មន្ត្រីជាន់ខ្ពស់ក្រសួងកសិកម្មថា ការជ្រើសពូជស្រូវសុទ្ធនឹងជួយលើកកម្ពស់វិស័យកសិកម្មនៅកម្ពុជា

ចេញ​ផ្សាយ​ ០៥ មេសា ២០២៣ 1896

មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តដល់ប្រជាកសិករជ្រើសរើសពូជស្រូវសុទ្ធយកទៅដាំដុះ ដើម្បីលើកកម្ពស់វិស័យកសិកម្មនៅកម្ពុជាឱ្យទទួលបានទិន្នផលច្រើន និងមានគុណភាពខ្ពស់ ក្នុងការប្រកួតប្រជែងលើទីផ្សារជាតិ  និងអន្តរជាតិ ។

ការលើកឡើងនេះ ធ្វើឡើងបន្ទាប់ពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងទិវាច្រូតស្រូវពូជនៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាថា ក្រសួងសម្រេចដាក់ប្រើជាផ្លូវការនូវពូជស្រូវថ្មីឈ្មោះ «ចំប៉ីស៧០» ដើម្បីលើកកម្ពស់វិស័យកសិកម្ម និងសេដ្ឋកិច្ចនៅកម្ពុជាកាន់តែរីកចម្រើន ។

ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្ម លោក គង់ គា បានថ្លែងប្រាប់អ្នកសារព័ត៌មាន នាព្រឹកថ្ងៃពុធ ១៥កើត ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី៥ ខែមេសា ឆ្នាំ២០២៣ នៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នេះថា ការប្រើពូជស្រូវសុទ្ធ ក្នុងការដាំដុះ និងទទួលបានគុណភាពល្អ  ការលូតលាស់ខ្លាំង មិនមានគ្រាប់ស្មៅ ផ្លៃទុំស្រុះគ្នា និងធ្វើឱ្យទិន្នផលកើនពី១០ ទៅ១៥ភាគរយ ខណៈតម្លៃឯណោះវិញ ក៏លក់បានថ្លៃខ្ពស់ផងដែរ ។

ឯកឧត្តម យ៉ង់ សាំងកុមារ  រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដែលទទួលបន្ទុកផ្នែកកាត់ពូជស្រូវបានថ្លែងទៅកាន់អ្នកសារព័ត៌មានថា កន្លងមកឯកឧត្តមសង្កេតឃើញថា ប្រជាកសិករយកពូជស្រូវទៅដាំមិនសូវសុទ្ធល្អ នៅពេលប្រមូលផលលក់ទៅឱ្យឈ្មួញ និងក្រុមហ៊ុនបានតម្លៃទាប ។

ករណីនេះ ឯកឧត្តមបញ្ជាក់ថា បើប្រជាករសិករជ្រើសរើសពូជសុទ្ធល្អ យកទៅដាំដុះ នោះទិន្នផលដែលទទួលបានខ្ពស់  ហើយលក់បានតម្លៃថ្លៃនៅលើទីផ្សារជាតិ និងអន្តរជាតិ ។

យ៉ាងណា ឯកឧត្តម យ៉ង់ សាំងកុមារ មានប្រសាសន៍បន្តថា ក្រសួងបាននឹងកំពុងយកចិត្តទុកដាក់ដោះស្រាយជាមួយក្រុមហ៊ុនស្រូវអង្ករ ដើម្បីកំណត់ឱ្យក្រុមហ៊ុនទាំងនោះប្រើប្រាស់ពូជសុទ្ធល្អ និងមានការទទួលស្គាល់ពីក្រសួង  ទើបធ្វើឱ្យវិស័យស្រូវអង្ករនៅកម្ពុជាទទួលបានផលវិជ្ជមានខ្ពស់ និងជោគជ័យតាមផែនការ ។

អគ្គរាជទូតនៃប្រទេសអូស្ត្រាលីប្រចាំកម្ពុជា ឯកឧត្តម Justin Whyatt បានថ្លែងក្នុងទិវាច្រូតស្រូវពូជ «ចំប៉ីស៧០» នាព្រឹកថ្ងៃនេះ ដោយរំពឹងថា ប្រជាកសិករកម្ពុជាជ្រើសរើសយកពូជស្រូវ «ចំប៉ីស៧០»ដាំដុះ  ដើម្បីជួយវិស័យកសិកម្មស្រូវអង្ករនៅកម្ពុជា និងធ្វើឱ្យសេដ្ឋកិច្ចកាន់តែរីកចម្រើន  រួមទាំងធ្វើឱ្យទំនាក់ទំនងនៃប្រទេសទាំងពីរកាន់តែមានទំនាក់ទំនងល្អថែមទៀតផង ។

