ឯកឧត្តមរដ្ឋលេខាធិការ ប្រាក់ ដាវីដ អញ្ជើញជាអធិបតីភាពក្នុងពិធី «អបអរសាទរសមិទ្ធផល៦ឆ្នាំ និងការបិទបញ្ចប់កម្មវិធីជំរុញកំណើន វិស័យជលផលប្រកបដោយចីរភាព និងបរិយាបន្នផ្នែកនេសាទ»

ចេញ​ផ្សាយ​ ១៨ ធ្នូ ២០២៥ 161

នៅព្រឹកថ្ងៃទី១៨ ខែធ្នូ ឆ្នាំ២០២៥ ឯកឧត្តម ប្រាក់ ដាវីដ  រដ្ឋលេខាធិការ ក្រសួង​កសិកម្ម រុក្ខាប្រមាញ់ និងនេសាទ អញ្ជើញជាអធិបតីភាព​ក្នុង​ពិធី «អបអរសាទរសមិទ្ធផល៦ឆ្នាំ និងការបិទបញ្ចប់កម្មវិធីជំរុញ​កំណើន វិស័យជលផលប្រកបដោយចីរភាព និងបរិយាបន្នផ្នែកនេសាទ»។ កម្មវិធីរៀបចំនៅសណ្ឋាគារសាងហ្គ្រីឡា មានការ​ចូល​រួម​ពីថ្នាក់​ដឹក​នាំ​ក្រសួងកសិកម្ម តំណាងរដ្ឋបាលជលផល សហភាព​អឺរ៉ុប អង្គការ​FAO អង្គការ UNIDO ទីភ្នាក់ងារអភិវឌ្ឍន៍បារាំង ដៃគូអភិវឌ្ឍន៍ អាជ្ញាធរ ​សាកល​​វិទ្យាល័យ និស្សិត សហគមន៍នេសាទ ​សរុបអ្នក​ចូលរួម​ប្រមាណ​៥០០នាក់។
គោលបំណងនៃកម្មវិធី ដើម្បីបង្ហាញពីលទ្ធផលសំខាន់ៗ និងមេរៀន​ដែល​​ទទួលបានពីកម្មវិធី CAPFISH-Capture អបអរសាទរ​សមិទ្ធផល​គោលនយោបាយ និងដាក់ឱ្យដំណើរការឯកសារ​បោះពុម្ពជា​ប្រវត្តិសាស្ត្រ «ប្រាំមួយឆ្នាំនៃCAPFISH» ពង្រឹងភាពលេចធ្លោនៃភាពជា​ដៃគូ ជំរុញកិច្ច​សហប្រតិបត្តិការ និងនវានុវត្តន៍នាពេលអនាគត និងបិទ​បញ្ចប់ជាផ្លូវការ​នូវ​គម្រោង FAO CAPFISH Capture។
ថ្លែងក្នុងពិធីបើក ឯកឧត្តម ប្រាក់ ដាវីដ បានសម្តែងការកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការល្អ គ្រប់ភាគីពាក់ព័ន្ធ សម្រេចបាននូវលទ្ធផលជាទីមោទនៈរបស់កម្មវិធី CAPFISH-Capture។ តាមរយៈការគាំទ្រថវិកាពីសហគមន៍អឺរ៉ុប ដល់រដ្ឋបាល​ជលផល និងផ្តល់ជំនួយបច្ចេកទេសពីអង្គការFAO កម្មវិធី CAPFISH-Capture បានពង្រឹងការងារគ្រប់គ្រង និងអភិរក្សធនធាន​ជលផល​ទឹកសាប សមុទ្រ និង តំបន់ឆ្នេរ ការធ្វើទំនើបកម្មការគ្រប់​គ្រងវិស័យ​ជលផល ការរៀបចំក្របខណ្ឌច្បាប់ជលផលថ្មី រៀបចំលិខិតបទដ្ឋាន​គតិយុត្តផ្សេងៗ បោះបង្គោលព្រំ ការដាក់ពង្រាយ ជម្រកត្រីសិប្បនិម្មិត ការពង្រឹងសហគមន៍នេសាទ និងសហគមន៍ស្រះជម្រកត្រី។
នៅចុងបញ្ចប់ ឯកឧត្តមបញ្ជាក់បន្ថែមថា ប្រសិទ្ធភាពនៃការអនុវត្តច្បាប់ ទាម​ទា​ការចូលរួមពីគ្រប់ភាគីពាក់ព័ន្ធទាំងអស់ ឯកឧត្តមសូមអំពា​វ​នាវ​​ដល់បងប្អូនប្រជានេសាទ សហគមន៍នេសាទ អាជ្ញាធរថ្នាក់​ជាតិ និង​ថ្នាក់ក្រោមជាតិ មន្ត្រីជំនាញ សហការគ្នាពង្រឹងការអនុវត្ត​ច្បាប់ឱ្យ​មាន​ប្រសិទ្ធភាពបំផុត សំដៅធានានិរន្តរភាពផលនេសាទ និងសន្តិសុខ​ស្បៀង ព្រមទាំង​រក្សា​ការពារធនធានជលផល សម្រាប់កូនចៅយើង​ជំនាន់ក្រោយទៀតផង៕