ឯកឧត្តមរដ្ឋមន្រ្តី វេង សាខុន បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណ:នៃការយោគយល់គ្នា ស្តីពីការអភិវឌ្ឍហ្គ្រីនហៅស៍កសិបច្ចេកវិទ្យា ៤.០ រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុន Agri-Sambathkhmer Co., Ltd ក្រុមហ៊ុន PLMP Venture Capital Co., Ltd និងក្រុមហ៊ុន ISBP Group-Sun Business Investment Globe Co., Ltd

ចេញ​ផ្សាយ​ ២២ មករា ២០២២ 4657

នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាវេលាម៉ោង ១៤:៣០ រសៀលថ្ងៃសុក្រ ៤រោច ខែបុស្ស ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២១ ខែមករា ឆ្នាំ២០២២ មានរៀបចំពិធីចុះហត្ថលេខាលើអនុស្សរណ:នៃការយោគយល់គ្នា ស្តីពី ការអភិវឌ្ឍហ្គ្រីនហៅស៍កសិបច្ចេកវិទ្យា ៤.០ រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុន Agri-Sambathkhmer Co., Ltd ក្រុមហ៊ុន PLMP Venture Capital Co., Ltd និងក្រុមហ៊ុន ISBP Group-Sun Business Investment Globe Co., Ltd ពិធីនេះស្ថិតក្រោមអធិបតីភាព ឯកឧត្តមរដ្ឋមន្រ្តី វេង សាខុន និងមានការអញ្ជើញចូលរួមពីឯកឧត្តមថ្នាក់ដឹកនាំក្រសួង និងស្ថាប័នក្រោមឱវាទមួយចំនួនទៀតផងដែរ។ ថ្លែងទៅកាន់អង្គពិធី ឯកឧត្តមរដ្ឋមន្ត្រីបានថ្លែងអំណរគុណជូនចំពោះវត្តមានរបស់ឯកឧត្តម លោកជំទាវ លោកឧកញ៉ាតំណាងក្រុមហ៊ុន សមាជិក សមាជិកានៃអង្គពិធីទាំងមូលដែលបានឆ្លៀតឱកាសដ៏មានតម្លៃអញ្ជើញចូលរួមក្នុងពិធីនារសៀលនេះ។ ភ្ជាប់ទៅនឹងខ្លឹមសារនៃពិធី ឯកឧត្តមរដ្ឋមន្ត្រីបានលើកឡើងថា ការបង្កើតភាពជាដៃគូរវាងរដ្ឋ និងឯកជន គឺពិតជាឆ្លើយតបតាមអភិក្រម "រដ្ឋ-ឯកជន-ដៃគូអភិវឌ្ឍន៍ និងសហគមន៍” ក្នុងគោលបំណងដើម្បីជំរុញ និងលើកកម្ពស់ខ្សែច្រវាក់តម្លៃបន្លែតាមស្តង់ដារការអនុវត្តកសិកម្មល្អកម្ពុជា (Cam-GAP) ធានាបានបរិមាណផ្គត់ផ្គង់ គុណភាព និងសុវត្ថិភាព រួមចំណែកបង្កើនផលិតភាព ពិពិធភាវូបនីយកម្ម និងពាណិជ្ជូបនីយកម្មកសិកម្ម។ ខ្លឹមសារនៃអនុស្សរណ:នៃការយោគយល់គ្នានេះ ឯកឧត្តមរដ្ឋមន្ត្រីបានបញ្ជាក់ថា ប្រាកដជានឹងជួយបំពេញនូវអត្ថប្រយោជន៍ឲ្យគ្នាទៅវិញទៅមករវាងគូភាគីទាំងអស់ ក្នុងការកសាងភាពជាដៃគូអភិវឌ្ឍខ្សែច្រវាក់ តម្លៃផលិតកម្មបន្លែ ប្រកបដោយចីរភាព និរន្តរភាព វិបុលភាព បរិយាប័ន្ន ការប្រកួតប្រជែង ការប្រែប្រួលអាកាសធាតុ និងនវានុវត្តន៍ ជាពិសេសវាពិតជានឹងចូលរួមចំណែកអនុវត្តផែនការយុទ្ធសាស្រ្តរបស់ក្រសួងក្នុងការជំរុញផលិតភាព និងពិពិធកម្មដំណាំបន្លែសុវត្ថិភាពឲ្យកាន់តែល្អប្រសើរ ចូលរួមលើកកម្ពស់ខ្សែច្រវាក់ផលិតកម្មបន្លែ ការកែច្នៃ តម្លៃបន្ថែម និងទីផ្សារក្នុង និងក្រៅប្រទេស បង្កើតឱកាសការងារ និងបង្កើនប្រាក់ចំណូល។ ឯកឧត្តមរដ្ឋមន្ត្រីបន្ថែមថា នេះក៏ជាយន្តការមួយក្នុងការចូលរួមដោះស្រាយនូវបញ្ហាប្រឈមដែលកសិករកំពុងជួបប្រទះ និងកែលម្អ ដើម្បីលើកកម្ពស់សមត្ថភាពផលិតឆ្លើយតបតាមតម្រូវការទីផ្សារ ប្រែក្លាយកសិករទៅជាកសិ-សហគ្រិន ឆ្លើយតបទៅនឹងផែនទីបង្ហាញផ្លូវស្តីពីប្រព័ន្ធស្បៀងប្រកបដោយចីរភាព សម្រាប់ឆ្នាំ ២០៣០ និងគោលនយោបាយនៃការធ្វើទំនើបកម្មវីស័យកសិកម្ម ២០២១-២០៣០ ផងដែរ។ ជាងនេះទៅទៀត គឺស្របទៅនឹងចក្ខុវិស័យរបស់រាជរដ្ឋាភិបាលក្នុងការធ្វើទំនើបកម្មកសិកម្មឱ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តរភាពសំដៅបង្កើនប្រាក់ចំណូល និងលើកកម្ពស់សុខុមាលភាពរបស់ប្រជាពលរដ្ឋ។ អនុស្សរណ:នៃការយោគយល់គ្នាស្តីពីការអភិវឌ្ឍហ្គ្រីនហៅស៍បច្ចេកវិទ្យា ៤.០ នឹងអាចឲ្យភាគីទាំងអស់ធ្វើកិច្ចសហប្រតិបត្តិការរួមគ្នា សំដៅសម្រេចឲ្យបានតាមគោលដៅសាងសង់ហ្គ្រីនហៅស៍កសិបច្ចេកវិទ្យា ៤.០ ឲ្យបានចំនួន ១០ ០០០ ខ្នងក្នុងរយៈពេល ១០ឆ្នាំបន្ទាប់ទៀតនោះគឺដើម្បីផលិតបន្ថែមជាអប្បបរមាចំនួន ៤០០ តោនក្នុងមួយឆ្នាំ មិនត្រឹមតែផ្តល់ការផ្គត់ផ្គង់ដែលមានសុវត្ថិភាព និងមាននិរន្តរភាពដល់ទីផ្សារក្នុងមូលដ្ឋាន និងថែមទាំងផ្តល់នូវការចុះកិច្ចសន្យាផលិតកម្មជាមួយសហគមន៍ និងទីផ្សារអន្តរជាតិផងដែរ។ ដើម្បីសម្រេចគោលដៅនេះ ឯកឧត្តមរដ្ឋមន្ត្រីបានផ្តល់អនុសាសន៍មួយចំនួនជូនដល់ភាគីពាក់ព័ន្ធទាំងអស់យកទៅអនុវត្ត ធ្វើយ៉ាងណាឲ្យខ្លឹមសារនៃអនុស្សរណ:នៃការយោគយល់គ្នានេះលេចចេញ ឬកើតចេញជាប្រយោជន៍សម្រាប់វិស័យផលិតកម្មបន្លែកម្ពុជានាពេលអនាគត។ ទី១. ត្រូវជួយពង្រឹងសមត្ថភាពបច្ចកទេសដល់កសិករ សហគមន៍កសិកម្មឲ្យទទួលបាននូវបច្ចេកទេសទំនើបពីក្រុមហ៊ុន ផលិតនូវផលិតផលដែលមានគុណភាព