ឯកឧត្តមរដ្ឋលេខាធិការ សេន សុវណ្ណ អញ្ជើញជាអធិបតីភាពក្នុងពិធីបើកកិច្ចប្រជុំបូកសរុបការងារប្រចាំឆ្នាំ២០២៥ របស់វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា(កាឌី)

ចេញ​ផ្សាយ​ ១៨ ធ្នូ ២០២៥ 222

នាព្រឹកថ្ងៃទី១៨ ខែធ្នូ ឆ្នាំ២០២៥ ឯកឧត្តមរដ្ឋលេខាធិការ សេន សុវណ្ណ តំណាងដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបើកកិច្ចប្រជុំបូកសរុបការងារប្រចាំឆ្នាំ២០២៥ របស់វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា(កាឌី)។
ជាកិច្ចចាប់ផ្តើម លោក ឡោ ប៊ុណ្ណា នាយកវិទ្យាស្ថានកាឌី បានថ្លែងអំណរគុណយ៉ាងជ្រាលជ្រៅនូវវត្តមានរបស់ថ្នាក់ដឹកនាំក្រសួងកសិកម្ម និងតំណាងស្ថាប័នពាក់ព័ន្ធ ដែលបានចូលរួមនាពេលនេះ ជាការចូលរួមលើកទឹកចិត្ដដល់សកម្មភាព និងសមិទ្ធិផលស្រាវជ្រាវរបស់វិទ្យាស្ថានកន្លងទៅ និងទទួលបាននូវការគាំទ្រយ៉ាងខ្លាំងក្លាពីប្រមុខរាជរដ្ឋាភិបាលកម្ពុជា។
បើតាម លោក ឡោ ប៊ុណ្ណា កាឌីបាននឹងកំពុងស្រាវជ្រាវ និងអភិវឌ្ឍន៍ពូជដំណាំផ្សេងៗ ធ្វើយ៉ាងណាឱ្យមានការអភិវឌ្ឍន៍កាន់តែប្រសើរ និងបញ្ចេញអោយកសិករ ព្រមទាំងអ្នកពាក់ព័ន្ធយកទៅធ្វើការដាំដុះបន្ត សំដៅឆ្លើយតបទៅនឹងការប្រែប្រួលអាកាសធាតុជាសាកល មានភាពធន់ទ្រាំនឹងការរាំងស្ងួត និងទឹកជំនន់ជាដើម។
នៅចំពោះមុខអង្គពិធី ឯកឧត្តមរដ្ឋលេខាធិការ បានសម្តែងក្តីសោមនស្សរីករាយ និងអបអរសាទរដល់វិទ្យាស្ថានកាឌី ដែលនឹងស្ថិតនៅក្រោមឆ័ត្រតែមួយក្នុង រាជបណ្ឌិត្យសភាវិទ្យាសាស្រ្តកសិកម្មកម្ពុជា ដែលប្រមូលផ្តុំចង្កោមអ្នកស្រាវជ្រាវទាំងអស់ ធ្វើការជាមួយគ្នាលើគ្រប់អនុវិស័យទាំងអស់ ដែលជាការគិតគូររបស់ ឯកឧត្តមរដ្ឋមន្រ្តី ឌិត ទីណា ជំរុញការអនុវត្តឱ្យដំណើរការជោគជ័យ បម្រើដល់ការនាំចេញ នាំចូល និងការប្រើប្រាស់ក្នុងស្រុក ប្រកបដោយគុណភាព សុវត្ថិភាព អនាម័យ និងមានលិខិតបញ្ជាក់លក្ខណៈស្តង់ដាអន្តរជាតិ។
ជាមួយគ្នានេះដែរ ឯកឧត្តមរដ្ឋលេខាធិការ ក៏បានលើកឡើងពីគោលនយោបាយអាទិភាពទី៥ និងទី៦ ផ្សារភ្ជាប់ទៅនឹងការងារស្រាវជ្រាវ ដែលជាការងារមួយសំខាន់ផ្តោតការយកចិត្តទុកដាក់ជំរុញផែនការយុទ្ធសាស្រ្ត និងសេដ្ឋកិច្ច ស្របតាមទស្សនទាន «មានហូប មានប្រើ មានបាន និងមានរហូត» ជាពិសេសការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់ឆ្នាំ២០៥០។
ជាទីបញ្ចប់ ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់អង្គពិធីត្រូវប្រជុំពិភាក្សា​ផ្តោតលើការស្រាវជ្រាវ​ជាសមាសធាតុអាហារូបត្តម្ថ​ ស្រាវជ្រាវលើតម្រូវការទីផ្សារជាក់ស្តែង​ មានព័ត៌មានវិទ្យាសាស្រ្តពេញលេញ​ ជាជាងការស្រាវជ្រាវផ្តោតតែលើការបង្កើនបរិមាណ​ ហើយធ្វើយ៉ាងណាឱ្យកិច្ចពិភាក្សានេះប្រកបដោយភាពជិតសិ្នត​ បូកសរុបជាលទ្ធផលរួមលើការងារស្រាវជ្រាវក្នុងប្រទេសកម្ពុជា​ បម្រើដល់ផលប្រយោជន៍ប្រជាជន​ និងសង្គមជាតិ៕