ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យ ឯកឧត្តម Csaba Ory ឯកអគ្គរដ្ឋទូតហុងគ្រីប្រចាំនៅកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ចូលជួបសម្តែងការគួរសម និងពិភាក្សាការងារលើការពង្រឹងកិច្ចសហប្រតិបត្តិការលើវិស័យកសិកម្ម

ចេញ​ផ្សាយ​ ១៦ កុម្ភៈ ២០១៨ 2481

នៅវេលាម៉ោង ១០ព្រឹក ថ្ងៃទី០៤ ខែវិច្ជិកា ឆ្នាំ២០១៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យ ឯកឧត្តម Csaba Ory ឯកអគ្គរដ្ឋទូតហុងគ្រីប្រចាំនៅកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ចូលជួបសម្តែងការគួរសម និងពិភាក្សាការងារលើការពង្រឹងកិច្ចសហប្រតិបត្តិការលើវិស័យកសិកម្ម។ ឯកឧត្តមរដ្ឋមន្រ្តី បានសម្តែងការស្វាគមន៏ចំពោះវត្តមាននៃការជួបពិភាក្សាការងារ និងថ្លែងអំណរគុណចំពោះរដ្ឋាភិបាលហុងគ្រីដែល មានកិច្ចសហប្រតិបត្តិការល្អ ជាមួយរាជរដ្ឋាភិបាលកម្ពុជា។ ឯកឧត្តមរដ្ឋមន្រ្តីបានមានប្រសាសន៏ថា បច្ចុប្បន្នកម្ពុជាកំពុងផ្តោតសំខាន់ទៅលើការលើកកម្ពស់ផលិតភាពកសិកម្ម ការពង្រឹងគុណភាព និងសុវត្ថិភាពស្បៀងអាហារ ជាពិសេសជំរុញការនាំចេញនូវផលិតផលកសិកម្ម។ ឯកឧត្តម Csaba Ory បានមានប្រសាសថានេះជាលើកទី១ ហើយដែលលោកបានបំពេញបេសកកម្មការទូតនៅប្រទេសកម្ពុជា ហើយឯកឧត្តម ក៏បានថ្លែងអំណរគុណផងដែរ ចំពោះរាជរដ្ឋាភិបាលកម្ពុជាដែលបានផ្តល់កិច្ចសហការល្អជាមួយប្រទេសហុងគ្រី។ ឯកឧត្តម បានធ្វើការចាប់ អារម្មណ៍ទៅលើការពង្រឹងការត្រួតពិនិត្យគុណភាពផលិត​ផលកសិកម្ម ដើម្បីធានាបាននូវសុវត្ថិភាពស្បៀងអាហារ។ រដ្ឋាភិបាលហុងគ្រី មានបំណងគាំទ្រគម្រោងប្រព័ន្ធសន្តិសុខស្បៀងនៅកម្ពុជា ហើយឯកឧត្តម បានស្នើឲ្យរាជរដ្ឋាភិបាលកម្ពុជា រៀបចំសំណើនូវគម្រោងដែលមានសក្តានុពល ជាពិសេសហេដ្ឋារចនាសម្ព័ន្ធកសិកម្ម និងបច្ចេកវិទ្យាទំនើបដែលជំរុញដល់ការលើកកម្ពស់ផលិតកម្ម គុណភាព និងសុវត្ថិភាពផលិតផលកសិកម្ម។ ឯកឧត្តមក៏បានបញ្ជាក់ថា រដ្ឋាភិបាលហុងគ្រីក៏មានបំណងលើកកម្ពស់ធនធានមនុស្សនៅកម្ពុជាផងដែរ តាមរយៈការផ្តល់អាហារូបករណ៍ ហើយឯកឧត្តមក៏បានស្នើឲ្យក្រសួងកសិកម្ម រុក្ខាប្រមាញ់​ និងនេសាទរៀបចំសំណើ បញ្ជូនមន្ត្រីដើម្បី ទទួលបាន អាហារូបករណ៍ទៅសិក្សានៅប្រទេសហុងគ្រី។ ឯកឧត្តមក៏បានជម្រាបជូន និងស្នើឯកឧត្ដមរដ្ឋមន្ត្រីទទួលជួបប្រធានទីប្រឹក្សាក្រសួងការបរទេស ហុង គ្រី ដែលនឹងអញ្ជើញមកបំពេញទស្សនកិច្ចនៅកម្ពុជា ពីថ្ងៃទី២៣-២៤ ខែវិច្ឆិកា ឆ្នាំ ២០១៦ ខាងមុខនេះ។ ឯកឧត្តមរដ្ឋមន្រ្តី បានបញ្ជាក់ថាបច្ចុប្បន្នកម្ពុជាស្ថិតនៅក្នុងដំណាក់កាលអន្តរកាល ហើយនៅមានជួបបញ្ហាប្រឈមច្រើន ដែលទាមទារឲ្យមានការគាំទ្រពីប្រទេសជាមិត្ត និងដៃគូអភិវឌ្ឍន៏នានា។ទន្ទឹមនឹងនេះ ឯកឧត្តមរដ្ឋមន្រ្តីបានស្នើឲ្យ រដ្ឋាភិបាលហុងគ្រីលើកចិត្តដល់វិស័យឯកជនឲ្យមកវិនិយោគនៅកម្ពុជា​ជាពិសេសក្នុងវិស័យកសិកម្មឲ្យបានច្រើន។ ក្រៅពីនេះឯកឧត្តមរដ្ឋមន្រ្តីក៏បានស្នើឲ្យរដ្ឋាភិបាលហុងគ្រីជួយគាំទ្រផ្តល់នូវការបណ្តុះបណ្តាល និងឧបករណ៍ ព្រមទាំងបច្ចេកវិទ្យាទំនើបៗ សម្រាប់គាំទ្រដល់ការសិក្សាស្រាវជ្រាវនៅតាមគ្រឹះស្ថានសិក្សានៅកម្ពុជា ការផ្លាស់ប្តូរទស្សនកិច្ចសិក្សារវាងមន្ត្រីនៃប្រទេសទាំងពីរ និងការពង្រីកផ្តល់នូវអាហារូបករណ៍ថ្នាក់ឧត្ដមនិងក្រោយឧត្ដមសិក្សាសម្រាប់និស្សិតកម្ពុជាសិក្សាលើវិស័យកសិកម្ម។ ឯកឧត្តមរដ្ឋមន្រ្តីបានលើកពីតម្រូវការនៃការរៀបចំផែនការសម្រាប់គ្រប់គ្រងទីផ្សារកសិកម្មនៅកម្ពុជា ដោយផ្តោតលើគុណភាព និងសុវត្ថិភាពផលិតផល ដើម្បីផ្តល់លក្ខណៈងាយស្រួលដល់ប្រជាកសិករក្នុងការរៀបចំផែនការដាំដុះទៅតាមតម្រូវការទីផ្សារសហគមន៍អឺរ៉ុបជាក់ស្តែង។ ឯកឧត្ដមរដ្ឋមន្ត្រី ក៏បានស្វាគមន៍ទទួលជួបមន្ត្រីការទូតហុងគ្រី ដែលនឹងអញ្ជើញមកកម្ពុជា ចាប់ពីថ្ងៃទី២៤ ខែវិច្ឆិកា ខាងមុខនេះ ដើម្បីជំរុញកិច្ចសហប្រតិបត្តិការ។ ជាទីបញ្ចប់ ភាគីទាំងពីរ នឹងចាត់ និងបញ្ជូនមន្ត្រីសម្របសម្រួល ដើម្បីធ្វើការទំនាក់ទំនង និងសហការជាមួយគ្នាក្នុងការរៀបចំសំណើគម្រោងសហប្រតិបត្តិការនានា ក្នុងវិស័យកសិកម្ម នាពេលឆាប់ៗខាងមុខនេះ។