាំស្រូវប្រជាកសិករនោះទេ។ ចំណែកស្រុករមាសហែក សន្ទូងនៅឃុំអំពិល មានផលប៉ះពាល់ដោយដង្កូវហ្វូងលើផ្ទៃដី៧៥ហិកតា ក្នុងភូមិចំនួន០៣ ដែលមាន១៣៨គ្រួសារ និងឃុំត្រស់ មានផលប៉ះពាល់ដោយដង្កូវហ្វូងលើផ្ទៃដី២០៧ហិកតា ក្នុងភូមិចំនួន០៦ ដែលមាន៣០៥គ្រួសារផងដែរ។

ឯកឧត្តម គឹម សុន រដ្ឋលេខាធិការបញ្ជាក់ថា គិតត្រឹមថ្ងៃទី២៦ ខែមិថុនា ឆ្នាំ២០៤ មានតែស្រុករមាសហែក ខេត្តស្វាយរៀងមួយទេ ដែលមានផលប៉ះពាល់លើផ្ទៃដី ២៨២ហិកតា ប៉ុន្តែតាមស្ថានភាពបច្ចុប្បន្ន ក្នុងករណីពុំមានភ្លៀងធ្លាក់ទេ អាចបង្កឱ្យមានការរីករាលដាលបន្ថែមទៀត។

ករណីនេះឯកឧត្តមក៏បានណែនាំវិធានការបច្ចេកទេសទូទៅក្នុងការកម្ចាត់ដង្កូវហ្វូង ដោយប្រើប្រាស់ស្លឹកឈើ ឫស្លឹកត្នោត ជីកចង្អូររោយផេះនៅបាតចង្អូរ និងវិធីប្រើប្រាស់បាញ់ថ្នាំកសិកម្មកម្ចាត់ដង្កូវហ្វូងក្នុងករណីធ្ងន់ធ្ងរថែមទៀតផង។ បន្ថែមពីនេះ ក្រុមការងារបានធ្វើការទំនាក់ទំនងទៅអគ្គនាយកដ្ឋានកសិកម្ម ដើម្បីចាត់ចែងបញ្ជូនថ្នាំមកកាន់ទីតាំងដែលមានផលប៉ះពាល់ រួមទាំងណែនាំឱ្យមន្ទីរ អាជ្ញាធរមូលដ្ឋាន និងមន្ត្រីកសិកម្មឃុំ ព្រមទាំងប្រជាកសិករយកចិត្តទុកដាក់ខ្ពស់បន្តតាមដាន អន្តរាគមន៍ទប់ស្កាត់ដង្កូវហ្វូងឱ្យបានទាន់ពេលវេលា ទើបទទួលបានប្រសិទ្ធភាព និងប្រសិទ្ធផលខ្ពស់៕