ប្រជាសហគមន៍ឃុំត្រពាំ ឬស្សី  ស្រុកកំពង់ស្វាយ  ខេត្តកំពង់ធំ  អ្នកស្រី យឹម ស៊ីណែត ដែលចូលរួមក្នុងវេទិការនៅថ្ងៃនេះបានរៀបរាប់ថា នេះជាលើកទី១ ហើយដែលក្រសួងកសិកម្មបញ្ហាញពូជស្រូវ ចំប៉ីស៧០។

អ្នកស្រី យឹម សែត និយាយថា ក្រោយពីទទួលបានព័ត៌មាន និងរៀបនៃការបង្កាត់ពូជស្រូវ «ចំប៉ីស៧០» គឺគាត់និងយកទៅចែករំលែកដល់ប្រជាកសិករ  ដើម្បីឱ្យពួកគាត់ផលិតស្រូវលក់បានថ្លៃ ស្របតាមសេដ្ឋកិច្ច និងទីផ្សារ។

ប្រធានសហគមន៍ផលិតស្រូវពូជសំរោងមានជ័យ ស្ថិតនៅភូមិបង់ត្រង់ ឃុំសំរោង ស្រុកអូរជ្រៅ ខេត្តបន្ទាយមានជ័យ និយាយថា គាត់បានបង្កាត់ពូជស្រូវលក់ទៅឱ្យប្រជាសហគមន៍ និងប្រជាពលរដ្ឋនៅតំបន់របស់គា់ត់ភាគច្រើន ពូជស្រូវរំដួល និងសែនក្រអូប តែប៉ុណ្ណោះ ។ ប៉ុន្តែលោកថា នៅឆ្នាំនេះ គាត់និងយកពូជស្រូវថ្មី ឈ្មោះ «ចំប៉ីស៧០» ដែលក្រសួងប្រកាសឱ្យប្រើផ្លូវការ សាកល្បងដាំនៅក្នុងសហគមន៍របស់គាត់ផងដែរ ។

ប៉ុន្តែលោកថា នឹងសិក្សាបន្ថែមលើវិធីដាំស្រូវ  »ចំប៉ីស៧០» ដើម្បីជាផ្នែកមួយទៀត ក្នុងការជួយដល់វិស័យស្រូវអង្ករកម្ពុជា យកទៅលក់នៅលើទីផ្សារជាតិ និងអន្តរជាតិ ។

ពូជស្រូវ «ចំប៉ីស៧០» ជាពូជស្រូវស្រាលក្រអូប ដែលបានបញ្ចេញ និងផ្សព្វផ្សាយជូនកសិករប្រើប្រាស់ ដោយវិទ្យាស្ថានស្រាវជ្រាវ និបអភិវឌ្ឍន៍កសិកម្មកម្ពុជា នៃក្រសួងកសិកម្ម រុក្ខាប្រមាញ់ និងនេសាទ នៅចុងឆ្នាំ២០២២ ។ ពូជស្រូវនេះបានអភិវឌ្ឍន៍ឡើងក្នុងឆ្នាំ២០១៣ តាមការបង្កាត់រវាងពូជស្រូវផ្ការំដួលជាប្រភេទពូជស្រូវកណ្តលប្រកាន់រដូវ ដែលមានគុណភាពអង្ករប្រណីត ជាមួយនឹងស្រឡាយស្រូវ CNI9024 ជាស្រឡាយស្រូវស្រាលមិនប្រកាន់រដូវមានដងដើមល្អមកពីប្រទេសចិន  ។

ក្រោយពីធ្វើពិសោធន៍និងជ្រើសរើសអស់រយៈពេល៩ឆ្នាំ វិទ្យាស្ថានបានសម្រេចស្នើសុំបញ្ចេញឱ្យប្រើប្រាស់ជាផ្លូវការនៅខែធ្នូ ឆ្នាំ២០២២ តាមរយៈគណៈកម្មាធិការបញ្ចេញពូជដំណាំនៃក្រសួងកសិកម្ម រុក្ខាប្រមាញ់ និងនេសាទ ។

ពូជស្រូវ «ចំប៉ីស៧០» ជាពូជស្រូវស្រាលក្រអូប មិនប្រកាន់រដូវ ដែលអាចច្រូតកាត់បានក្នុងរយៈពេល៩៣ ទៅ៩៧ថ្ងៃ ក្រោយព្រោះ ឬសាប ។ ស្រូវ «ចំប៉ីស៧០» អាចផ្តល់ផលជាមធ្យម ៤,៣ តោន ក្នុង១ហិកតា ។ ដោយសារវាមានអាយុកាលខ្លី គេអាចដាំដុះនៅដើមរដូវវស្សា (ដំណាំទីមួយនៃរដូវ ឬស្រូវដើមរដូវ) ក្នុងរដូវវស្សា(ដំណាំទីពីរនៃរដូវ) ចុងរដូវវស្សា ស្រូវប្រដេញទឹក (ដំណាំចម្លោះរដូវវស្សា និងរដូវប្រាំង) និងលក្ខខណ្ឌប្រាំងស្រោចស្រព ៕

អត្ថបទដោយ៖ ណាត សុភាព