និងសុវត្ថិភាព ព្រមទាំងត្រូវភ្ជាប់ផលិតកម្មកសិកម្មតាមកិច្ចសន្យាជាមួយក្រុមហ៊ុន ដើម្បីសម្រួលក្នុងការប្រមូលទិញផលិតផលពីកសិករ ឬសហគមន៍កសិកម្ម ស្របតាមអភិក្រម “រដ្ឋ-វិស័យឯកជន-ដៃគូអភិវឌ្ឍន៍ និងសហគមន៍”។ ទី២. ក្រុមហ៊ុន និងអគ្គនាយកដ្ឋានកសិកម្ម ត្រូវសហការគ្នាក្នុងការបង្កើនការជឿទុកចិត្តពីអ្នកប្រើប្រាស់ដោយត្រូវបន្តពង្រឹងយន្តការផ្តល់សេវាកម្មត្រួតពិនិត្យ និងបញ្ជាក់គុណភាព សុវត្ថិភាពផលិតផលកសិកម្ម ស្របតាមស្តង់ដារឲ្យបានកាន់តែរឹងមាំ ក៏ដូចជាការចូលរួមគាំទ្រការធានាចីរភាពបរិស្ថានស្របតាមគោលការណ៍ “អភិវឌ្ឍន៍បៃតង” និងការរៀបចំខ្លួនឆ្លើយតបនឹងការប្រែប្រួលអាកាសធាតុសំដៅកាត់បន្ថយផលអវិជ្ជមានជាអតិបរមា មកលើកំណើនសេដ្ឋកិច្ច និងជីវភាពសង្គមកម្ពុជា។ ទី៣. ត្រូវបន្តកៀរគរផ្នែកឯកជន និងលើកទឹកចិត្តបន្ថែមទៀតក្នុងការចូលរួមវិនិយោគនៅក្នុងផលិតកម្មដំណាំបន្លែសុវត្ថិភាពដោយប្រើប្រាស់បច្ចេកទេសទំនើបកម្ម ប្រកបដោយភាពវៃឆ្លាត។ ជាពិសេស គិតគូរអំពីការប្រើប្រាស់កម្មវិធីក្នុងទូរស័ព្ទដៃអំពីទិន្នន័យភូមិសាស្រ្តសម្រាប់កសិកម្មនិងទឹក ដែលជាបច្ចេកវិទ្យាថ្មីទំនើបសម្រាប់បម្រើក្នុងការងារកសិកម្មលើផលិតកម្មដំណាំបន្លែដោយបានដាក់បញ្ចូលសេវាកម្មចំនួន ៥ រួមមាន៖ សេវាកម្មប្រព័ន្ធស្រោចស្រព សេវាកម្មប្រើប្រាស់ជី-ថ្នាំកសិកម្ម សេវាកម្មគ្រប់គ្រងដំណាំបន្លែ សេវាកម្មព័ត៌មានទីផ្សារកសិកម្ម និងសេវាកម្មវិភាគគុណភាព សុវត្ថិភាព ការអនុវត្តកសិកម្មល្អ កសិកម្មសរីរាង្គសម្រាប់កសិករ អាជីវករលក់ជី-ថ្នាំកសិកម្ម អាជីវករទិញ-លក់បន្លែជាដើម។ ទី៤. ត្រូវបន្តពង្រឹងសមត្ថភាព និងគ្រប់គ្រងផែនការផលិតរបស់ក្រុមផលិតបណ្តុំកសិករ និងសហគមន៍កសិកម្ម ដើម្បីធានានិរន្តរភាពនៃការផ្គត់ផ្គង់ដល់ទីផ្សារ និងអ្នកបញ្ជាទិញ និងបង្កើតបរិយាកាសពាណិជ្ជកម្មឲ្យបានល្អប្រសើរ។ ទន្ទឹមគ្នានេះ ត្រូវបន្តជំរុញការបញ្ជ្រាបការអនុវត្ត CamGAP និង CamOrg ឲ្យបានកាន់តែទូលំទូលាយនៅទូទាំងប្រទេស ជាពិសេសតាមរយៈបណ្តុំកសិករ និងសហគមន៍កសិកម្ម ដើម្បីងាយស្រួលតាមដាន និងគ្រប់គ្រងនូវប្រភពបន្លែច្បាស់លាស់ ធានានូវគុណភាពនិងសុវត្ថិភាព និងផ្សារភ្ជាប់ផលិតផលជាមួយទីផ្សារ។