ឯកឧត្តមរដ្ឋមន្ត្រី វេង សាខុន បានអនុញ្ញាតឱ្យលោកស្រី Olga Reuvekamp, MBA (Executive Director Minnesota Agriculture and Rural Leadership (MARL) និងសហការី ចូលជួបដើម្បីសម្តែងការគួរសម និងពិភាក្សាការងារ

ចេញ​ផ្សាយ​ ២៤ កុម្ភៈ ២០២០ 2407

នៅទីស្តីការក្រសួងកសិកម្ម រុក្ខាប្រមាញ់ និងនេសាទ វេលាម៉ោង១៤:៣០ រសៀលថ្ងៃសុក្រ ១៣រោច ខែមាឃ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២១ ខែកុម្ភ: ឆ្នាំ២០២០ ឯកឧត្តមរដ្ឋមន្ត្រី វេង សាខុន បានអនុញ្ញាតឱ្យលោកស្រី Olga Reuvekamp, MBA (Executive Director Minnesota Agriculture and Rural Leadership (MARL) និងសហការី ចូលជួបដើម្បីសម្តែងការគួរសម និងពិភាក្សាការងារ។

មានមតិស្វាគមន៍ភ្ញៀវនាឱកាសនេះ ឯកឧត្តមរដ្ឋមន្ត្រីបានថ្លែងអំណរគុណចំពោះ MARL និងជា ពិសេសចំពោះលោកស្រី Olga Reuvekamp និងសហការី ដែលបានអញ្ជើញមកធ្វើទស្សនកិច្ចនៅលើទឹកដីអង្គរ និងជាពិសេសឆ្លៀតពេលមមាញឹកអញ្ជើញមកក្រសួងដើម្បីធ្វើការសិក្សាស្វែង យល់ឱ្យបានស៊ីជម្រៅបន្ថែមទៀតទាក់ទងនឹងគោលបំណងធំៗទាំង០៣ ខាងលើ។ ឆ្លៀតយកឱកាសនេះ ឯកឧត្តមរដ្ឋមន្ត្រីបានសង្ខេបអំពីការវិវឌ្ឍន៍រីកចម្រើនរបស់ប្រទេសជាតិលើគ្រប់វិស័យជាជំហានៗរហូតមកទល់បច្ចុប្បន្ន ក្នុងនោះពិតណាស់គឺវិស័យកសិកម្ម ដែលមានការរីកចម្រើនគួរឱ្យកត់សម្គាល់រួមមានផលិតកម្មស្រូវ ដំណាំកសិ-ឧស្សាហកម្ម ផលិតកម្មសត្វ វារីវប្បកម្ម ធនធានព្រៃឈើ និងកៅស៊ូធម្មជាតិ។ ក្នុងខណ:នេះ ឯកឧត្តមរដ្ឋមន្ត្រីបានជម្រាបជូនភ្ញៀវយ៉ាងក្បោះក្បាយ និងស៊ីជម្រៅដោយសង្កត់ធ្ងន់ទៅលើគោលនយោបាយ និងផែនការអភិវឌ្ឍន៍វិស័យកសិកម្មឆ្នាំ២០១៩-២០២៣ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល ដែលនៅក្នុងនោះបានចែងយ៉ាងច្បាស់អំពីគោលនយោបាយលើកទឹកចិត្ត លើការវិនិយោគវិស័យកសិកម្មរបស់វិស័យឯកជនក្នុង និងក្រៅប្រទេស ដោយភ្ជង់ផ្តោតទៅលើ ខ្សែច្រវាក់ផលិតកម្ម និងតម្លៃបន្ថែម (A to Z) មានជាអាទិ៍៖ ផលិតកម្ម បច្ចេកវិទ្យាក្រោយពេលប្រមូលផល ឃ្លាំងស្តុក សម្ងួត រោងម៉ាស៊ីនកិន កែច្នៃ វេចខ្ចប់ ដឹកជញ្ជូន និងនាំចេញ ដោយឈរលើគោលការណ៍ស្តង់ដារគុណភាព អនាម័យ សុវត្ថិភាព និងការប្រកួតប្រជែង។

