ឯកឧត្តមរដ្ឋមន្រ្តី វេង សាខុន និងគណៈប្រតិភូបានចូលរួមកិច្ចប្រជុំលើកទី១៨ នៃរដ្ឋមន្រ្តីកសិកម្ម និងព្រៃឈើអាស៊ានបូកបី (AMAF Plus Three)

ចេញ​ផ្សាយ​ ១២ តុលា ២០១៨ 2614

នៅព្រឹកថ្ងៃសុក្រ ០៣កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១២ ខែតុលា ឆ្នាំ២០១៨ ឯកឧត្តមរដ្ឋមន្រ្តី វេង សាខុន និងគណៈប្រតិភូបានចូលរួមកិច្ចប្រជុំលើកទី១៨ នៃរដ្ឋមន្រ្តីកសិកម្ម និងព្រៃឈើអាស៊ានបូកបី (AMAF Plus Three)។ រដ្ឋមន្រ្តីកសិកម្ម និងព្រៃឈើអាស៊ានបូកបីនៅតែមានការយកចិត្តទុកដាក់ទៅលើ សន្តិសុខស្បៀង ការអភិវឌ្ឍន៏ជនបទ ការបង្ការនិងទប់ស្កាត់ជំងឺរាតត្បាតនៃការធ្វើពាណិជ្ជកម្មផលិតផលកសិកម្មឆ្លងដែន និងការជំរុញភាពជាដៃគូរវាងវិស័យឯកជននិងរដ្ឋនៅក្នុងតំបន់ ដើម្បីពង្រីកពាណិជ្ជកម្មផលិតផលកសិកម្មរវាងប្រទេសអាស៊ានបូកបី។ ភាគីចិន ជប៉ុន និងកូរ៉េ បានបង្ហាញនូវជំហរក្នុងការពង្រឹងកិច្ចសហប្រតិបត្តិការជាមួយបណ្តាប្រទេសអាស៊ានជាពិសេសបន្តគាំទ្រក្នុងការអនុវត្តយន្តការ កិច្ចព្រមព្រៀងស្បៀងបម្រុងសង្រ្គោះបន្ទាន់អាស៊ានបូកបី (APTERR) និងយន្តការ ប្រព័ន្ធព័ត៌មានវិទ្យាសន្តិសុខស្បៀងអាស៊ានបូកបី (AFSIS)។

សូមបញ្ជាក់ថា APTERR ជាកិច្ចព្រមព្រៀងកិច្ចសហប្រតិបត្តិការក្នុងតំបន់នៃអាស៊ានបូកបីដែលបានបង្កើតឡើងក្នុងឆ្នាំ២០១១ ក្នុងបំណងពង្រឹងសន្តិសុខស្បៀង កាត់បន្ថយភាពក្រីក្រ និងលុបបំបាត់កង្វះអាហារូបត្ថម្ភ នៅក្នុងប្រទេសជាសមាជិកដោយមិនប៉ះពាល់ដល់ផ្នែកពាណិជ្ជកម្មឡើយ ដោយនៅរក្សាបានគោលបំណងក្នុងការធានាសន្តិសុខស្បៀងនៅក្នុងតំបន់។ ដោយឡែក AFSIS សំដៅដល់យន្តការគ្រប់គ្រងប្រព័ន្ធបណ្តាញសន្តិសុខស្បៀង ដើម្បីធានាដល់និរន្តភាពសន្តិសុខស្បៀងរយៈពេលវែងនៅក្នុងតំបន់ តាមរយៈការផ្តល់ព័ត៌មានសន្តិសុខស្បៀង និងការវិភាគសម្រាប់អ្នករៀបចំគោលនយោបាយក្នុងការទាញយកនូវព័ត៌មានដែលមានភាពជាក់លាក់។

នៅក្នុងកិច្ចប្រជុំនេះ ភាគីចិន ជប៉ុន និងកូរ៉េ ក៏បានបង្ហាញពីជំហរក្នុងការជំរុញយន្តការភាពជាដៃគូរវាងឯកជននិងរដ្ឋនៅក្នុងប្រទេសអាស៊ាន ដើម្បីពង្រឹកទំហំពាណិជ្ជកម្មកសិកម្មក្នុងតំបន់ ជាពិសេសការវិនិយោគនូវផ្នែកបច្ចេកវិទ្យាទំនើបក្នុងប្រព័ន្ធខ្សែច្រវ៉ាក់កសិកម្ម ទាំងក្នុងដំណើរការផលិតកម្ម និងការកែច្នៃវេចខ្ចប់ ដែលមានគុណភាព និងស្តង់ដារខ្ពស់ស្របតាមបទដ្ឋានអន្តរជាតិ និងធានាបាននូវសុវត្ថិភាពចំណីអាហារ។