ជាបឋម Mrs. Olga Reuvekamp បានថ្លែងអំណរគុណចំពោះពេលវេលាដ៏មានតម្លៃរបស់ឯកឧត្តមរដ្ឋមន្រ្តីដែលអនុញ្ញាតទទួលជួបរូបលោកស្រី និងសហការីនាពេលនេះ។ ឆ្លៀតយកឱកាសនេះ លោកស្រី បានជម្រាបជូនឯកឧត្តមរដ្ឋមន្រ្តីថា MARL គឺជាអង្គការមួយដែលនាំមុខ គេនៅរដ្ឋ Minnesota សហរដ្ឋអាមេរិក ក្នុងការផ្តល់វគ្គបណ្តុះបណ្តាលថ្នាក់ដឹកនាំលើការងារកសិកម្ម និងអភិវឌ្ឍន៍ជនបទ។ លោកស្រីបានបន្តទៀតថា តាមរយ:ក្រុមប្រឹក្សាស្តារ និងអភិវឌ្ឍន៍វិស័យកសិកម្ម និងជនបទ លោកស្រី និងសមាជិកក្រុមការងារចំនួន ៣២នាក់ ទៀតដែលសុទ្ធ តែជាអ្នកដឹកនាំសកម្ម មកពីពហុជំនាញរួមមានអ្នកស្រាវជ្រាវ សាស្រ្តាចារ្យ នាយកក្រុមហ៊ុន ម្ចាស់កសិដ្ឋានចិញ្ចឹមគោទឹកដោះ និងដំណាំកសិ-ឧស្សាហកម្ម។ល។ បានមកបំពេញទស្សនកិច្ចនៅប្រទេសកម្ពុជាក្នុងគោលបំណងចង់សិក្សាស្វែងយល់ឱ្យបានស៊ីជម្រៅបន្ថែមអំពីទី១- គោល នយោបាយវិនិយោគលើវិស័យកសិកម្ម និងជនបទរបស់កម្ពុជា និងទី២- ពង្រឹងទំនាទំនង និងកិច្ចសហប្រតិបត្តិការរវាងព្រះរាជាណាចក្រកម្ពុជា និងសហរដ្ឋអាមេរិកតាមរយ:វិស័យកសិកម្ម និងទី៣- តួនាទី និងភារកិច្ចរបស់ក្រសួងកសិកម្ម រុក្ខាប្រមាញ់ និងនេសាទ។

ជំនួបពិភាក្សាបានដំណើរការទៅដោយរលូន រួមទាំងសំណួរជាច្រើនដែលប្រតិភូមីនីសូតា បានចោទសួរឯកឧត្តមរដ្ឋមន្រ្តីទាក់ទងការវិនិយោគ គោលនយោបាយជួយកសិករ ការដាំឈើឡើងវិញ នេសាទបែបប្រពៃណី និងវារីវប្បកម្ម ផលិតកម្មពោត ដំឡូងមី ដំណាំអំពៅស្ក ស្វាយចន្ទី និងសណ្តែកសៀង បញ្ហាជំងឺចេកអំបូងលឿង ផលិតកម្មសត្វ និងទឹកដោះ ការធ្លាក់ចុះគុណភាពដីដោយសារដាំដំណាំដំឡូងមីច្រើនឆ្នាំជាប់គ្នា ការអប់រំបណ្តុះបណ្តាលកសិករ និងការដឹកនាំ គ្រប់គ្រងសហគមន៍កសិកម្ម តើអនុវិស័យអ្វីខ្លះដែលមានសក្តានុពលសម្រាប់ធ្វើការវិនិយោគនាពេលអនាគត កិច្ចសហការរវាងក្រសួងជាមួយ Minnesota University និងសំណួរពិសេសចុងក្រោយគឺតើដំណើរជីវិត ការងារ ចំណេះដឹង និងបទពិសោធន៍របស់ឯកឧត្តមរដ្ឋមន្រ្តីដែលបានក្លាយជាថ្នាក់ដឹកនាំម្នាក់នាពេលបច្ចុប្បន្ននេះ ទៅមកដោយរបៀបណា?។ ឯកឧត្តមរដ្ឋមន្ត្រី បានផ្តល់ចម្លើយជូនគណ:ប្រតិភូជាបន្តបន្ទាប់ដោយយោងទៅលើស្ថានភាពជាក់ស្តែងនៃកំណើនសេដ្ឋកិច្ច ប្រជាជន ការប្រកួតប្រជែងទីផ្សារ ការអភិវឌ្ឍន៍វិស័យកសិកម្ម សក្តានុពលលើអនុវិស័យសម្រាប់ធ្វើការវិនិយោគ គោលនយោបាយអំណោយផល។ល។

ជាថ្មីម្តងទៀត លោកស្រី Olga Reuvekamp តាងនាមឱ្យគណ:ប្រតិភូមីនីសូតា បានថ្លែង អំណរគុណយ៉ាងជ្រាលជ្រៅសម្រាប់ពេលវេលា និងព័ត៌មានសំខាន់ៗដែលផ្តល់ដោយឯកឧត្តមរដ្ឋមន្ត្រីជាពិសេស និងសហការី លោកស្រីសង្ឃឹមថានាពេលអនាគតកិច្ចសហប្រតិបត្តិការ និងការវិនិយោគក្នុងវិស័យកសិកម្មពីរដ្ឋមីនីសូតានឹងអាចកើតមានជាប្រាកដ។